བྱང་ཆུབ་སེམས་སྐྱེ་དོན་གཉིས་མཐར་ཕྱིན་ཤོག
བྱང་ཆུབ་སེམས་དཔའི་རྩ་ལྟུང་བཅོ་བརྒྱད་ནི་བསླབ་བཏུས་ལས།
༼༡དཀོན་མཆོག་གསུམ་གྱི་དཀོར་འཕྲོག་པ།
ཕས་ཕམ་པ་ཡི་ལྟུང་བར་འདོད།།
༼༢དམ་པའི་ཆོས་ནི་སྤོང་བྱེད་པ།།
གཉིས་པར་ཐུབ་པས་གསུང་བ་ཡིན།།
༼༣ཚུལ་ཁྲིམས་འཆལ་བའི་དགེ་སློང་ལ།།
ངུར་སྨིག་འཕྲོག་དང་བརྡེག་པ་དང་།།
སྲོག་དང་འབྲལ་བྱེད་གསུམ་པ་ཡིན།།
༼༤མཚམས་མེད་ལྔ་པོ་བྱེད་པ་དང་། །
༼༥ལོག་པར་ལྟ་བ་འཛིན་པ་དང་།།
༼༦.༧.༨.༩.༡༠གྲོང་ལ་སོགས་པར་འཇིག་པ་ཡང་།།
རྩ་བའི་ལྟུང་བ་ཐུབ་པས་གསུངས།།
༼༡༡བློ་སྦྱང་མ་བྱས་སེམས་ཅན་ལ།།
སྟོང་པ་ཉིད་ནི་བརྗོད་པ་དང་།།
༼༡༢སངས་རྒྱས་ཉིད་ལ་ཞུགས་པ་རྣམས།།
རྫོགས་པའི་བྱང་ཆུབ་བཟློག་པ་དང་།།
༼༡༣སོ་སོར་ཐར་བ་ཡོངས་སྤངས་ནས།།
ཐེག་པ་ཆེ་ལ་སྦྱར་བ་དང་།།
༼༡༤སློབ་པའི་ཐེག་པས་ཆགས་ལ་སོགས།།
སྤོང་བར་འགྱུར་བ་མིན་ཞེས་འཛིན།།
ཕ་རོལ་དག་ཀྱང་འཛིན་འཇུག་དང་།།
༼༡༥རང་གི་ཡོན་ཏན་བརྗོད་པ་དང་། །
རྙེད་པ་དང་ནི་བཀུར་བསྟི་དང་།།
ཚིག་བཅད་རྒྱུ་ཡིས་གཞན་སྨོད་དང་།།
༼༡༦བདག་ནི་ཟབ་མོ་བཟོད་པའོ་ཞེས།།
ལོག་པ་ཉིད་ནི་སྨྲ་བ་དང་།།
༼༡༧དགེ་སྦྱོང་ཆད་པས་གཅོད་འཇུག་དང་།།
དཀོན་མཆོག་གསུམ་གྱི་སྦྱིན་བྱེད་དང་།།
སྦྱིན་པ་ལེན་པར་བྱེད་པ་དང་།།
༼༡༨ཞི་གནས་འདོར་བར་བྱེད་པ་དང་།།
ཡང་དག་འཇོག་གི་ལོངས་སྤྱོད་རྣམས། །
ཁ་ཏོན་བྱེད་ལ་སྦྱིན་པ་དང་།།
འདི་དག་རྩ་བའི་ལྟུང་བ་སྟེ།།
སེམས་ཅན་དམྱལ་བ་ཆེན་པོའི་རྒྱུ།།ཞེས་གསུངས་སོ།།
གཞུང་རྩ་བ་ནི།
ཐོག་མར་པགས་པའི་རིམ་པ་འདི།།
རང་གི་བློ་ཡིས་ཐ་དད་ཕྱེ།།
ཤ་ཡང་རུས་པའི་དྲ་བ་ལས།།
ཤེས་རབ་མཚོན་གྱིས་གུད་དུ་ཕྱེ།།
རུས་པ་རྣམས་ཀྱང་དབྱེ་བྱས་ནས།།
རྐང་གི་བར་དུ་བལྟ་བྱ་ཞིང་།།
འདི་ལ་སྙིང་པོ་ཅི་ཡོད་ཅེས།།
