བླ་རུང་སྒྱུ་འཕྲུལ་མཐོང་གྲོལ་ཆེན་མོ་བཞེངས་ཚུལ་དང་ནང་རྟེན་དང་སྐོར་ཚད་དང་ཕན་ཡོན་སྐོར།

ཆོས་རྗེ་དམ་པ་ཡིད་བཞིན་ནོར་བུའི་རྣམ་ཐར་རྒྱས་པ་དང་རྗེ་བཙུན་མ་མུ་མེད་ཡེ་ཤེས་མཚོ་མོའི་རྣམ་པར་ཐར་པ་པདྨ་དཀར་པོའི་ཆུན་པོ་གཉིས་ལས་ཁོལ་དུ་ཕྱུང་།

རྨེ་སྤྲུལ་བསྟན་འཛིན་རྒྱ་མཚོས་མཛད།

༡༩༩༥ལོ་འདིའི་ལོ་སྟོད་དུ་སྒྱུ་འཕྲུལ་དྲྭ་བའི་བློས་བསླངས་ཀྱི་དཀྱིལ་འཁོར་མཐོང་གྲོལ་ཆེན་མོ་འདི་ཉིད་བཞེངས་པའི་དབུ་བརྩམས་པ་ཡིན་ལ། དེ་ཡང་ཆོས་ཀྱི་རྗེ་ཞང་དབོན་གཉིས་ཀྱིས་གསེར་ལྗོངས་བླ་རུང་གི་ནུབ་བྱང་མཚམས་ཀྱི་ས་གནད་ཕུན་སུམ་ཚོགས་པར། སྒྱུ་འཕྲུལ་དྲྭ་བ་ཆེན་པོའི་ལམ་གྱི་རིམ་པ་ཉམས་སུ་ལེན་པར་འདོད་པ་དག་གི་ཀུན་བརྟགས་བཅོས་མའི་བསྐྱེད་རིམ་གྱི་དམིགས་པ་གསལ་འདེབས་ཀྱི་རྟེན་དང་། སྐལ་བཟང་དད་ལྡན་རྣམས་ཀྱི་ཚོགས་གསོག་སྒྲིབ་སྦྱོང་གི་ཞིང་ས་བླ་ན་མེད་པའི་རྒྱུ་རྐྱེན་དམ་པར་དམིགས་ནས། གཞལ་ཡས་ཁང་གྲུ་བཞི་སྒོ་བཞི་པ། ཆོས་འཁོར་རི་དྭགས། ཡ་ཐོག་རྡོ་རྗེའི་ཕྱུར་བུ། ཕྱི་རིམ་དུར་ཁྲོད་རྡོ་ར། མེ་རི་དང་བཅས་པ་བླ་རུང་ཆོས་སྒར་ཆེན་མོའི་མཚོན་རྟགས་ལྟ་བུར་གྱུར་པ་འདི་ཉིད་རྗེ་བཙུན་མ་མཆོག་གིས་དམངས་སྒོར་ས་ཡ་མང་པོའི་འགྲོ་གྲོན་བཏང་སྟེ་གྲུབ་པ་ཞིག་ཡིན་ལ། དཀྱིལ་འཁོར་རྟེན་བརྟེན་པ་དང་བཅས་པ་རྒྱུད་གསང་བ་སྙིང་པོའི་རྩ་འགྲེལ་རྣམས་དང་སྒྲུབ་དཀྱིལ་གྱི་གཞུང་དང་ཐིག་ཡིག་རྣམས་ལ་ཁུངས་གཏུགས་ཏེ་ཚད་དང་ལྡན་པར་བཟོ་སྐྲུན་གནང་ཡོད་པར་མ་ཟད།

  ནང་རྟེན་འདག་སྐུ་རྣམས་ལ་གཟུངས་གཞུག་ཚད་ལྡན་ཕུལ་ཡོད་པ་སྨོས་མེད་ཐོག གཞལ་ཡས་ཁང་གི་རྩིག་པའི་གསེབ་ཏུ་ཆོས་རྗེ་ཡིད་བཞིན་ནོར་བུ་སྐུ་དངོས་ཀྱི་ཕྱག་ནས་བྱུང་བའི་ལི་མ་དང་གཏེར་མ་ཡིན་ངེས་པའི་གསེར་སྐུ་བརྒྱ་རྩ་གཅིག་ཙམ་དང་། སྒྲོམ་བུ་ཆེ་ཆུང་དུ་མ་དང་། དམ་རྫས་ཀྱི་རིགས་མང་པོ་བཅས་གཏེར་དུ་སྦས་པར་བསྩལ་ཅིང་།

