2024年居民医保最新缴费标准公布
སྤྱི་ཚེས་༢༦ཉིན། རྒྱལ་ཁབ་སྨན་བཅོས་འགན་བཅོལ་ཅུད་སོགས་ཚན་པས་ཁྱབ་བསྒྲགས་བྱས་པའི་༼ ༢༠༢༤ལོའི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་ལེན་གྱི་འབྲེལ་ཡོད་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ ༽གཞིར་བཟུང་སྟེ། ༢༠༢༤ལོར་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་གྱི་ནོར་སྲིད་ཁ་གསབ་དང་། མི་སྒེར་གྱི་གྲོན་དངུལ་འཇལ་བའི་ཚད་གཞི་ལོ་གོང་མ་ལས་སྒོར་༣༠དང་༢༠སོ་སོར་འཕར་ནས། མི་རེར་ལོ་རེར་སྒོར་༦༧༠དང་༤༠༠ལས་མི་ཉུང་བ་ཟིན་རྒྱུ་རེད།
དེ་ཡང་། ༢༠༡༦ལོ་ནས་བཟུང་གྲོང་མིའི་སྨན་བཅོས་འགན་བཅོལ་གྱི་ནོར་སྲིད་ཁ་གསབ་གསར་པ་འཕར་ཚད་མི་སྒེར་གྱི་གྲོན་དངུལ་གསར་པ་འཕར་བ་ལས་བརྒལ་ཐེངས་དང་པོ་ཡིན་ཞིང་། གྲོང་མིའི་མི་སྒེར་གྱི་གྲོན་དངུལ་འཕར་ཚད་ཀྱང་འོས་འཚམ་ཆག་ཡོད་པ་རེད།
བརྡ་ཐོའི་ནང་། ཀྲུང་དབྱང་ནོར་སྲིད་ཀྱིས་མུ་མཐུད་གཏན་འབེབས་ལྟར་ས་གནས་ལ་རིམ་པ་དབྱེ་ནས་ཁ་གསབ་སྤྲད་རྒྱུ་དང་། ནུབ་རྒྱུད་དང་དབུས་རྒྱུད་ས་ཁུལ་ལ་མི་རེའི་ཆ་སྙོམས་ནོར་སྲིད་ཁ་གསབ་ཚད་གཞིའི་༨༠%དང་༦༠%ཡི་བསྡུར་ཚད་ལྟར་ཁ་གསབ་སྤྲད་རྒྱུ་དང་། ཤར་རྒྱུད་ས་ཁུལ་གྱི་ཞིང་ཆེན་ཁག་ལ་བསྡུར་ཚད་ངེས་ཅན་ལྟར་ཁ་གསབ་སྤྲད་རྒྱུ་ཡིན་ཞེས་དང་། བརྡ་ཐོའི་ནང་གནས་སྡོད་ལག་ཁྱེར་ཁྱེར་ནས་ས་གནས་དེ་གའི་གྲོང་མིའི་སྨན་བཅོས་འགན་བཅོལ་ནང་ཞུགས་མཁན་ལ་རིམ་ཁག་ནོར་སྲིད་ཀྱིས་ས་གནས་དེ་གའི་གྲོང་མིའི་ཚད་གཞི་གཅིག་མཚུངས་ལྟར་ཁ་གསབ་སྤྲད་དགོས་ཞེས་ཁ་གསལ་བཏོན་ཡོད་པ་རེད།
བརྡ་ཐོའི་ནང་། ནད་གཞི་ཚབས་ཆེན་འགན་བཅོལ་གྱི་གནད་ལ་འཕིགས་པའི་འགན་ལེན་ནུས་པ་ཆེ་རུ་གཏོང་བ་དང་། ནད་གཞི་ཚབས་ཆེན་འགན་བཅོལ་གྱི་འགོ་འཛུགས་ཚད་གཞི་དེ། རྩ་དོན་ཐོག་ས་གནས་དེ་གའི་ལོ་གོང་མའི་གྲོང་ཁྱེར་དང་གྲོང་གསེབ་ཀྱི་གྲོང་མིའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ལས་མཐོ་བ་མེད་པ་དང་། གྲོང་མིའི་སྨན་བཅོས་འགན་བཅོལ་དང་ནད་