བོད་གོར་སྡེ་གཟར་གྱི་འབྱུང་རྐྱེན་ཞྭ་དམར་བཅུ་པ་ཡིན་ནམ།

མི་ཕམ་ཆོས་འགྲུབ་རྒྱ་མཚོ་ནི་ཞྭ་དམར་སྐུ་ཕྲེང་བཅུ་པ་ཡིན་ལ། སྐབས་དེར་བོད་ཡུལ་ཙམ་དུ་མ་ཟད་རྒྱ་བལ་གྱི་པཎྜི་ཏ་རྒན་པོ་རྣམས་ཀྱིས་བསྔགས་བརྗོད་མཛད་སའི་མཁས་པ་ཆེན་པོ་སི་ཏུ་པཎ་ཆེན་ལ་བསྟེན་ནས་མདོ་ཁམས་དཔལ་སྤུངས་སུ་ལོ་ངོ་བཅུ་གཉིས་ཀྱི་རིང་དུ་སློབ་གཉེར་བྱས་པས་སྐུ་ཡོན་དང་མཁྱེན་རྒྱ་ཤིན་ཏུ་ཆེ། ཁོང་གི་མཛད་སྤྱོད་ལ་མཐའ་གཅིག་ཏུ་རྒོལ་བའི་རྡོ་རིང་བསྟན་འཛིན་དཔལ་འབྱོར་གྱིས་ཀྱང་མཁྱེན་ཡོན་ཐད་ལ་ངོས་ལེན་བྱས་ཡོད་པ་ལྟ་བུ་ཡིན།  ཁོང་གི་སྐུ་ཡི་བྱད་གཟུགས་ནི་ཉིད་ཀྱི་གཅེན་པོ་པཎ་ཆེན་དཔལ་ལྡན་ཡེ་ཤེས་དང་ཤིན་ཏུ་འདྲ་བ་བཤད་ཅིང་། སློབ་མའི་ཐུ་བོ་གྱུར་པའི་སི་ཏུ་པདྨ་ཉིན་བྱེད་ཀྱིས་སྐུ་ཤ་ཤིན་ཏུ་རྒྱགས་པ་ཞིག་ཡོད་པ་གསུངས་པས།  སྐུ་མཆེད་གཉིས་ཀ་ཤ་རྒྱགས་ཅན་རེ་ཡིན་པ་སྨོས་མེད་དང་།  ཐང་གའི་ནང་དུའང་དེ་བཞིན་བྲིས་པས་མཐོང་གྲོལ་དམར་པོ་བཞེས་པའི་བླ་མ་ཤ་ལྷུག་ཅན་ཞིག་ཡིན་ན་ཁོང་ཡིན་པས་ཁྱབ་པ་ལྟ་བུའི་ངོས་བཟུང་སླ་བ་ཞིག་ཡིན།  རྗེ་འདི་པ་སྐུ་ཡོན་གསན་རྒྱ་ཆེ་བ་ལ་མཛད་འཕྲིན་དེ་ཙམ་མ་བྱུང་ཞིང་། སྐུ་ཚེའི་ཐོག་མཐའ་གཉིས་ཀ་ལ་ཕྱི་ནང་གི་རྙོག་འཛིང་དྲག་པོའི་ཀློང་དུ་ཚུད་པ་སྟེ།  སྐབས་དེར་ཞྭ་དམར་ཡང་སྲིད་གཉིས་གྱུར་ནས་མཐར་གཞུང་སས་ཇོ་བོའི་སྐུ་མདུན་དུ་བརྟག་སྒྲིལ་འཕངས་ནས་གཏན་ཁེལ་བཟོ་དགོས་བྱུང་བ་དང་། སྐུ་ཚེའི་སྨད་དུ་གོར་ཥས་སྒོར་སྐྱིལ་བྱས་ཤིང་། གདན་ས་ཡངས་པ་ཅན་མན་ཇུ་དང་བོད་གཞུང་གཉིས་ཀྱིས་གཏོར་བཅོམ་དང་ཆོས་བརྒྱུད་གཞན་དུ་བསྒྱུར་བ་སོགས་ཉམས་ཆག་ཆེར་བྱུང་བ་ནི།   གནས་སྒོ་བས་ཞྭ་དམར་གྲགས་པ་སེང་གེའི་རྣམ་ཐར་དུ། རྗེ་རང་བྱུང་བས་ཀཾ་པོ་གནས་ནང་དུ་འབྱོན་དགོས་ཞེས་ལུང་བསྟན། འབྱོན་མ་གྲུབ།  ཕྱིས་ཞྭ་དམར་བའི་སྐྱེ་ཕྲེང་ལ་འདིའི་རྟེན་འབྲེལ་གྱིས་ཅུང་ཞིག་གནོད་པར་སེམས། ཞེས་གསུངས་པ་ལྟར་ཡིན་ནམ་སྙམ། སྟབས་མ་ལེགས་པ་ཞིག་ལ་བོད་གོར་སྡེ་གཟར་གྱི་སྐབས་སུ་ཁོང་བལ་ཡུལ་དུ་བཞུགས་ཡོད་ལ།  སྡེ་གཟར་གྱི་འབྱུང་རྐྱེན་ལ་མི་འདྲ་བ་བཞི་ཙམ་བཤད་ཀྱང་།   ཀུན་གཟིགས་ཞྭ་དམར་མཆོག་སྤྲུལ་ཁོང་འབྱུང་རྐྱེན་ཡིན་པ་མཐའ་གཅིག་ཏུ་བཤད་མཁན་ནི་སྡེ་གཟར་གྱི་ཐོག་མཐའ་བར་གསུམ་དུ་ཞུགས་པའི་རྡོ་རིང་བཀའ་བློན་བསྟན་འཛིན་དཔལ་འབྱོར་ཡིན།  