  དུས་ཕྱིས་ལོ་གཉིས་ཙམ་ཐལ་རྗེས་དཀྱིལ་འཁོར་གྱི་འོག་གཞིའི་མཐའ་སྐོར་དུ་ལྷ་ཁང་ཉེར་གསུམ་ཙམ་བསྐྲུན་པའི་ནང་དུ་རིས་སུ་མ་ཆད་པའི་ཆོས་བརྒྱུད་རྣམས་ཀྱི་རྩ་གསུམ་སྲུང་མ་དང་བཅས་པའི་སྐུ་རྟེན་མང་པོ་ཞིག་ཀྱང་དད་ལྡན་རྣམས་ཀྱི་ཚོགས་གསོག་སྒྲིབ་སྦྱོང་དང་ཕྱག་མཆོད་སྨོན་ལམ་གྱི་རྟེན་དམ་པར་བཞུགས་སུ་གསོལ་ཡོད་དོ། །

 སྒྱུ་འཕྲུལ་དྲྭ་བའི་བློས་བསླངས་ཀྱི་དཀྱིལ་འཁོར་འདི་ཉིད་བཞེངས་གྲུབ་པའི་རྗེས་སུ་ཆོས་ཀྱི་རྗེ་ཉིད་སྐུ་དངོས་ཆེད་ཕེབས་ཀྱིས་རྡོ་རྗེ་སློབ་དཔོན་གྱི་བྱ་བ་རྣམས་མཛད་དེ་རབ་ཏུ་གནས་པའི་མེ་ཏོག་འཐོར་ཅིང་། རྟེན་བརྟེན་པ་དང་བཅས་པ་སྐྱེ་དགུ་རྣམས་ཀྱི་ཚོགས་གསོག་སྒྲིབ་སྦྱོང་གི་ཞིང་ས་བླ་ན་མེད་པ་ཞིག་ཏུ་འགྱུར་བའི་ཐུགས་སྨོན་བཟང་པོས་རྒྱས་བཏབ་སྟེ། ཞལ་བསྲོའི་རིམ་པའང་གཟབ་ལ་རྒྱས་པར་གནང་ངོ་། དུས་དེ་ནས་བཟུང་མཐོང་གྲོལ་དཀྱིལ་འཁོར་ཆེན་པོ་འདིའི་ཕྲིན་ལས་ཀྱི་སྒོ་འཕར་ཡངས་པོར་ཕྱེ་ནས་ཕྱག་སྐོར་མཆོད་པ་སོགས་ལ་བརྩོན་པའི་རྒྱ་བོད་ཧོར་གསུམ་གྱི་མི་ཚོགས་དབྱར་གྱི་སྤྲིན་ཕུང་འཐིབས་པ་བཞིན་ཟམ་མ་ཆད་པར་འདུས་ནས་ཉི་མ་རེ་བཞིན་དད་ལྡན་བརྒྱ་སྟོང་མང་པོས་སྒོ་གསུམ་སོས་དལ་དུ་མི་སྡོད་པར་རྣམ་དཀར་དགེ་བའི་ལས་ལ་ཆིག་སྒྲིལ་དུ་བརྩོན་བཞིན་ཡོད་པ་དེང་སང་ཡང་ཚང་མས་མངོན་སུམ་དུ་བལྟར་ཡོད་པ་འདི་ཡིན་ནོ།  །

