踏入蛇年，娱乐圈一众小花当然唔可以蛇王，而系要学似蛇一样灵活走位啦。好似“声梦小天后”炎明熹（Gigi），同TVB份约倾极都倾唔埋栏，长期被掟入雪柜，其空出嘅位置，自然有其他小花摄位。当中最得宠嘅，莫过于“国民初恋”姚焯菲（Chantel）！
TVB简直锡到佢燶，除咗搵Chantel主唱《爱．回家》主题曲外，更安排她秘密加入剧组，日前网上已流出其开工照，会同熊家有对手戏。大家都知，《爱．回家》一直收视高企，好多人开到声恨拍都系得个吉。大好机会，Chantel唾手可得，点会唔系得天独厚吖？
咁仲唔止，TVB最近更安排Chantel登上《声生不息．大湾区季》舞台，同容祖儿、薛凯琪及卫兰合唱《女神》毫不怯场，表现令人眼前一亮，获观众大赞为“新生代宝藏歌手”。
想当年《声生不息》第一季，Gigi一样获TVB安排参与，结果帮助Gigi知名度十级跳，成为佢返内地搵真银嘅契机。家阵同一条捧人Formula放喺Chantel身上一样掂，证明TVB有意打造Chantel成为新一代小天后，取替Gigi位置。
行船争解缆，同行如敌国，就算两位小花本身几老友都好，讲到上位一样冇面畀。娱乐圈竞争激烈，Gigi同Chantel唔止同样系《声梦传奇》出身，年纪亦系差不多，重叠性非常高，亦即系随时可以被另一人取替。冇计啦，Gigi扭计唔肯签约，Chantel则听教听话，大台咁识计数，梗系全力捧个乖乖女啦。