བདག་ཉིད་ཀྱིས་ནི་བརྟག་པར་གྱིས།།
དེ་ལྟར་འབད་དེ་བཙལ་ཀྱང་དེར།།
ཁྱོད་ཀྱིས་སྙིང་པོ་མ་མཐོང་ན།།
ད་དུང་ཅི་ཕྱིར་ཆགས་ཚུལ་གྱིས།།
ཁྱོད་ནི་ལུས་འདི་སྲུང་བར་བྱེད།།
ཁྱོད་ཀྱིས་མི་གཙང་བཟར་མི་རུང་།།
ཁྲག་ཀྱང་བཏུང་དུ་མི་རུང་ལ།།
རྒྱུ་ལྟོ་འང་གཞིབ་ཏུ་མི་རུང་ན།།
ལུས་ཀྱིས་ཁྱོད་ལ་ཅི་ཞིག་བྱ།།
ཉིས་ན་ཝ་དང་བྱ་རྒོད་ཀྱིས།།
ཟས་ཀྱི་དོན་དུ་འདི་བསྲུང་རིགས།།
མིའོ་ཅོག་གི་ལུས་འདི་ནི།།
བཀོལ་བར་བྱ་བ་ཉིད་དུ་ཟད།།
འདི་ལྟར་ཁྱོད་ཀྱིས་བསྲུངས་ཀྱང་ནི།།
འཆི་བདག་བརྩེ་བ་མེད་པ་ཡིས།།
ཕྲོགས་ཏེ་བྱ་དང་ཁྱིར་བྱིན་ན།།
དེ་ཚེ་ཁྱོད་ཀྱིས་ཅི་བྱར་ཡོད།།
བྲན་གཡོག་བཀོལ་དུ་མི་བཏུབ་ལའང་།།
གོས་ལ་སོགས་པ་མི་སྦྱིན་ན།།
ལུས་འདི་བསྙོད་ཀྱང་གཞན་འགྲོ་ན།།
ཁྱོད་ཀོ་ཅི་སྟེ་ཤ་ཐང་གསོ།།
འདི་ལ་གླ་རྔན་བྱིན་ནས་ནི།།
ད་ནི་རང་གི་དོན་བྱེད་ཆུག།
ཕན་པ་མེད་པར་འདི་ལ་ནི།།
ཐམས་ཅད་སྦྱིན་པར་མི་བྱའོ།།
འགྲོ་དང་འོང་བའི་རྟེན་ཙམ་དུ།།
ལུས་ལ་གྲུ་ཡི་བློ་བཞག་སྟེ།།
སེམས་ཅན་རྣམས་དོན་བསྒྲུབ་པའི་ཕྱིར།།
ཡིད་བཞིན་གྱི་ནི་ལུས་སུ་བསྒྱུར།།
དེ་ལྟར་རང་དབང་ཡོད་ཀྱིས་དེ།།
རྟག་ཏུ་འཛུམ་པའི་བཞིན་དུ་གྱིས།།
ཁྲོ་གཉེར་ངོ་ཟུམ་ཡོངས་ཐོང་སྟེ།།
འགྲོ་བའི་བཤེས་དང་གསོང་པོར་གྱིས།།
ཁྲི་ལ་སོགས་པ་བབ་ཅོལ་དུ།།
སྒྲ་དང་བཅས་པར་མི་དོར་རོ།།
སྒོ་ཡང་དྲག་ཏུ་མི་དབྱེ་སྟེ།།
རྟག་ཏུ་གཅོམ་བསྐྱུངས་དགའ་བར་བྱ།།
ཆུ་སྐྱར་བྱི་ལ་ཆོམ་རྐུན་དག།
སྒྲ་མེད་འཇབ་ཅིང་འགྲོ་བ་ཡིས།།
མངོན་པར་འདོད་པའི་དོན་སྒྲུབ་པ།།
ཐུབ་པས་རྟག་ཏུ་དེ་བཞིན་སྤྱད།།
གཞན་ལ་བཞེན་བསྐུལ་འདེབས་མཁས་ཤིང་།།
མ་བཅོལ་ཕན་པ་བྱེད་པའི་ངག།
གུས་པས་སྤྱི་བོས་བླང་གྱིས་ཏེ།།
རྟག་ཏུ་ཀུན་གྱི་སློབ་མར་གྱུར།།
