བོད་ཟས་དང་འབྲེལ་བའི་གསུང་བཤད་གསར་པ། མཁན་ཆེན་ཚུལ་ཁྲིམས་བློ་གྲོས།

མཁན་པོ་ཚུལ་ཁྲིམས་བློ་གྲོས་ཀྱིས་ཤིས་ཚིག་དང་སྦྲགས།

བོད་ཟས་དང་འབྲེལ་བའི་གསུང་བཤད་གསུམ་སྟེ། 

རིག་གནས་དང་བདེ་ཐང་། 

དཔལ་འབྱོར་གསུམ་དང་འབྲེལ་ནས་རེ་བ་དང་དགོངས་འཆར་གནང་།

ཉིན་དང་པོའི་སྔ་དྲོ། 

སྤྱི་ལོ་༢༠༢༤ལོའི་ཟླ་བ་༤པའི་ཚེས་༢༧ཉིན་གྱི་ཞོགས་པ་ཆུ་ཚོད་དགུ་པའི་སྟེང་ཚོགས་འདུ་གཙོ་སྐྱོང་པས་ཕྱོགས་སོ་སོ་ནས་ཕེབས་པའི་སྐུ་མགྲོན་ཚོར་མཚམས་འདྲི་དང་འབྲེལ། ཚོགས་འདུའི་དམིགས་ཡུལ་དང་ངོ་སྤྲོད་རོབ་ཙམ་ཞུས་ནས། དུས་རིམ་དང་པོར། མཁན་པོ་ཚུལ་ཁྲིམས་བློ་གྲོས་ཀྱིས་ཤིས་ཚིག་དང་སྦྲགས། བོད་ཟས་དང་འབྲེལ་བའི་གསུང་བཤད་གསུམ་སྟེ། རིག་གནས་དང་བདེ་ཐང་། དཔལ་འབྱོར་གསུམ་དང་འབྲེལ་ནས་རེ་བ་དང་དགོངས་འཆར་གནང་། གསུང་བཤད་ཟིན་བྲིས་ཟུར་ན་ཡོད།

 གཉིས་པ། ཨ་རིགས་བོད་ཟས་ཁང་གི་སྦྱིན་བདག་སྐྱེས་མ་ཨ་རིགས་ལགས་ཀྱིས་སྐར་མ་ཉི་ཤུའི་རིང་རེ་བ་དང་འབྲེལ་སོ་སོའི་ཉམས་མྱོང་མཉམ་སྤྱོད་གནང་། གསུམ་པ། ཕྱོགས་སོ་སོ་ནས་ཕེབས་པའི་ཟ་ཁང་ཆེད་གཉེར་པ་ཚོས་སོ་སོའི་ཟ་ཁང་གི་ཁྱད་ཆོས་ལྡན་པའི་ཟས་རིགས་མི་ཉུང་བ་རེ་ངོ་སྤྲོད་ཞུས་ཤིང་། ཆུ་ཚོད་བཅུ་གཉིས་སྟེང་ནས་ཉིན་གུང་གི་ཞལ་ལག་བཞེས་ཏེ་ངལ་གསོས།

