今时今日香港影视娱乐萎缩，好多艺人早就北望神州，入行25年嘅胡杏儿正正系其一。早在2012年，杏儿已将事业重心逐渐北移，仲曾经喺内地担正女一，甚至打入《福布斯中国名人榜》，都咪话唔巴闭。之不过，女明星嘅赏味期限非常有限，呢位曾经嘅一线花旦亦无复当年勇咯。
杏儿最近喺内地一个真人骚吐露心声，坦言早就没有女一可演，但强调如果演一个无趣嘅女一，倒不如演一个有趣嘅女二女三。忽然咁坦白，却换不到网民同情，反而揶揄之声此起彼落，嘲讽“你估你系佘诗曼咩”、“阿佘拍大陆剧都冇女一做啦，凭甚么呀你”、“你估你个囧样好好戏咩”等等。
讲真，杏儿都成45岁，不再年轻，而内地娱乐圈竞争激烈，大把年轻貌美嘅小花等候上位，冇得担正做女一，正常不过。何况今时不同往日，十多年前，香港对内地来说既新奇又吃香，好多香港艺人北上赚个盆满钵满，好不风光。但风水轮流转，家阵国家强大，香港只系一粒小螺丝咋，香港艺人亦风光不再。
再睇吓内地顶流花旦阵容，迪丽热巴32岁已经有人嫌老，赵露思得26岁添，年过四十仍站稳一线，数来数去好似得孙俪，胡杏儿点比呀？所谓比上不足，比下有馀，杏儿早就赚了几桶金，又有美满幸福家庭，做唔到女一，亦冇乜好计较。
咁讲啦，如果杏儿真系咁恨做女一，唔系冇办法嘅，返嚟TVB娘家咪得啰。好似阿佘同杨茜尧咁，相继回巢拍剧，所演又系“大女主剧”，过足戏瘾，叫好叫座。所以啫，杏儿唔使灰心呀！