ལེགས་པར་སྨས་པ་ཐམས་ཅད་ལ།།
དགེ་བར་གསུངས་ཞེས་བརྗོད་པར་བྱ།།
བསོད་ནམས་བྱེད་པ་མཐོང་གྱུར་ན།།
བསྟོད་པས་ལེགས་པར་དགའ་བ་བསྐྱེད།།
ལྐོག་ན་ཡོན་ཏན་བརྗོད་བྱ་ཞིང་།།
ཡོན་ཏན་བརྗོད་ན་རྗེས་སུ་བརྗོད།།
རང་གི་ཡོན་ཏན་བརྗོད་ན་དེ།།
ཡོན་ཏན་ཤེས་པར་རིག་པར་བྱ།།
རྩོམ་པ་ཐམས་ཅད་དགའ་ཕྱིར་ཏེ།།
དེ་ནི་རིན་གྱིས་ཉོ་ནའང་དཀོན།།
དེ་ལྟས་གཞན་བྱས་ཡོན་ཏན་གྱིས།།
དགའ་བའི་བདེ་བ་སྤྱད་པར་བྱ།།
བདག་ལ་འདིར་གོང་ཡོང་མེད་ལ།།
ཕ་རོལ་དུ་ཡང་བདེ་བ་ཆེ།།
ཉེས་པས་མི་དགའ་སྡུག་བསྔལ་ཞིང་།།
ཕ་རོལ་དུ་ཡང་སྡུག་བསྔལ་ཆེ།།
སྨྲ་ན་ཡིད་ཕེབས་འབྲེལ་པ་དང་།།
དོན་གསལ་ཡིད་དུ་འོང་བ་དང་།།
ཆགས་དང་ཞེ་སྡང་སྤངས་པ་དང་།།
འཇམ་ཞིང་རན་པར་སྨྲ་བར་བྱ།།
མིག་གིས་སེམས་ཅན་ལྟ་ན་ཡང་།།
འདི་དག་ཉིད་ལ་བརྟེན་ནས་བདག།
སངས་རྒྱས་ཉིད་དུ་འགྱུར་རོ་ཞེས།།
དྲང་ཞིང་བྱམས་པའི་ཚུལ་གྱིས་བལྟ།།
རྟག་པར་མངོན་ཞེན་གྱིས་བསླང་བའམ།།
གཉེན་པོ་ཡིས་ནི་བསླང་བ་ཉིད།།
ཡོན་ཏན་དང་ནི་ཕན་འདོགས་ཞིང་།།
སྡུག་བསྔལ་བ་ལ་དགེ་ཆེན་འགྱུར།།
མཁས་ཤིང་ལྡང་དང་ལྡན་བྱས་ནས།།
ལས་རྣམས་བདག་གིས་རྟག་ཏུ་བྱ།།
ལས་རྣམས་ཀུན་ལ་སུ་ལ་ཡང་།།
ལྟོས་པར་བྱ་བ་མ་ཡིན་ནོ།།
སྦྱིན་པའི་ཕ་རོལ་ཕྱིན་ལ་སོགས།།
གོང་ནས་གོང་དུ་ཁྱད་ཞུགས་སྤྱད།།
ཆུང་ངུའི་ཕྱིར་ནི་ཆེ་མི་གཏང་།།
གཙོ་ཆེར་གཞན་གྱི་དོན་བསམ་མོ།།
དེ་ལྟར་རིག་བྱས་གཞན་དོན་ལ།།
རྟག་ཏུ་བརྩོན་པར་གནས་པར་བྱ།།
ཐུགས་རྗེ་མངའ་བ་རིང་གཟིགས་པས།།
བཀག་པ་རྣམས་ཀྱང་དེ་ལ་གནང་།།
ཞེས་གསུང་པའི་དོན་ནི།
འདོད་པའི་ལོག་གཡེམ་གྱི་ཉེས་དམིགས།
གང་ཞིག་དྲན་པས་ལོག་འདྲེན་གདོན་གྱི་མཐུ།།
དཔག་ཚད་བྱེ་བའི་ཕ་མཐར་སྐྲོད་བྱེད་པ།།
གངས་ཅན་གདུལ་བྱ་སྐྱོབ་པའི་མགོན་གཅིག་པུ།།