    ལར་དམ་པ་རྣམས་ཀྱི་ཐུགས་བསྐྱེད་སྨོན་ལམ་གྱི་མཐུ་ཞེས་པ་ནི་བསམ་གྱིས་མི་ཁྱབ་པ་ཞིག་སྟེ། དུས་ཡུན་ཐུང་ངུ་ཞིག་གི་རིང་ལ་སྒྲོན་མེའི་མེ་ལྕེ་གཅིག་ལས་དུ་མར་མཆེད་པའི་ཚུལ་གྱིས་ཀཿ རྫོགས་ཞེ་ཆེན་སོགས་རྙིང་མའི་གདན་ས་ཆེ་ཁག་རྣམས་སུ་འདི་དང་འདྲ་བའི་སྒྱུ་འཕྲུལ་གྱི་བློས་བསླངས་དཀྱིལ་འཁོར་ཆེ་ལེགས་ཚད་ལྡན་རེ་བཞེངས་སྐྲུན་བགྱིས་འདུག་ལ། དེར་མ་ཟད་མགོ་ལོག་ཤར་འཇིགས་མེད་ཕྲིན་ལས་དར་རྒྱས་གླིང་དང་། དྷཱིཿ མདའ་དགོན། ལུང་སྔོན་དགོན་རྣམས་དང་། སྡེ་དགེ་ཡིད་ལྷུང་གི་བཀྲ་ཤིས་ཁྲི་གླིང་དང་རྩ་ཤུལ་དགོན། ཉག་རོང་གི་ཡོན་ཏན་འབྱུང་ཁུངས་དགོན། བལ་ཡུལ་ཡང་ལེ་ཤོད་ཀྱི་སྒྲུབ་སྡེ་བསམ་གཏན་འོད་གསལ་ཆོས་གླིང་སོགས་སུའང་སྒྱུ་འཕྲུལ་གྱི་དཀྱིལ་འཁོར་རྔམ་ལ་གཟི་འོད་དང་ལྡན་པ་ཆོས་སྡེ་གང་ཡིན་པ་དེ་དང་དེའི་རྒྱན་ལྟ་བུར་གྱུར་པ་རེ་བཟོ་བཞེངས་གནང་ཟིན་འདུག་གོ། །

   ད་དུང་དགོན་སྡེ་དང་ཡུལ་ཁམས་མང་པོ་ཞིག་ཏུ་དཀྱིལ་འཁོར་འདི་རིགས་ཀྱི་ལས་བཟོའི་འཆར་འགོད་ཀྱི་རི་མོ་དང་འོག་གཞིའི་རྩིག་པ་སོགས་བཟོ་སྐྲུན་བྱེད་བཞིན་པའི་སྐབས་སུ་ཡོད་ཅིང་། མ་འོངས་པ་ན་དེ་དག་ལས་ཀྱང་ལྡབ་དུ་མས་མང་བའི་སྒྱུ་འཕྲུལ་དྲྭ་བའི་བློས་བསླངས་ཀྱི་དཀྱིལ་འཁོར་རྒྱུ་སྤུས་དང་བཀོད་པ་ཁྱད་པར་དུ་འཕགས་པ་དུ་མ་ཞིག་འཛམ་གླིང་ཡུལ་གྲུ་གང་སར་བཞེངས་སྐྲུན་གནང་འོང་བའི་ཚོད་དཔོག་བྱེད་ཀྱིན་ཡོད་དོ།།