གཞི་ཚབས་ཆེན་འགན་བཅོལ་གྱི་གཏོང་སྤྲོད་བཅད་གྲངས་མཐོ་ཤོས་དེ། རྩ་དོན་ཐོག་ས་གནས་དེ་གའི་ལོ་གོང་མའི་གྲོང་ཁྱེར་དང་གྲོང་གསེབ་ཀྱི་གྲོང་མིའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ཀྱི་ལྡབ་༦ཡས་མས་ཟིན་པ། འགྲོ་སོང་རྩིས་ཞུའི་བསྡུར་ཚད་དེ་སྨན་བཅོས་འགྲོ་གྲོན་མཐོ་སར་ཕྱོགས་རྒྱུ་བཅས་བྱ་དགོས་པའི་བླང་བྱ་བཏོན་ཡོད་པ་རེད།
བརྡ་ཐོའི་ནང་། འགན་བཅོལ་ནང་ཞུགས་མཁན་གྲོང་མིས་སྒོ་བསྟེན་སྨན་ཁང་དུ་ཐོན་པའི་གཏན་འབེབས་དང་མཐུན་པའི་ཕྲུ་གུ་མ་སྐྱེས་གོང་གི་བརྟག་དཔྱད་ཀྱི་འབྲེལ་ཡོད་སྨན་བཅོས་འགྲོ་གྲོན་སྒོ་བསྟེན་འགན་ལེན་ནང་བཅུག་ནས་སྤྱིར་བཏང་སྒོ་བསྟེན་གྱི་སྤྱི་འདོམས་ཐོབ་ཐང་ལོངས་སུ་སྤྱད་རྒྱུ་དང་། སྨན་ཁང་དུ་བསྡད་ནས་ཕྲུ་གུ་བཙའ་བའི་སྨན་བཅོས་འགྲོ་གྲོན་འགན་སྲུང་ཆུ་ཚད་ལུགས་མཐུན་ངང་མཐོ་རུ་བཏང་སྟེ། འགན་བཅོལ་ནང་ཞུགས་པའི་གྲོང་མིའི་ཕྲུ་གུ་བཙའ་བའི་སྨན་བཅོས་འགྲོ་གྲོན་གྱི་ཁུར་པོ་ཇེ་ཡང་དུ་གཏང་དགོས་ཞེས་བཏོན་ཡོད་པ་རེད།
རྒྱལ་ཁབ་སྨན་བཅོས་འགན་བཅོལ་ཅུད་ཀྱི་འབྲེལ་ཡོད་འགན་འཁུར་བས། མི་རེའི་ཆ་སྙོམས་སྔོན་དཔག་ཚེ་ཚད་རྒྱུན་ཆད་མེད་པར་འཕར་བ་དང་། སྨན་བཅོས་འཛད་སྤྱོད་ཆུ་ཚད་རྒྱུན་ཆད་མེད་པར་མཐོ་རུ་འགྲོ་བའི་གནས་ཚུལ་འོག མི་སྒེར་གྱི་གྲོན་དངུལ་དང་ནོར་སྲིད་ཁ་གསབ་ཚད་གཞི་ལུགས་མཐུན་ངང་མཐོ་རུ་གཏོང་བ་ནི་ཐོབ་ཐང་ཆུ་ཚད་སྲ་བརྟན་དང་མཐོ་རུ་གཏོང་བ་དང་། ལམ་ལུགས་བརྟན་པོའི་ངང་འཁོར་སྐྱོད་འགན་ལེན་བྱེད་པའི་དགོས་མཁོ་ཞིག་རེད།
དེའི་གོང་། རྒྱལ་ཁབ་ཀྱིས་ཡིག་ཆ་བཏོན་ནས་གྲོང་མིར་བསྟུད་མར་འགན་བཅོལ་ནང་ཞུགས་རྒྱུའི་ལྕག་སྐུལ་བྱས་ཡོད་པ་དང་། ད་རེས་ཀྱི་བརྡ་ཐོའི་ནང་ཞིང་ཆེན་ཁག་གིས་བསྟུད་མར་འགན་བཅོལ་ནང་ཞུགས་མཁན་དང་། གྲོན་དངུལ་འཇལ་མཚམས་བཞག་པའི་མི་སྣར་དེ་མཚུངས་ཀྱི་ལྕག་སྐུལ་དང་། ཚོད་འཛིན་བྱ་ཐབས་བཀོད་སྒྲིག་བྱེད་པ་དང་འབྲེལ་ལག་བསྟར་ནན་པོ་བྱ་དགོས་པའི་བླང་བྱ་བཏོན་ཡོད་པ་རེད།
来源:新华社、阳光西藏
编辑:次仁旺拉