མཚོ་སྐྱེས་རྡོ་རྗེས་འགྲོ་བློ་དགེ་གྱུར་ཅིག།
འདོད་ལོག་སྤྱོད་པས་ངན་འགྲོར་འཁྱམ་པ་དང་།།
འཇིག་རྟེན་འདིར་ཡང་གནོད་པ་མང་མཐོང་ཕྱིར།།
བཀའ་དང་བསྟན་བཅོས་ཀུན་ལས་འདི་ཉིད་ཀྱི།།
ཉེས་དམིགས་མང་བཤད་སྐྱེ་བོས་ཤེས་པར་བྱ།།
འདོད་པ་མེད་པའི་མི་ཞིག་ནི།།
འདོད་པའི་ཁམས་ན་མི་སྲིད་མོད།།
ཧ་ཅང་འདོད་པ་ཆེ་བ་ནི།།
འདོད་ཁམས་ལ་ཡང་རུང་མ་ཡིན།།
དེང་དུས་འཛམ་གླིང་ཤར་ནུབ་ཏུ།།
བྱུང་བའི་གྱོད་དོན་ཕལ་མོ་ཆེའི།།
ཁུངས་ནི་འདོད་ལ་ཐུག་པའི་ཕྱིར།།
འདོད་ཆེན་འདྲ་བའི་ཉེས་གཞན་མེད།།
བསོད་ནམས་ཟོམ་ཏུ་གཏམས་ཡོད་ན།།
ཟོམ་རྐུབ་རྟོལ་བ་ལོག་གཡེམ་ཡིན།།
མཛའ་བ་གསེར་གྱིས་སྦྲེལ་ཡོད་ན།།
མཛའ་ཐག་གཅོད་པ་ལོག་གཡེམ་ཡིན།།
ཟས་ནོར་ཡོད་པ་ཆུད་ཟར་གྱུར།།
གོ་ཐོབ་ཆེ་ཡང་དམའ་སར་ལྷུང་།།
གྲགས་པ་ཆེ་ཡང་ངན་གྱིས་སྨོད།།
གཡེམ་ལ་དགའ་བའི་ཉེས་པ་ཡིན།།
ཕ་མ་སྤུན་ཡང་སྡང་བར་ཞུགས།།
རུ་སྐོར་ཁྱིམ་མཚེས་ངན་ཤགས་བྱེད།།
མཛའ་བ་ཀུན་ཀྱང་མི་མཛའ་བ།།
གཡེམ་ལ་དགའ་བའི་ཉེས་པ་ཡིན།།
རིགས་རྒྱུད་དག་གིས་མཐོ་ཡང་རུང།།
ལོ་ཚོད་དག་གིས་རྒན་ཡང་རུང་།།
ཡོན་ཏན་དག་གིས་ཆེ་ཡང་རུང་།།
གཡེམ་ལ་དགའ་ན་སྨོད་ཅིང་སྡང་།།
སྨྲ་བ་འཆལ་ཡང་ཆགས་གཏམ་བྱེད།།
སྤྱོད་པ་འཆལ་ཡང་ངོ་ཚ་མེད།།
ཤེལ་པ་འཆལ་ཡང་དྲན་ཤེས་མེད།།
གཡེམ་ལ་དགའ་བའི་ཉེས་པ་ཡིན།།
མི་གཙང་རྐྱལ་པའི་ཕུང་པོ་ལ།།
མི་གཙང་སྲེད་པས་བཅིང་བ་དག།
ཡིད་ཀྱི་ཉེར་ལེན་བྱེད་གོམས་ནས།།
བཞིན་གྱི་མདངས་ཡལ་ལུས་སྟོབས་ཤོར།།
སྐད་ཅིག་དག་གིས་རྫོགས་བྱེད་པའི།།
ཟག་བཅས་བདེ་བར་རྗེས་ཆགས་ནས།།
ཆོས་སྲིད་གཉིས་ཀར་ཁྲེལ་མེད་པས།།
རང་གིས་རང་ལ་ཡིད་རྟོན་བྲལ།།
ཚུལ་མིན་ལོག་པའི་དོན་ཡིན་ཕྱིར།།
དྭངས་བའི་ཁམས་ཀྱང་འཁྲུག་པར་བྱེད།།
ཞི་བའི་སེམས་ཀྱང་རྙོག་པར་བྱེད།།