རྗེ་བཙུན་མ་མུ་མེད་ཡེ་ཤེས་མཚོ་མོའི་རྣམ་པར་ཐར་པ་པདྨ་དཀར་པོའི་ཆུན་པོ་ལས་བཏུས།

སྒྱུ་འཕྲུལ་མཐོང་གྲོལ་ཆེན་མོའི་སྐོར་ཚད་ཆེ་ཆུང་དང་ཕན་ཡོན།

བློས་བསླངས་དཀྱིལ་འཁོར་ཆེན་མོ་འདིའི་སྐོར་ཚད་ཆེ་ཆུང་གི་རྣམ་གཞག་ནི། 

སྐོར་ཞིག་ཆོས་ཀྱི་རྗེ་ཉིད་ཀྱིས་བསྐྱེད་རིམ་ཟིན་བྲིས་གསུང་སྐབས་ཀྱི་འཕྲོས་བཤད་ལས། སྐོར་ཚད་ལ་རྣམ་གྲངས་བཞི་སྟེ། ཆུང་བ་ལ་སྐོར་བ་གྲངས་བརྒྱ། འབྲིང་བ་ལ་སྐོར་བ་གྲངས་སྟོང་། ཆེ་བ་ལ་སྐོར་བ་གྲངས་ཁྲི། ཆེས་ཆེ་བ་ལ་སྐོར་བ་གྲངས་འབུམ་དུ་ལོངས་པ་དགོས་ལ། སོ་སོའི་ཕན་ཡོན་ནི། སྐོར་ཚད་ཆུང་བས་ངན་འགྲོའི་སྒོ་ཁེགས་ཤིང་མཐོ་རིས་ཀྱི་གོ་འཕང་ཐོབ་པ་དང་། འབྲིང་བས་ཁམས་གསུམ་འཁོར་བའི་གནས་ལས་གྲོལ་ཏེ་ཐར་པའི་གོ་འཕང་ཐོབ་པ་དང་། ཆེ་བས་བདེ་བ་ཅན་ལ་སོགས་པའི་དག་པའི་ཞིང་དུ་བྱུང་ཆུབ་སེམས་དཔའི་གོ་འཕང་ཐོབ་པ་དང་། ཆེས་ཆེ་བས་ནི་མྱུར་བ་ཉིད་དུ་རྫོགས་པའི་སངས་རྒྱས་ཀྱི་གོ་འཕང་བླ་ན་མེད་པ་འཐོབ་པར་འགྱུར་རོ།། ཞེས་དང་། སྐོར་ཚད་ཆེ་ཆུང་གང་ཡིན་ཡང་། ཕྱག་དང་ཡིག་བརྒྱ་གཉིས་དང་སྦྲེལ་ནས་བྱེད་དགོས་ཏེ། དཔེར་ན་སྐོར་བ་བརྒྱ་བྱེད་པའི་དབང་དུ་ན། ཕྱག་བརྒྱ་འཚལ་བ་དང་། ཡི་གེ་བརྒྱ་པ་བརྒྱ་འདོན་དགོས་པ་སོགས་གཞན་ལའང་འགྲེའོ་ཞེས་གསུངས་སོ།།

བི་ཤཱའི་འདུ་བྱེད་པིར་གྱིས་བྲིས་འདྲ་ངོ་མཚར་བཀོད་པའི་གཟུགས་བརྙན་བཀྲ།།

བརྡ་དོན་རྟགས་ཀྱི་ཁྱད་ཆོས་ཡོངས་རྫོགས་དྲང་དོན་རྟགས་ཀྱི་དཀྱིལ་འཁོར་ཚུལ།།

ལྷར་བཅས་འགྲོ་བའི་ཕྱག་མཆོད་ཡུལ་གྱུར་མཐོང་གྲོལ་དཔལ་གྱི་མཆོད་སྡོང་གང༌།།

ཁྱེད་ཀྱི་མ་སྨད་ཐུགས་བསྐྱེད་འཕྲུལ་གྱིས་སྐྱེ་དགུའི་ལེགས་བྱས་ཞིང་དུ་བསྐྲུན།།

སྒྱུ་འཕྲུལ་མཐོང་གྲོལ་ཆེན་མོའི་སྐོར་ཚད་དང་ཕན་ཡོན་འདི་ནི་ཆོས་རྗེ་དམ་པ་ཡིད་བཞིན་ནོར་བུའི་རྣམ་ཐར་རྒྱས་པ་ལས་བཏུས།

བླ་རུང་སྒྱུ་འཕྲུལ་མཐོང་གྲོལ་ཆེན་མོའི་བསྐོར་བའི་ཕན་ཡོན།

༧ཆོས་རྗེ་དམ་པ་འཇིགས་མེད་ཕུན་ཚོགས་དཔལ་བཟང་པོས་གསུངས།

 སྒྱུ་འཕྲུལ་བློ་བསླངས་འདི་ནི་རིག་འཛིན་རྒྱལ་བའི་གོ་འཕང་འཐོབ་པར་བྱེད་པའི་ཐབས་ཁྱད་པར་ཞིག་ཡིན་ལ། ནང་རྟེན་ཡང་ཕུན་སུམ་ཚོགས་པ་ཡོད། འདི་འདྲའི་རྟེན་བཞེངས་དེ་འཇིག་རྟེན་ན་ཧ་ཅང་དཀོན་མོ་རེད། དཀྱིལ་འཁོར་མཐོང་བ་ཙམ་གྱིས་ན་རཀ་ཆེན་པོར་མི་ལྟུང་ཞེས་དྲི་མེད་བཤགས་རྒྱུད་ནང་དུ་གསུངས་འདུག འདི་ལན་གཅིག་མཐོང་ན་ཡང་ངེས་པར་དུ་རྡོ་རྗེ་དམྱལ་བ་ལ་སོགས་པའི་གནས་སུ་སྐྱེ་མི་དགོས་ཏེ། 

