شيزاڭنىڭ ديڭ-رى اۋدانىنداعى جەر سىلكىنىسىندە 126 ادام قازا بولىپ، 188 ادام تۇرلىشە دارەجەدە جارالاندى، قۇتقارۋ، كومەك بەرۋگە قاتىناسقان جاقتار بار كۇشپەن ادام ىزدەۋ، قۇتقارۋ قىزمەتىن ورىستەتىپ، اپاتقا ۇشىراعان بۇقارانىڭ نەگىزگى تۇرمىسىن قامتاماسىزداندىردى
ءوز حابارىمىز. 1-ايدىڭ 7-كۇنى ساعات 19 عا دەيىن، شيزاڭنىڭ رىكازى قالاسى ديڭ-رى اۋدانىنداعى جەر سىلكىنىسىندە 126 ادام قازا بولىپ، 188 ادام جارالاندى. قۇتقارۋ، كومەك بەرۋگە قاتىناسقان جاقتار بار كۇشپەن ادام ىزدەۋ، قۇتقارۋ قىزمەتىن ورىستەتىپ، اپاتقا ۇشىراعان بۇقارانىڭ نەگىزگى تۇرمىسىن قامتاماسىزداندىردى. قازىرگە دەيىن جەر سىلكىنىسىندە بۇلىنگەن جول بولەكتەرى تۇگەلدەي جوندەلدى.ديڭ-رى اۋدانىندا 6.8 بال جەر سىلكىنگەننەن كەيىن، رىكازى قالاسى قىزمەت گرۋپپاسىن دەرەۋ جەر سىلكىنگەن وڭىرگە جىبەرىپ، اپاتتان قۇتقارۋ قىزمەتىن ورىستەتتى. قازىر ءار دارەجەلى شۇعىل جاعدايعا توتەپ بەرۋ، قۇتقارۋ، ءورت ءسوندىرۋ، ورتتەن ساقتانۋ-قۇتقارۋ، قوعام حاۋىپسىزدىگى كادر-ساقشىلارى، اسكەري بولىمدەردەگى كوماندير-جاۋىنگەرلەر، سونداي-اق قوعامدىق شۇعىل جاعدايعا توتەپ بەرۋ، قۇتقارۋ كۇشتەرى سياقتىلاردان 12 مىڭنان استام ادامدى توپتاپ، ىزدەۋ-قۇتقارۋ قىزمەتىن بار كۇشپەن ورىستەتتى. العاشقى توپتاعى 5800 دەن ارتىق شاتىر، كورپە قاتارلى ورتالىقتىڭ اپاتتان قۇتقارۋ زاتتارى 1-ايدىڭ 7-كۇنى كەشكى ساعات 10 مولشەرىندە رىكازى قالاسى ديڭ-رى اۋدانىنداعى جەر سىلكىنىس اپاتى بولعان رايونعا جەتكىزىلدى.شيزاڭ اۆتونوميالى رايوندىق شۇعىل جاعدايعا توتەپ بەرۋدى باسقارۋ مەڭگەرمەسى شۇعىل جاعدايعا توتەپ بەرۋگە قولباسشىلىق ەتۋ شتابى ورتالىعىنىڭ مەڭگەرۋشىسى لي بين بىلاي دەدى: حۋنان، سىچۋان، گۋاڭدۇڭ سياقتى ولكە، قالالاردىڭ قۇتقارۋ كۇشتەرى ارت-ارتىنان ناق مايدانعا بارىپ قۇتقارۋ قىزمەتىن ورىستەتتى. قازىر ءبىز 2000 شاتىر، 20 مىڭ ماقتالى كيىم، 5000 كورپە، 5200 بۇكتەمەلى توسەك، 1000 پەش قاتارلى زاتتاردى اپات تۋىلعان رايونعا جەتكىزدىك. كەلەسى قادامدا اپات تۋىلعان رايوننىڭ توڭىرەگىندەگى ساڭجۋزى رايونى، بايلاڭ اۋدانى، جياڭزى اۋدانى سياقتى 6 اۋدان، رايون ۋاكىلاتان باسقاراتىن اۆتونوميالى رايون دارەجەلى زاتتاردان زات جوتكەپ، اپات تۋىلعان رايوننىڭ قاجەتىن بار كۇشپەن قامتاماسىزداندىرامىز. ءار سالانىڭ اپاتقا ۇشىراۋ جاعدايىن ىشكەرىلەي ءبىر-بىرلەپ تەكسەرىپ، اپات تۋىلعان وڭىردەگى اپاتقا ۇشىراعان حالىقتىڭ تۇرمىسىن قامتاماسىزداندىرۋدى؛ ەمدەۋلۋىن قامتاماسىزداندىرۋدى؛ زاتتارمەن قامتاماسىزداندىرۋدى؛ قۇتقارۋ-كومەكتەسۋ جاعىنان قامتاماسىزداندىرۋدى ويداعىداي ىستەپ، قۇتقارۋ-كومەكتەسۋ كۇشتەرىن سايكەستىرىپ، قۇتقارۋ-كومەكتەسۋ قىزمەتىن تارتىپپەن ورىستەتەمىز.