མཁན་ཡུལ་ཤུལ་པས་ཆོས་རྗེ་རང་བྱུང་རྡོ་རྗེའི་གསུང་འབུམ་གྱི་སྔོན་བརྗོད།
དེ་ལྟར་རྩོམ་པ་པོ་དང་བརྩམས་ཆོས་ཀྱི་ཁྱད་ཆོས་དེ་ལྟ་བུ་ཡོད་པས་ད་ཐེངས་ཆོས་ཀྱི་རྗེ་རང་བྱུང་རྡོ་རྗེའི་གསུང་འབུམ་ཕྱོགས་བསྒྲིགས་བྱས་པ་འདི་ནི་བོད་ཀྱི་རིག་གནས་སྤྱི་དང་བྱེ་བྲག་བཀའ་བརྒྱུད་པའི་གྲུབ་མཐའ་ལ་ཞབས་ཞུ་ལེགས་པོ་ཞིག་ཏུ་གྱུར་ཡོད་པ་ནི་ཞར་བྱུང་དུ་ངོ་འཕྲོད་པ་ཡིན་ལ། སྔོན་མ་རྗེ་རང་བྱུང་ཞབས་ཀྱི་གསུང་འབུམ་དཔར་བསྐྲུན་བྱས་པ་ཡོད་འདུག་ནའང་ད་ཐེངས་འདི་སྔོན་མ་རྣམས་ལ་ལྟོས་ན་གཅིག་ནས་འཐུས་སྒོ་ཇེ་ཚང་དང་ཚགས་ཇེ་དམ་དུ་བཏང་ནས་བསྡུ་བསྒྲིགས་བྱས་ཡོད་འདུག་པས་ལྷག་ཏུ་དགོས་གལ་དང་ཕན་ཐོགས་ཆེན་པོ་ཞིག་ཏུ་མཐོང་། དེས་ན་བོད་ཀྱི་རིག་གཞུང་སྤྱི་དང་ཁྱད་པར་བཀའ་བརྒྱུད་པའི་ཕྱོགས་ཀྱི་རིག་པ་དོན་གཉེར་རྣམས་ཀྱིས་ནི་འདི་ལྟ་བུའི་ལེགས་བཤད་དག་དགོས་རྒུ་འབྱུང་བའི་ནོར་བུ་ལས་ཀྱང་ལྷག་པར་གཅེས་ཤིང་བཀུར་བར་འོས་པས་ཆོས་ཀྱི་མཛོད་ཆེན་པོ་འདི་དག་ལ་གུས་རྟག་གི་བརྩོན་པའི་སྒོ་ནས་ཐོས་བསམ་སྒོམ་གསུམ་གྱིས་འཇུག་པ་ལ་འབད་པར་འཚལ་ལོ་ཞེས་བསྐུལ་མ་ཡང་ཡང་ཞུ་བར་འདོད་དོ། །
ཞེས་པའང་ཡུལ་ཤུལ་བར་འབོད་པ་ཀར་ཚེས་བོད་རབ་བྱུང་བཅུ་བདུན་པའི་ཤིང་འབྲུག་ཟླ་བ་གསུམ་པའི་ཚེས་ལྔ་སྤེན་པ་སྣར་མའི་འགྲུབ་སྦྱོར་བཟང་པོར་སྐྱེ་དགུ་མདོར་སྦྱར་བ་དགེ་བར་གྱུར་ཅིག །