བདེ་བའི་ལུས་ཀྱང་ན་བར་བྱེད།།
མི་ཚེ་གློག་གི་སྣང་འགྲོས་ལ།།
བདེ་བའི་ཁྱིམ་གཞི་བསྐྲུན་པ་དང་།།
དགའ་བའི་ཚེ་གྲོགས་རྙེད་པ་ཡང་།།
ལོག་གཡེམ་ཅན་ལ་དགྲ་རུ་སྡང་།།
འཁོན་འཁྲུག་སེམས་ཀྱི་ས་བོན་བཏབ།།
ཚིག་ངན་མཚོན་གྱི་རྨ་ཁ་བཟོས།།
ཁྱིམ་གྱི་དཔལ་ཡོན་ཉམས་བྱེད་པའི།།
ལས་ཀྱི་ཆུང་མ་རི་ལ་ཕུད།།
འཆི་བདག་བཙན་པས་མ་ཡིན་རུང་།།
ཚུགས་མེད་སྐྱེ་བོའི་འཆལ་སྤྱོད་ལས།།
ཁྱིམ་གྱི་དྲོད་ཁོལ་མི་དབང་བའི།།
དྭ་ཕྲུག་མང་པོར་ངུ་སྐད་སློང་།།
རིགས་རྒྱུད་གང་ཡིན་མི་གོ་ཞིང་།།
གོ་ཡང་བདག་པོ་མི་བྱེད་པའི།།
ཁྲིམས་མེད་ལུགས་མེད་འཆལ་སྤྱོད་དག།
གཡེམ་ལ་དགའ་བ་དག་གིས་བྱེད།།
མངལ་གྱི་ཚེ་སྲོག་གསར་བ་དག།
མི་འདོད་གསོད་སྦྱོར་བྱེད་པ་ཡང་།།
ཕ་མའི་ལས་འགན་མི་ཐེག་པའི།།
གཡེམ་ལ་དགའ་བ་དག་གིས་བྱེད།།
གཞི་ནས་བཅོས་སུ་མི་བཏུབ་པའི།།
ཨེ་ཛི་ལ་སོགས་ནད་ངན་རིགས།།
རི་ལུང་ཀུན་ཏུ་ཁྱབ་པ་ཡང་།།
གཡེམ་ལ་དགའ་བ་དག་གིས་བྱེད།།
འདོད་པའི་ལོག་པར་གཡེམ་པ་དག།
རྣམ་སྨིན་རྒྱ་མའི་ཡང་ལྗིད་ཀྱིས།
དུད་འགྲོ་དང་ནི་ཡི་དྭགས་དང་།།
དམྱལ་བར་སྐྱེ་བར་ཐུབ་པས་གསུངས།།
ཚུལ་འདི་ཐོས་པའི་སྐྱེ་བོའི་ཚོགས།།
གཡེམ་གྱི་ཉེས་དམིགས་ཤེས་གྱུར་ནས།།
ཚུལ་མཐུན་ཕོ་མོ་འགྲོག་པ་ཡང་།།
དགའ་བཞིའི་ཡེ་ཤེས་རྒྱུར་གྱུར་ཤོག།
༢༠༢༣/༡༠/༩་ལ་ཁྱུང་ཆེན་མིང་གིས་སྦྱར་བའོ།།
དཔལ་ལྡན་ཟླ་བའི་ཞལ་ནས།
གལ་ཏེ་གཏི་མུག་བརྟེན་ནས་ལས་བྱུང་གཏི་མུག་མེད་པར་དེ།།
མི་འབྱུང་ཞེས་བྱར་མི་མཁས་ཁོ་ནས་རྟོགས་པར་གོར་མ་ཆག།
བློ་བཟང་ཉི་མས་མུན་པ་སྟུག་པོ་རྣམ་པར་བསལ་བ་བཞིན།།
མཁས་པ་དག་ནི་སྟོང་ཉིད་ཁོང་དུ་ཆུད་ཅིང་གྲོལ་བར་འགྱུར།།