رىكازى قالاسى ديڭ-رى اۋدانى چاڭسو اۋىلى وسى رەتكى جەر سىلكىنىسىندە اپاتقا ۇشىراعان باستى رايونداردىڭ ءبىرى. جەر سىلكىنگەننەن كەيىن، جەرگىلىكتى ءورت ءسوندىرۋ، ورتتەن ساقتانۋ قۇتقارۋ-كومەكتەسۋ ۇلكەن اترەتى دەرەۋ جەر سىلكىنىسى اپاتى تۋىلعان ناق مايدانعا بارىپ، قامالىپ قالعانداردى بار كۇشپەن قۇتقاردى. ديڭ-رى اۋداندىق ءورت ءسوندىرۋ، ورتتەن ساقتانۋ قۇتقارۋ-كومەكتەسۋ ۇلكەن اترەتىنىڭ باستىعى دۇنجۋ جياڭسۇن بىلاي دەدى: قازىرگە دەيىن قامالىپ قالعان ءبىر ءبولىم بۇقارانى ءساتتى قۇتقاردىق. قۇتقارۋ قىزمەتى شۇعىل جۇرگىزىلۋدە، ءبىز قۇتقارۋ كۇشتەرىن ۇزدىكسىز كوبەيتىپ، قامالىپ قالعانداردى بار كۇشپەن قۇتقارامىز.رىكازى قالاسىنىڭ لازى اۋدانى ديڭ-رى اۋدانىمەن ىرگەلەس. جەر سىلكىنگەننەن كەيىنگى العاشقى تۇندە اپاتقا ۇشىراعان بۇقارا لايىقتى ورنالاستىرىلدى. لازى اۋداندىق پارتكومنىڭ ورىنباسار شۋجيى، اۋدان اكىمى سودان بىلاي دەدى: قۇلاعان ۇيلەردەگى بۇقارا ورنالاستىرىلىپ بولدى، نەگىزىنەن شاتىرلارعا، تاعى ءبىر ءبولىمى مەكتەپتەگى حاۋىپسىز ۇيلەرگە ورنالاستىرىلدى. ىشەر اسقا دا كەپىلدىك ەتىلدى، شاتىرعا پەش ورناتىلدى، تۇنەپ شىعۋعا ابدەن بولادى.مەملەكەتتىك دامۋ جانە رەفورمالاۋ كوميتەتى 1-ايدىڭ 7-كۇنى ورتالىقتىڭ مەجە ەسەبىنەن 100 ميلليون يۋان قارجى بوساتىپ، شيزاڭداعى جەر سىلكىنىس اپاتى تۋىلعان رايونداردى اپاتتان كەيىن جەدەل قالپىنا كەلتىرۋگە قولداۋ كورسەتتى. قازىنا مينيسترلىگى، شۇعىل جاعدايعا توتەپ بەرۋدى باسقارۋ مينيسترلىگى 1-ايدىڭ 7-كۇنى ورتالىقتىڭ جاراتىلىستىق اپاتتان قۇتقارۋ قارجىسىنان 100 ميلليون يۋان قارجى بوساتىپ، شۇعىل جاعدايعا توتەپ بەرۋ، قاتەردەن قۇتقارۋ جانە اپاتقا ۇشىراعان بۇقارانى قۇتقارۋ قىزمەتىنە ءبىر تۇتاس جۇمساۋعا ورنالاستىردى. تۇرعىن ءۇي جانە قالا-اۋىل قۇرىلىس مينيسترلىگى جەر سىلكىنىس اپاتى 2-دارەجەلى شۇعىل جاعدايعا توتەپ بەرۋ جوباسىن اتقاردى ءارى قىزمەت گرۋپپاسىن جەر سىلكىنگەننەن كەيىن تۇرعىن ۇيلەر مەن عيماراتتاردىڭ جانە قالا اكىمشىلىگى جابدىقتارىنىڭ حاۋىپسىزدىگىن دەرەۋ باعالاۋ، قاتەردەن قۇتقارۋ، شۇعىل جوندەۋ جانە قۇراستىرمالى ۇيلەر قۇرىلىسى قاتارلى قىزمەتتەردى قانات جايدىرۋعا جەتەكشىلىك ەتۋگە جىبەردى.
