འདི་ལོ་ནི་སྣ་དཀར་རྩེ་རྫོང་སློབ་འབྲིང་བཙུགས་ནས་ལོ་ངོ་ལྔ་བཅུ་འཁོར་བའི་དམིགས་བསལ་གྱི་དྲན་གསོའི་ལོ་ཞིག་དང་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་གཏན་འཁེལ་བྱས་ནས་ལོ་བརྒྱད་འཁོར་བའི་དུས་བཟང་ཞིག་ཀྱང་ཡིན། མཚམས་འདིར་ངེད་སློབ་འབྲིང་བོད་ཡིག་སློབ་དཔྱོད་ཁང་དང་བོད་ཡིག་བློ་མོས་ཁང་གཉིས་ནས་མཉམ་གཉེར་བྱས་པའི་དགེ་སློབ་ཀྱི་བོད་ཡིག་ཡིག་གཟུགས་དུས་ཆེན་བསུ་བའི་བྱེད་སྒོ་དེ་སྤྱི་ཟླ ༤པའི་ཚེས ༣༠ཉིན་གྱི་སྔ་དྲོའི་ཚོགས་ཐུན་གསུམ་པ་དང་བཞི་པར་རང་སློབ་གྲྭའི་ལག་རྩེད་སྤོ་ལོའི་ཁང་དུ་གཟབ་རྒྱས་ངང་སྤེལ་ཡོད།
བྱེད་སྒོ་དེ་ནི་བོད་ཀྱི་བཟོ་རིག་པའི་ཁོངས་སུ་གཏོགས་པའི་ཡིག་གཟུགས་སྒྱུ་རྩལ་རིག་གནས་དེ་སྔར་བས་རྒྱུན་འཛིན་དང་དར་སྤེལ་བཏང་ནས་སློབ་མས་ཡིག་གཟུགས་ལ་ཚད་མཐོའི་མཐོང་ཆེན་དང་ཁྱད་པར་དུ་ལག་ལེན་དངོས་ཀྱི་འབྲི་སྦྱོང་དང་ཡང་དག་པའི་ཡིག་གཟུགས་འབྲི་བའི་གོམས་གཤིས་གསོ་སྐྱོང་བྱས་ནས་ཚད་དང་མཐུན་པ། གྲལ་འགྲིག་པ། མཛེས་ཤིང་ལྟ་བས་མི་ངོམས་པའི་གཟུགས་རིས་དེ་སྐྱེ་བོའི་སྤྱན་གྱི་གཟིགས་མོར་བཤམས་ཐུབ་ཆེད་དུ་ཡིན་ལ་སློབ་གྲྭའི་རིག་གནས་འཚོ་བ་གོང་འཕེལ་དང་སློབ་མའི་པིར་རྩལ་ནུས་པ་ཡར་ཐོན་ཡོང་བ་ཞིག་ཀྱང་ཡིན། དེ་བས་བོད་ཀྱི་སྲོལ་རྒྱུན་རིག་གནས་སྒྱུ་རྩལ་མ་ཉམས་གོང་འཕེལ་དང་ཉམས་པ་སླར་གསོ། དགེ་སློབ་རྣམས་པའི་ཡིག་གཟུགས་སྔར་བས་ཡག་ཐོག་ཡག་བརྩེགས་ཡོང་སླད་དུ་སྤེལ་བ་ཞིག་ཡིན།ཐེངས་འདིའི་བོད་ཡིག་ཡིག་གཟུགས་ཀྱི་དུས་ཆེན་བསུ་བའི་བྱེད་སྒོའི་ནང་ཁྱོན་དགེ་སློབ་གྲངས ༡༨༠༠ལྷག་ཙམ་བཞུགས་ཡོད་པ་དང་། སློབ་སྤྱི་སྐུ་གཞོན་ཡོན་ཏན་ཚེ་རིང་མཆོག་ནས་ཐེངས་འདིའི་བྱེད་སྒོའི་གཙོ་སྐྱོང་གནང་ཡོད།