གང་ཞིག་སྒྱུ་འཕྲུལ་ཞི་ཁྲོ་ཡི། །

དཀྱིལ་འཁོར་ལྷ་ལ་ཕྱག་འཚལ་ན། །

ཉམས་ཆགས་མ་ལུས་ཀུན་བྱང་ནས། །

མཚམས་མེད་ལྔ་ཡི་སྡིག་པ་འདག །

ན་རཀ་གནས་ཀྱང་དོང་སྤྲུགས་ཏེ། །

རིག་འཛིན་རྒྱལ་བའི་ཞིང་དུ་གྲགས། །

   ཞེས་གསུངས། དེས་ན་ཞི་བ་བཞི་བཅུ་རྩ་གཉིས་ཀྱི་མཚན་ནས་རེ་རེ་བཞིན་དུ་བརྗོད་ནས་ཕྱག་བརྒྱ་ཐམ་པ་འཚལ་ཐུབ་ན་ངེས་པར་དུ་མཚམས་མེད་ལྔ་ཡི་སྡིག་པ་འདག་གསུངས་པ་རེད།

ན་རཀ་གནས་ཀྱང་དོང་སྤྲུགས་ཏེ། །

  ཞེས་གསུངས་ཡོད་པས་དམྱལ་བ་རུ་སྐྱེ་མི་དགོས་པ་རེད། སྐོར་ཚད་ལ་རྣམ་གྲངས་བཞི་སྟེ།ཆུང་སྐོར་ལ་གྲངས་བརྒྱ། འབྲིང་སྐོར་ལ་གྲངས་སྟོང༌། ཆེ་སྐོར་ལ་གྲངས་ཁྲི། ཆེས་ཆེ་སྐོར་ལ་གྲངས་འབུམ་དུ་ལོངས་བ་དགོས། སོ་སོའི་ཕན་ཡོན་ནི། སྐོར་ཚད་ཆུང་བས་ངན་འགྲོའི་སྒོ་ཁེགས་ཤིང་མཐོ་རིས་ཀྱི་གོ་འཕང་འཐོབ་པ་དང་།

   འབྲིང་གིས་ཁམས་གསུམ་འཁོར་བའི་གནས་ལས་གྲོལ་ཏེ་ཐར་པའི་གོ་འཕང་འཐོབ་པ་དང་། ཆེ་བས་བདེ་བ་ཅན་ལ་སོགས་པའི་དག་པའི་ཞིང་དུ་བྱང་ཆུབ་སེམས་དཔའི་གོ་འཕང་འཐོབ་པ་དང་། ཆེས་ཆེ་བས་ནི་མྱུར་བ་ཉིད་དུ་རྫོགས་པའི་སངས་རྒྱས་ཀྱི་གོ་འཕང་བླ་ན་མེད་པ་འཐོབ་པར་འགྱུར། སྐོར་ཚད་ཆེ་ཆུང་གང་ཡིན་ཡང་། ཕྱག་དང་ཡིག་བརྒྱ་གཉིས་དང་སྦྲེལ་ནས་བྱེད་དགོས་ཏེ། དཔེར་ན་སྐོར་བ་བརྒྱ་བྱེད་པའི་དབང་དུ་བཏང་ན། ཕྱག་བརྒྱ་འཚལ་བ་དང་།

     ཡི་གེ་བརྒྱ་པ་བརྒྱ་འདོན་དགོས་པ་སོགས་རིགས་འགྲེ། འདི་ལྟ་བུའི་ཕན་ཡོན་ཆེ་བ་དང་བྱིན་རླབས་ཆེ་བ་དངོས་གྲུབ་མྱུར་བ་ཞིག་ཧ་ཅང་དཀོན་པོ་རེད། ང་ཚོ་ཚང་མས་རྒྱུན་དུ་ཕྱག་འཚལ་མཆོད་འབུལ་སོགས་གང་ཐུབ་ཅི་ཐུབ་བྱེད་དགོས།

༼དྲན་ངོགས་ཀྱི་གསེར་བྱ༽ལས་ཚན་བཤུས་བྱས་ཏེ་སྤེལ་བ་དགེ་ལེགས་འཕེལ།