2024ལོའི་ཟླ་5ཚེས་6ཉིན། “ངའི་ནང་ལ་ཐ་མག་འཚོང་མཁན་སླེབས་བྱུང་། ཕལ་ཆེར་ཐ་མག་རྫུན་མ་འདྲ་པོ་འདུག”ཅེས་ལྷ་ས་གྲོང་ཁྱེར་རྡོ་ཐ་ཆེད་ཚོང་ཅུས་ལ་མང་ཚོགས་ཀྱི་ཐེར་འདོན་འབྱོར། དེར་བརྟེན་ལྷ་ས་གྲོང་ཁྱེར་རྡོ་ཐ་ཆེད་ཚོང་ཅུས་ཀྱིས་ཐ་མག་དེ་དག་ལ་བརྟག་དཔྱད་བྱས་པ་བརྒྱུད། ཐ་མག་ཚང་མའི་ཐོ་འགོད་ཚོང་རྟགས་རྫུན་མ་ཡིན་པ་མ་ཟད་སྤུས་ཚད་ལོན་མེད་པ་ཤེས་རྟོགས་བྱུང་བ་རེད།
ཆེད་དོན་ཚོགས་ཆུང་གིས་ཟླ་བ་གཅིག་ཙམ་སྒུག་བརྒྱབ་པས། ཐ་མག་རྫུན་མ་འཚོང་མཁན་ཚོགས་པའི་ཐ་མག་ལེན་ས་དང་། སྐྱེལ་ས། འཚོང་ས་བཅས་རྩད་ཆོད་པ་དང་། ཟླ་7ཚེས་16ཉིན་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་གདོང་དཀར་ཞིང་ཞོར་ཐོན་རྫས་སྡེབ་འཚོང་ཁྲོམ་རའི་ཚོང་ཁང་ཞིག་དང་། སྟོད་ལུང་བདེ་ཆེན་ཆུས་ལིང་ཧྥེང་རིག་ནུས་ཟོག་འགྲེམས་ཚད་ཡོད་ཀུང་སིའི་སྡེབ་འཚོང་ཁྲོམ་རའི་མཛོད་ཁང་ཞིག ལྷ་ས་གྲོང་ཁྱེར་ཐན་ཧའེ་ལམ་གྱི་ཚོང་ཁང་ཞིག ལྷ་ས་གྲོང་ཁྱེར་གྲོང་ཤར་གྱི་མྱུར་སྐྱེལ་ས་ཚིགས་ཤིག་བཅས་ལ་བརྟག་དཔྱད་བྱས་པ་རེད། གོང་གི་ས་ཆ་བཞི་པོ་ནས་ཐོ་འགོད་ཚོང་རྟགས་རྫུན་མའི་དོགས་པ་ཡོད་པ་མ་ཟད་སྤུས་ཚད་ལོན་མེད་པའི་ཐ་མག་རྡར་ཚན་1756རྩད་ཆོད་པ་དང་། ཆེད་དོན་ཚོགས་ཆུང་གིས་བརྟག་དཔྱད་དཔང་ལེན་གཏིང་ཟབ་བྱས་པ་བརྒྱུད། ལི་ཆེ་གེ་མོ་དང་། ཀྲང་ཆེ་གེ་མོ། ཐན་ཆེ་གེ་མོ། ལིའུ་ཆེ་གེ་མོ་སོགས་ཀྱིས་རྫུན་ལྷད་ཞན་གསུམ་གྱི་ཐ་མག་འཚོང་བའི་ཁྲིམས་འགལ་གྱི་ཉེས་གསོག་དོན་དངོས་རྩད་ཆོད་ཡོད། མིག་སྔར། གྱོད་གཞི་འདི་སྔར་བས་སྒྲུབ་གཉེར་བྱེད་བཞིན་ཡོད།
ལྷ་ས་གྲོང་ཁྱེར་རྡོ་ཐ་ཆེད་ཚོང་ཅུས་དང་ལྷ་ས་གྲོང་ཁྱེར་སྤྱི་བདེ་ཅུས་ཀྱིས་རྩད་ཆོད་པའི“5·29”ཐོ་འགོད་ཚོང་རྟགས་རྫུན་མའི་གྱོད་གཞིར་ཁྱོན་ཐ་མག་རྫུན་མ་རྡར་ཚན་1756ཡོད་པ་དང་། གྱོད་འབྲེལ་དངུལ་འབོར་སྒོར་ཁྲི་582.142ཟིན་ཞིང་། མི་4བཟུང་བ་དང་མི་1ཉེས་དོན་གྱི་བཀག་ཉར་བྱས་ཡོད། གྱོད་གཞི་འདི་ནི་རང་ལྗོངས་ཀྱི་ལོ་རྒྱུས་ཐོག་གྱོད་འབྲེལ་དངུལ་འབོར་མང་ཤོས་དང་། གྱོད་འབྲེལ་མི་སྣ་དང་ལྷུ་ཚིགས་མང་ཤོས་ཀྱི་ཐ་མག་རྫུན་མ་བཙོངས་པའི་གྱོད་གཞི་ཞིག་ཡིན་པ་དང་། གྱོད་གཞི་འདི་རྩད་ཆོད་པ་ལས་རང་སྐྱོང་ལྗོངས་རྡོ་ཐ་ཆེད་ཚོང་ཅུས་དང་ལྷ་ས་གྲོང་ཁྱེར་རྡོ་ཐ་ཆེད་ཚོང་ཅུས་ཀྱིས་ཐ་མག་དང་འབྲེལ་བའི་ཁྲིམས་འགལ་ཉེས་གསོག་བྱེད་སྤྱོད་ལ་རྡུང་རྡེག་མཐའ་གཅིག་ཏུ་གཏོང་བའི་ཆོད་སེམས་བརྟན་པོ་གང་ལེགས་མཚོན་ཡོད།
ཡོང་ཁུངས། བོད་ལྗོངས་ཉིན་རེའི་ཚགས་པར་བོད་ཡིག་སྨྱན་སྦྱོར་ལྟེ་གནས།
རྩོམ་སྒྲིག་འགན་ཁུར་པ། བསྟན་འཛིན་འཇིག་མེད།
དོ་དམ་པ། བསམ་གྲུབ་བསྟན་འཛིན།