ཞེས་པའི་དོན་ནི་ཇི་སྐད་དུ།རྗེ་གུང་ཐང་བའི་ཞལ་ནས།དོན་གྱི་རྒན་པོ་ཚིག་གི་འཁར་བ་ལ།།བརྟེན་ཕྱིར་ཞེས་གསུང་བ་ལྟར་ཚིག་གི་འབྲུ་མ་ནོན་ན་དོན་གྱི་གོ་བ་ཤེས་ལུགས་མེད་པས་ཚིག་འགྲེལ་གྱིས་དོན་ཅུང་ཟད་ཅིག་ཕྱེ་ན།དོན་ལ་མཁས་པ་དག་གིས་འདི་སྐད་སྨྲ་ལུགས་མེད་པས་ན་མེད་པ་གང་ཞིག་ཡོད་པའི་དབང་དུ་བྱེད་ན་ཞེས་པའི་དོན་གྱིས་བརྟགས་པ་མཐར་བཟུང་གི་ཚིག་སྟེ་ག༷ལ་ཏེ༷་ཞེས་གསུང་།དེ་ཡང་དངོས་པོ་མཚན་མ་རང་མཚན་གྱིས་གྲུབ་པར་ཞེན་པའི་བདག་འཛིན་འཁྲུལ་བའི་དབང་དུ་ན་འདུ་བྱེད་སོགས་འཕེན་བྱེད་གསུམ་དང་མིང་གཟུགས་སོགས་འཕངས་བྱེད་བཞི།སྲེད་དང་སྐྱེ་སོགས་འགྲུབ་དང་གྲུབ་པའི་ཡན་ལག་ལྔ་དག་ནི་རྨི་ལམ་གྱི་སྣང་བ་ལྟར་རྟེན་འབྲེལ་ཡན་ལག་བཅུ་གཉིས་ཀྱི་ཐོག་མའི་གཏི༷་མུ༷ག་ལ་བརྟེ༷ན་ན༷ས་དེ་ལ༷ས་བྱུ༷ང་བ༷་དེས་དེ་འཁྲུལ་བ་ཡིན་པར་མ་ཤེས་པར་མགོ་འཐོམས་ནས་སྨྲ་བའི་རང་སྡེ་དངོས་སྨྲ་བ་སོགས་ཀྱིས་དོན་རང་མཚན་ནམ་རངབཞིན་གྱིས་གྲུབ་པའི་རྟེན་འབྲེལ་ཡན་ལག་བཅུ་གཉིས་ཀྱི་ཐོག་མའི་གཏི༷་མུ༷ག་མེ༷ད་པ༷ར་རྟེན་འབྲེལ་ཡན་ལག་གཞན་དག་དེ༷་རིགས་ཀྱང་གཏན་ནས་འབྱུང་མི་རིགས་པར་འདོད་པས་ན་མི༷་འབྱུ༷ང་ཞེས་གསུང་།དེ་ལྟ་བུའམ་ཞེ༷ས་བྱ༷་བར༷་ཞེན་དང་དངོས་འཛིན་ཁོ་ནས་སྨྲ་བ་བསྐྱངས་བ་རྣམས་ནི་གནས་ལུགས་དོན་ལ་མཁས་པའི་དབུ་མ་པས་ལྟས་ན་ཆོས་རྣམས་ཀྱི་རང་བཞིན་ལ་མི༷་མཁ༷ས་པ་སྟེ་བླུན་པོ་ཁོ༷་ན༷ས་སམ་འབའ་ཞིག་གིས་དེ་ལྟར་རྟོ༷གས་པ༷ར་རམ་ཤེས་པར་བྱེད་པ་གོ༷ར་མ་༷ཆ༷ག་གམ་ཐེ་ཚོམ་ཅི་ཞིག་ཡོད་ཅེས་གསུང་།ཡང་རང་ཅག་གིས་དོན་གྱི་གནས་ལུགས་མ་རྟོགས་པ་ལ་འཁྲུལ་བའི་རང་བཞིན་གྱི་སྣང་བ་མེད་བཞིན་དུ་འབྱུང་རིགས་པ་ནི་འཁྲུལ་བའི་དབང་གིས་ཡིན་ཏེ་དཔེར་རྨི་ལམ་གྱི་སྣང་བ་དང་མིག་རབ་རིབ་ཀྱིས་སྒྲིབ་རྐྱེན་གྱིས་སྐྲ་ཤད་དང་ཟླ་གཉིས་སོགས་མེད་བཞིན་དུ་སྣང་བ་ལྟ་བུ་ཡིན།དེ་དག་ཀྱང་རང་བཞིན་དུ་གྲུབ་པ་