བྱེད་སྒོའི་གོ་རིམ་དང་པོ་སློབ་སྤྱི་ཟླ་ཚེ་ལགས་ནས་ཐེངས་འདིའི་བྱེད་སྒོའི་གལ་ཆེའི་རང་བཞིན་སྐོར་ལ་གསུང་བཤད་གནང་བ་དང་སྦྲགས་སླད་ཕྱིན་དགེ་སློབ་ཡོངས་ཀྱིས་བོད་ཡིག་ཡིག་གཟུགས་ལ་མཐོང་ཆེན་དང་དགའ་ཞེན་བྱེད་དགོས་པའི་རེ་བ་ཡང་བཏོན་གནང་ཡོད།
བྱེད་སྒོའི་གོ་རིམ་གཉིས་པ་བོད་རང་སྐྱོང་ལྗོངས་ཡིག་གཟུགས་མཐུན་ཚོགས་ཀྱི་ཚོགས་མི་དང་། ངེད་སློབ་གྲྭའི་བོད་སྐད་ཡིག་བློ་མོས་ཁང་གི་འགན་ཁུར་བ་རྒན་འབྲུག་རྒྱས་བསྟན་འཛིན་ལགས་ནས་ཡིག་གཟུགས་སྦྱོང་བའི་གལ་ཆེའི་རང་བཞིན་དང་ཚུལ་ཇི་ལྟར་བྱས་ནས་སྦྱངས་ན་ལེགས་པའི་སྐོར་ལ་སྨྱན་ཆས་སློབ་ཁྲིད་ཀྱི་སྒྲིག་ཆས་བརྒྱུད་དེ་འཆད་ཁྲིད་གནང་ཡོད།དེ་ཡང་ཡི་གེ་ནི་མི་རིགས་ཤིག་གི་སྐད་ཀྱི་མཚོན་བྱ་ཞིག་ཡིན་པ་མ་ཟད། མི་རིགས་དེའི་བླ་སྲོག་ཀྱང་ཡིན། གལ་ཏེ་མི་རིགས་ཤིག་ལ་རང་མི་རིགས་ཀྱི་ཡི་གེ་མེད་ཚེ་མི་རིགས་དེ་ཉམས་རྒུད་དུ་འགྲོ་སླ་བ་ཞིག་ཡིན།ཡི་གེ་གང་དང་གང་ཞིག་ཡིན་ཡང་དེ་ཉིད་ཁོང་དུ་ཆུད་དགོས་ན།ཐོག་མར་འབྲི་ཀློག་ནས་འགོ་འཛུགས་དགོས་ལ་དེ་བས་ཡིག་གཟུགས་ཚད་ལྡན་ཞིག་འབྲི་རྒྱུ་ནི་ཡི་གེ་གང་དེ་སློབ་པའི་རྩ་བའི་རྨང་གཞི་ལྟ་བུ་ཆགས་ཡོད་ཅེས་བཤད་ཁྲིད་གནང་བ་མ་ཟད་ཁོང་གིས་ལག་ལེན་དངོས་ཀྱི་ཐོག་ནས་ཐིག་འདེབས་སྟངས་དང་སྨྱུ་གུ་འཛིན་སྟངས། སུག་འབྲི་བྱེད་སྟངས་སོགས་བརྙན་ཐུང་བརྒྱུད་དེ་དཔེ་ཁྲིད་གནང་ཡོད།
བྱེད་སྒོའི་གོ་རིམ་གསུམ་པར་སྣ་རྩེ་སློབ་འབྲིང་གི་སྐབས་བརྒྱད་པའི་རྒྱལ་ཡོངས་བོད་ཡིག་ཡིག་གཟུགས་དུས་ཆེན་གྱི་བྱེད་སྒོའི་འགྲན་བསྡུར་ཁྲོད་བྱ་དགའ་ཐོབ་པའི་དགེ་རྒན་གྱི་ཕུལ་བྱུང་བརྩམས་བྱ༡༣དང་སློབ་མའི་ཕུལ་བྱུང་གི་བརྩམས་བྱ༣༣ ལ་གཟེངས་བསྟོད་གནང་བ་དང་དུས་མཚུངས་དྲན་བརྟེན་གྱི་འདྲ་པར་ཡང་བླངས་ཡོད།
བྱེད་སྒོའི་གོ་རིམ་བཞི་པར་ཐེངས་འདིའི་དགེ་སློབ་ཀྱི་ཕུལ་བྱུང་བརྩམས་བྱ་ཁག་འགྲེམས་སྟོན་དང་དགེ་སློབ་ཀུན་གྱིས་དགྱེས་གཟིགས་གནང་བ་དང་སྦྲགས་བྱེད་སྒོ་མཇུག་སྒྲིལ་ཡོད།
扫码关注我们
编辑：索朗次仁 米玛次仁
文字：罗布扎西
审核：米玛洛追