ཕྱི་དྲོའི་དུས་རིམ།

  ཉིན་གུང་ཆུ་ཚོད་དང་པོ་དང་ཕྱེད་ཀའི་སྟེང་རྒན་ཀརྨ་བདེ་ལེགས་ཀྱིས་གཙོ་འགན་གནང་སྟེ། ཀ་པ་དང་ཁ་པ། ག་པ་གསུམ་སྟེ། ཚོགས་མི་རྣམས་ཚོགས་ཁག་གསུམ་ལ་བགོས་ཤིང་། ཚོགས་ཁག་རེ་རེས་ཚོགས་གཙོ་དང་དྲུང་ཡིག་རེ་བདམས་ནས། ཚོགས་ཁག་སོ་སོའི་ཚོགས་མི་རྣམས་ཀྱིས་ཟ་ཁང་གཉེར་བའི་རྒྱུད་རིམ་ནང་། འཕྲད་ཀྱིན་པའི་དཀའ་ངལ་ཆེ་རིགས་རྣམས་ཉམས་མྱོང་དང་ལྡན་པའི་སྒོ་ནས་བཤད་དེ། དཀའ་ངལ་དང་བསམ་ཚུལ་མི་འདྲ་བ་རྣམས་བསྡུ་རུག་བཟོས་ཤིང་། ཚོགས་ཁག་གསུམ་གྱི་ཚོགས་གཙོས་འགྲེལ་བཤད་དང་བཅས་མཉམ་སྤྱོད་གནང་། དེར་རྒན་ཀརྨ་བདེ་ལེགས་ཀྱིས་མཇུག་བསྡོམས་གནང་། དེ་ལྟར་ཚོགས་ཁག་སོ་སོས་དཀའ་ངལ་དང་བསམ་ཚུལ་བཤད་དེ། གཅིག་མཐུན་རང་བཞིན་ཅན་གྱི་དཀའ་ངལ་དང་བསམ་ཚུལ་བདམ་ཐོན་མ་བྱུང་བར་དུ། གྲོས་འཆར་དང་འདེམས་ཤོག་འཕངས། 

ཉིན་གཉིས་པ།

  སྤྱི་ལོ་༢༠༢༤ལོའི་ཟླ་བ་༤པའི་ཚེས་༢༨ཉིན་གྱི་ཞོགས་པ་ཆུ་ཚོད་དགུ་པའི་སྟེང་ནས་དངོས་སུ་འཚོགས་ཏེ། ཞོགས་པ་ཆུ་ཚོད་བཅུ་གཅིག་གི་བར་དུ་ཁ་རྩང་གི་མཇུག་ནས་མུ་མཐུད་དེ་རྒན་ཀརྨ་བདེ་ལེགས་ཀྱིས་གཙོ་ཁྲིད་གནང་སྣེ། གཅིག་མཐུན་བྱུང་བའི་བསམ་ཚུལ་དང་དཀའ་ངལ་རྣམས་སེལ་ཐུབ་པའི་ཐབས་ལམ་གྱི་ཐད་ནས་ཚོགས་ཁག་སོ་སོས་ཞིབ་གྲོས་གནང་སྟེ། ཉིན་གུང་གི་ཞལ་ལག་བཞེས།  

ཕྱི་དྲོའི་དུས་རིམ།

ཉིན་གུང་ཆུ་ཚོད་དང་པོ་དང་ཕྱེད་ཀའི་སྟེང་། སླར་ཡང་ཟ་ཁང་སོ་སོར་འཕྲད་ཀྱིན་པའི་དཀའ་ངལ་ཆེ་རིགས་རྣམས་ངོས་བཟུང་བའི་ཐོག་ནས། དེ་དག་སེལ་ཐབས་དང་ལག་ལེན་དངོས་ལ་ཇི་ལྟར་འཇུག་དགོས་མིན་གྱི་ཐད་ནས་སྔར་བཞིན་ཚོ་ཁག་སོ་སོས་གྲོས་བསྡུར་གནང་སྟེ། དཀའ་ངལ་སེལ་ཐབས་ཀྱི་ལག་ལེན་དངོས་ཀྱི་ཐད་ནས་ཞིབ་གྲོས་གནང་། 