མེད་དེ་མ་སྐྱེས་ཕྱིར།དཔེར་ན་མོ་གཤམ་གྱི་བུ་བཞིན་ནོ།།དེ་བས་དོན་ལ་རྨི་སྣང་དང་ཟླ་གཉིས་ཀྱི་སྣང་བ་འདི་དག་ཀྱང་འཕྲལ་རྐྱེན་གྱི་དབང་གིས་མ་གཏོགས་ཡོད་མ་མྱོང་པ་ལྟར་ཆོས་ཐམས་ཅད་སྟོང་ཉིད་རྟོགས་པའི་བློ༷་གྲོས་བཟ༷ང་པོ་ཅན་ནི་ཉི༷་མ༷་སྟེ་དམ་པ་དེ་དག་ཉི་མས་གཟུགས་སུ་བཀོད་ནས་དེ་ལྟ་བུ་དག་གིས་དངོས་པོ་རང་བཞིན་གྱིས་ཚུགས་ཐུབ་དང་བདེན་གྲུབ་ཏུ་འདོད་པའི་ལྟ་བ་དང་འཛིན་པ་ནི་མུ༷ན་པ༷་སྟུ༷ག་པོ༷་སྟེ་འདིའི་གཟུགས་སུ་བཀོད་ནས་རྣ༷མ་པ༷ར་རམ་དོན་དཔྱོད་ཚད་མའི་ལམ་ནས་རང་བཞིན་དུ་གྲུབ་པ་མེད་པར་ཡང་དག་པར་ཉི་མས་མུན་པ་བས༷ལ་བ༷འམ་མེད་པར་བྱེད་པ་བཞི༷ན་ནམ་དེ་ལྟར་མཚུངས་ནི་རེད་ཅེས་གསུང་།དེའི་ཕྱིར་ན་ཐོག་མར་རང་མཚན་དུ་གྲུབ་པར་འདོད་པའི་ཕྱི་ནང་གི་བསྡུས་པའི་ཆོས་རྣམས་ཆོས་ཉིད་ཀྱི་རིགས་པས་སྟོང་པར་གཏན་ལ་འབེབས་པས་མཁ༷ས་པ༷་དང་དེ་ནས་རིམ་བཞིན་ཟུང་འཇུག་དང་སྤྲོས་བྲལ་དང་མཉམ་ཉིད་ད༷ག་ནི༷་གཏན་ལ་དབབ་པས་སྟོ༷ང་ཉི༷ད་ཁོ༷ང་དུ༷་ཆུ༷ད་ཅི༷ང་མ་རིག་པ་དག་རྩ་བ་དྲུངས་འབྱིན་བྱེད་ནས་འཇིགས་རུང་འཁོར་བའི་གྲོང་ཆེན་པོ་ལས་ཡང་དག་པར་གྲོ༷ལ་བ༷ར་འགྱུ༷ར་རོ་ཞེས་པའི་དོན་ནོ།།
འཆད་ཁྲིད་ཟུར་བཀོད།
/ལུགས་གཉིས་བླང་དོར་གྱི་བསླབ་བྱ་ཉུང་ངུ།
མཛད་པ་པོ།ཀུན་མཁྱེན་མི་ཕམ་རྒྱ་མཚོ།
/ས་སྐྱ་ལེགས་བཤད།
མཛད་པ་པོ།འཇམ་མགོན་ས་སྐྱ་པཎ་ཆེན།
/ཞིང་སྦྱོང་དྲང་སྲོང་ལུང་གི་ཉི་མ།
མཛད་པ་པོ།ཀུན་མཁྱེན་མི་ཕམ་རྒྱ་མཚོ།
རྒྱ་ཆེན་ཐོས་པ་བསགས་པའི་མཁའ་ལམ་ནས།།
ལྷག་བསམ་སྤྲིན་གྱི་འདུ་བ་རབ་བཀོད་ནས།།
སྤོབས་པའི་ལྕི་བའི་སྤྲིན་གྱི་སྒྲ་དབྱངས་ཀྱིས།།
ཕན་བདེའི་གྲུ་ཆར་རྟག་ཏུ་འབེབས་པར་ཤོག།
ཁྱེད་ཉིད་ཕེབས་བསུ་ཡོད།
བྱང་ཆུབ་སེམས་དཔའི་བསམ་སྤྱོད་ཀྱི་རི་མོ་འབྲི་ཨེ་ཤེས་ལྟ།