བརྙན་ལམ་ལེ་ཚན། གཏམ་དཔེའི་དོ་ར།
✦གཏམ་གྱི་སྒོ་མོ་འབྱེད་པའི་གསེར་གྱི་ལྡེ་མིག །✦
✦དཔེ་ཡི་ལུང་ལ་བརྒྱུས་པའི་ཚིག་གི་ཕྲེང་བ།།✦
✦དོ་ཤལ་རིན་ཆེན་རྒྱན་ལས་འགྲན་ཟླ་བྲལ་བའི།།✦
✦ར་བ་འདི་ནི་རིག་པའི་གཏེར་མཛོད་འདྲའོ།།✦
སྲིད་པའི་ཞལ་རྒྱུན། འདོན་ཐེངས་ཉིས་བརྒྱ་དང་ཉེར་ལྔ།།
མི་རྣམས་ཐམས་ཅད་ཕྱུག་པོའི་བུ་ལ་དགའ། གཏམ་རྣམས་ཐམས་ཅད་འདོད་པའི་རྗེས་སུ་འགྲོ།
གཏམ་འགྲེལ། མི་རྣམས་རྒྱུ་ནོར་དང་འདོད་པའི་དབང་དུ་ཤོར་འགྲོ་བའི་དོན།
མི་སྙོབ་གནམ་ལ་བསྙབས་ན། རྐང་པའི་རྟིང་རྩ་ཆད་ཉེན་ཡོད།
གཏམ་འགྲེལ། མི་འོས་པའི་ཧམ་སྙེག་བྱེད་མི་རུང་ཞིང་། བྱས་ན་རང་ཉིད་ལ་ཉེན་ཁ་ཡོང་བའི་དོན།
མི་བློ་མི་ལ་བཀལ། བྱ་བློ་ཤིང་ལ་བཀལ།
གཏམ་འགྲེལ། མི་ཕན་ཚུན་གཅིག་བློ་གཅིག་ལ་འགེལ་བའི་དོན།
མི་མང་ཚོགས་སར་ཁ་མ་སྔ། མགར་བའི་གོ་ཁར་ལག་མ་སྔ།
གཏམ་འགྲེལ། མི་མང་ཚོགས་སར་དོན་དག་གི་གཞི་ཚུལ་མ་ཤེས་མ་གོའི་སྔོན་དུ་བབ་ཅོལ་གྱིས་ཁ་ཚིག་གྲགས་ན་ནོར་ཉེན་ཡོད་པའི་དོན།
མི་ལ་མི་དགོས་རྒྱ་འདྲེ་དང་། ཤིང་ལ་མི་དགོས་འཛེར་པ།
གཏམ་འགྲེལ། གྱོད་དང་ཁ་མཆུ་མེད་ན་ཡག་པའི་དོན།
རང་ཚོད་རང་གིས་མ་བཟུང་ན། ཁ་ལ་ཀོ་ལྕག་ཉོས་ཡོང་ངོ་།
གཏམ་འགྲེལ། བྱ་བ་ཐལ་དྲགས་ན་མཐར་རང་ལ་ཉེས་ཆད་འཁེལ་ཡོང་བའི་དོན།
རང་ལ་བློ་ཡོད་ན། མི་ལ་མིག་ཡོད།
གཏམ་འགྲེལ། རང་སོ་སོར་བློ་དང་ཇུས་ཡོད་པར་རློམས་ནས་མི་གཞན་ལ་ཡིན་མིན་ལྟ་བྱེད་ཀྱི་མིག་གསལ་པོ་ཇི་སྙེད་ཅིག་ཡོད་པ་དེ་བརྗེད་མི་རུང་བའི་དོན།
སྤྱི་ཁྱབ་ལྟ་ཞིབ། བསྟན་འཛིན་འཇིགས་མེད།
རྩོམ་སྒྲིག་པ། ལྷ་མོ། བསམ་གྲུབ་བསྟན་འཛིན། བདེ་སྐྱིད་དབྱངས་སྒྲོན།
རྩོམ་ཁུངས། སྒར་བརྙན་འཕྲིན་ལས་ཁུངས་བོད་ཡིག་རྩོམ་སྒྲིག་ཁང་།