ཉིན་གསུམ་པ།

  སྤྱི་ལོ་༢༠༢༤ལོའི་ཟླ་བ་༤པའི་ཚེས་༢༩ཉིན་གྱི་ཞོགས་པ་ཆུ་ཚོད་དགུ་པའི་སྟེང་འཚོགས་ཏེ། ཁ་རྩང་གི་གྲོས་འཆར་ལ་ཡང་བསྐྱར་རྒན་ཀརྨ་བདེ་ལེགས་དགོངས་འཆར་གནང་ཞིང་། ཚོ་ཁག་སོ་སོས་ཡང་ནས་ཞིབ་ཚགས་ཀྱིས་ཞིབ་གྲོས་གནང་། རྒན་ཀརྨ་བདེ་ལེགས་ཀྱིས་བོད་ཟས་དེང་རབས་ཅན་གྱི་བསླབ་དེབ་བསྒྲིག་རྒྱུའི་ཐད་"བོད་ཟས་གཅིག་གྱུར་གྱི་བསླབ་དེབ་བསྒྲིག་ཐབས"ཞེས་དོན་ཚན་གཉིས་ཀྱི་སྟེང་ནས་དགོངས་འཆར་གནང་། མཇུག་ནས་རྒན་ཀརྨ་བདེ་ལེགས་ཀྱིས་དེང་རབས་ཅན་གྱི་བོད་ཟས་ཀྱི་བསླབ་དེབ་བསྒྲིག་རྒྱུར། ཟ་ཁང་སོ་སོས་དེང་རབས་ཅན་གྱི་བོད་ཟས་གཅིག་ནས་བཅུའི་བར་བསྡུ་རུག་བྱེད་ཐུབ་མིན་གྱི་དྲི་བ་བཀོད་པར། དང་ལེན་གྱི་མི་སྣ་བཅུ་ཐམ་པ་བྱུང་ཞིང་ཚོགས་པ་བཙུགས། ཚོགས་མི་རང་གི་ས་ནས་ཚོགས་གཙོ་དང་ལས་རིགས་མི་འདྲ་བ་དག་སུས་བྱེད་མིན་གྱི་ཚོགས་མི་རང་རང་གི་ས་ནས་གྲོས་བསྡུར་བྱས་ཤིང་། བོད་ཀྱི་བཟའ་བཏུང་གི་རིག་གནས་དང་ཞབས་ཞུ། དོ་དམ་སོགས་ཟབ་སྦྱོང་བྱེད་སའི་སློབ་གྲྭ་དང་ཟབ་སྦྱོང་ལྟེ་གནས་འཛུགས་མཁན་གྱི་མི་སྣ་དང་ཚོགས་པ་བྱུང་བ། 

ཕྱི་དྲོའི་དུས་རིམ།

  དུས་རིམ་དང་པོར་རྒན་ཀརྨ་བདེ་ལེགས་ཀྱིས་ཚོགས་མི་ཡོངས་ལ་ཐུན་མོང་གིས་"བདེ་ཐང་ཅན་གྱི་བཟའ་བཏུང་གཡོས་སྦྱོར་བྱེད་ཅིང་ཁྱབ་བསྒྲག་བྱེད་པ་"ཞེས་པའི་དོན་ཚན་འདིའི་སྟེང་ནས་ཚོགས་ཁག་སོ་སོར་གྲོས་འཆར་གནང་དུ་བཅུག 

  དུས་རིམ་གཉིས་པ། དཔག་བསམ་གྱིས་རྒྱ་སྐད་ཀྱི་ལམ་ནས་ད་ཐེངས་ཉིན་གསུམ་གྱི་རིང་ལ་བགྲོ་གླེང་ཚོགས་འདུའི་གྲོས་ཆོད་བྱུང་བ་རྣམས་ངོ་སྤྲོད་བྱས། 

  དུས་རིམ་གསུམ་པ། རྒན་ཀརྨ་བདེ་ལེགས་ཀྱིས་ད་རེབ་ཚོགས་འདུ་འདིའི་སྐབས་སུ་བྱུང་བའི་གནད་དོན་དང་འབྲེལ་བའི་གསུང་བཤད་གནང་།

  དུས་རིམ་བཞི་པ། ཚོགས་མི་སོ་སོས་དགོངས་འཆར་གནང་། 

  དུས་རིམ་ལྔ་པ། མཇུག་མཐར་མཁན་པོ་ཚུལ་ཁྲིམས་བློ་གྲོས་ཀྱིས་ཐེངས་འདིའི་བགྲོ་གླེང་ནང་དོན་ལ་དཔྱད་བརྗོད་གནང་སྟེ་ཚོགས་འདུའི་མཇུག་བསྒྲིལ་བའོ། །