སྔོན་ཆད་ཁོང་དང་སྡེ་གཟར་གྱི་བར་འབྲེལ་བ་གཏན་ནས་མེད་པ་གནས་སྒོ་བས་བཤད་པ་ལྟར་གུས་པས་བརྒྱ་ཆ་བརྒྱ་ཐམ་པ་དག་སྣང་ཁོ་ནས་ཁས་ལེན་མ་ཐུབ་ཀྱང་།   སྐབས་དེར་དུས་ཟིང་གི་ཁྲོད་དུ་གནས་ཤིང་ཕྱོགས་གཉིས་ཀར་ཆ་རྒྱུས་ཡོད་པའི་བལ་བོད་ས་མཚམས་ཀྱི་མི་སྣ་གནད་ཆེན་ཏེ།  རིག་འཛིན་ཆེན་མོ་ཀརྨ་བདུད་འཇོམ།  སྨན་སྒོམ་ཆོས་རྗེ་ཀུན་དགའ་དཔལ་ལྡན།  རིག་འཛིན་ཆོས་དབྱིངས་རྡོ་རྗེ།  བྲག་དཀར་ཆོས་ཀྱི་དབང་ཕྱུག་སོགས་ཀྱི་རྣམ་ཐར་དུས་ཕྱིས་ལག་ཏུ་སོན་ཞིང་བམ་ཀློག་ཅུང་བྱས་པས། ས་སྤྲེལ་སྡེ་གཟར་གྱི་འབྱུང་རྐྱེན་གྱི་རྩ་བ་ངོ་མ་ཞྭ་དམར་བཅུ་པ་མིན་ན་ཡང་། རྡོ་རིང་བཀའ་བློན་གྱིས་ཉེས་འགེལ་བྱས་ཡོད་པ་དང་། དེའང་ཀློང་རྡོལ་བླ་མ་ངག་དབང་བློ་བཟང་གིས་རང་གི་རྨི་ལམ་ཞིག་ལ་གང་བྱུང་དུ་འགྲེལ་བཤད་བྱས་པ་དང་།  བཀའ་མདའ་ལས་ཚན་སྤྱི་ལ་ཀར་དགེ་ནང་འཁྲུགས་ཀྱི་ལྟ་བའི་ཤུགས་རྐྱེན་ཡོད་ཁར། ཞྭ་དམར་གཤེགས་ཤིང་རྒྱ་དམག་བལ་ཡུལ་དུ་འབྱོར་ཚེ་གོར་རྒྱལ་གྱི་ཁུ་བོ་སྦ་དུར་ས་ཧེབ་ཀྱིས་རང་ཉིད་དཀར་འདོན་གྱི་ཆེད་ཉེས་པ་ཡོངས་རྫོགས་ཞྭ་དམར་ལ་དཀྲིས་པ།    ད་རུང་རྡོ་རིང་རང་གི་ཨ་མའི་ཁྱིམ་ཚང་མདོ་མཁར་ཚང་གི་ཛ་སག་ཐའི་ཇི་གོ་གནས་རྒྱུན་འཇགས་ཡོང་བའི་ཆེད་དུ་སོགས་ཞྭ་དམར་པ་ལ་ལོག་པ་མཐོང་རྐྱང་དང་ཉེས་པ་འགེལ་རྐྱང་བྱས་ཡོད་པའི་ཁུངས་སྣེ་དང་རྒྱུ་མཚན་གང་མང་མཐོང་། ཕྱིས་ཀྱི་ལོ་རྒྱུས་སྨྲ་བ་འགས་ནི་དེ་ཙམ་ཡང་བརྟག་མ་ཐུབ་པར་རྡོ་རིང་བློན་པོའི་རྗེས་ཟློས་མཛད་རྐྱང་བཟོས་པ་ནི་རང་ཉིད་ལ་དཔྱོད་ཤེས་མེད་པའི་རང་རྟགས་འབའ་ཞིག་ཏུ་སྣང་བས།  བོད་གོར་སྡེ་གཟར་གྱི་ལོ་རྒྱུས་སྤྱི་དང་ཀུན་གཟིགས་ཞྭ་དམར་བཅུ་པ་ཆོས་གྲུབ་རྒྱ་མཚོའི་རྣམ་ཐར་སྒེར་ལ་ཉམས་ཞིབ་བྱ་དགོས་ན།  གོང་གི་མི་སྣ་དག་གི་རྣམ་ཐར་ལ་མ་གཟིགས་ཐབས་མེད་ཅིག་མཐོང་བས་ངོ་སྤྲོད་ཚུལ་དུ་སྤྲིངས།  

                         རང་བྱུང་ཀུན་ཁྱབ་ཀྱིས་ཤེས་བྱ་མཛོད་ལས་སྒྲུབ་ཁང་ནས།