རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་སོགས་སྡེ་ཚན་7གྱིས་ཚེས་27ཉིན《སྨན་བཅོས་ལས་ཁུངས་ཀྱི་བརྟག་དཔྱད་དང་ཞིབ་དཔྱད་བྱས་འབྲས་ཕན་ཚུན་ཁས་ལེན་བྱ་རྒྱུར་སྔར་བས་སྐུལ་འདེད་གཏོང་རྒྱུའི་སྐོར་གྱི་མཛུབ་ཁྲིད་བསམ་འཆར》（གཤམ་དུ《མཛུབ་ཁྲིད་བསམ་འཆར》ཞེས་བསྡུ་རྒྱུ）ཡོངས་བསྒྲགས་བྱས་པ་རེད། དེ་ཡང་། 2025ལོ་དང་2027ལོ། 2030ལོ་བཅས་ཀྱི་ལས་འགན་དང་དམིགས་ཚད་ཁག་སོ་སོར་ཁ་གསལ་བཟོས་པ་དང་། དམ་ཚགས་རྣམ་པའི་སྨན་བཅོས་མཉམ་འབྲེལ་ལས་ཁུངས་དང་། གྲོང་ཁྱེར་གྱི་ས་ཁོངས། ཞིང་ཆེན་གྱི་ས་ཁོངས། ཅིང་ཅིན་ཅིས། འབྲི་ཆུའི་ཟུར་གསུམ་ཁུལ། ཁྲེང་ཏུའུ་དང་ཁྲུང་ཆིང་སོགས་ས་ཁོངས། རྒྱལ་ཡོངས་རིམ་པ་བཅས་ཀྱི་ལས་འགན་བླང་བྱ་ཞིབ་ཕྲ་བཟོས་ཡོད།
2025ལོའི་ལོ་མཇུག་ཏུ་སླེབས་དུས། དམ་ཚགས་རྣམ་པའི་སྨན་བཅོས་མཉམ་འབྲེལ་སྒྲིག་གཞིའི(གྲོང་ཁྱེར་གྱི་སྨན་བཅོས་ཚོགས་པ་དང་རྫོང་ཁོངས་ཀྱི་སྨན་བཅོས་ཐུན་མོང་ལས་ཁུངས་ཚུད་པ)སྨན་བཅོས་མཉམ་འབྲེལ་སྒྲིག་གཞིའི་ནང་གི་སྨན་བཅོས་ལས་ཁུངས་ཁག་དབར་རྣམ་གྲངས་ཡོངས་རྫོགས་ཕན་ཚུན་ཁས་ལེན་དང་། ས་ཁུལ་དང་གྲོང་ཁྱེར་ཁྱབ་ཁོངས་ནང་གི་སྨན་བཅོས་ལས་ཁུངས་དབར་ཕན་ཚུན་ཁས་ལེན་བྱེད་པའི་རྣམ་གྲངས་200ལས་བརྒལ་རྒྱུ་རེད།
2027ལོའི་ལོ་མཇུག་ཏུ་སླེབས་དུས། ཞིང་ཆེན་ཁག་གི་ས་ཁོངས་ནང་གི་སྨན་བཅོས་ལས་ཁུངས་དབར་ཕན་ཚུན་ཁས་ལེན་བྱེད་པའི་རྣམ་གྲངས་300ལས་བརྒལ་རྒྱུ་ཡིན་པ་དང་། ཅིང་ཅིན་ཅིས་དང་འབྲི་ཆུའི་ཟུར་གསུམ་ཁུལ། ཁྲེང་ཏུའུ་དང་ཁྲུང་ཆིང་སོགས་ས་ཁོངས་ནང་གི་སྨན་བཅོས་ལས་ཁུངས་དབར་ཕན་ཚུན་ཁས་ལེན་བྱེད་པའི་རྣམ་གྲངས་ཀྱི་གྲངས་འབོར་200ལས་བརྒལ་རྒྱུ་རེད།
2030ལོར་སླེབས་དུས། རྒྱལ་ཡོངས་སུ་ཕན་ཚུན་ཁས་ལེན་བྱེད་པའི་ལས་ཀའི་ལམ་སྲོལ་སྔར་བས་འཐུས་ཚང་དུ་གཏོང་རྒྱུ་དང་། བརྟག་དཔྱད་དང་ཞིབ་དཔྱད་ཀྱི་སྤུས་ཚད་གཅིག་མཚུངས་ཅན་གྱི་ཆུ་ཚད་སྔར་བས་མཐོ་རུ་གཏོང་རྒྱུ། བརྟག་དཔྱད་དང་ཞིབ་དཔྱད་བྱས་འབྲས་ཕན་ཚུན་འབྲེལ་མཐུད་མཉམ་སྤྱོད་བྱེད་པའི་མ་ལག་སྤྱིར་ན་འཛུགས་རྒྱུ། རྒྱུན་མཐོང་གི་བརྟག་དཔྱད་དང་ཞིབ་དཔྱད་བྱས་འབྲས་ས་ཁོངས་ལས་བརྒལ་བ་དང་སྨན་བཅོས་ལས་ཁུངས་ལས་བརྒལ་ནས་མཉམ་སྤྱོད་དང་ཕན་ཚུན་ཁས་ལེན་བྱ་རྒྱུ་གཞི་རྩའི་ཆ་ནས་མངོན་འགྱུར་ཡོང་བ་བྱ་རྒྱུ་རེད།
རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་ཕན་ཚུན་ཁས་ལེན་གྱི་ལས་ཀའི་མཛུབ་ཁྲིད་བཟོ་བ་དང་ཁྱབ་བསྒྲགས་བྱས་ནས་ལག་རྩལ་མཛུབ་ཁྲིད་ལ་ཤུགས་སྣོན་རྒྱག་རྒྱུ་རེད། ས་གནས་ཁག་གི་འཕྲོད་བསྟེན་བདེ་ཐང་སྲིད་འཛིན་སྡེ་ཚན（ཀྲུང་ལུགས་གསོ་རིག་གི་སྨན་རྫས་གཙོ་གཉེར་སྡེ་ཚན་དང་ནད་ཡམས་ཚོད་འཛིན་སྡེ་ཚན་ཚུད་ཡོད）གྱིས་ཁོངས་གཏོགས་ཁུལ་གྱི་ཕན་ཚུན་ཁས་ལེན་བྱེད་པའི་རྣམ་གྲངས་ཀྱི་རྩིས་ཐོ་དང་སྨན་བཅོས་ལས་ཁུངས་ཀྱི་རྩིས་ཐོ་བཟོ་བ་དང་ཡོངས་བསྒྲགས་བྱས་ཏེ། ཕན་ཚུན་ཁས་ལེན་བྱེད་ཆོག་པའི་རྣམ་གྲངས་ཀྱི་ཁྱབ་ཁོངས་དང་། དཔྱད་གཞིའི་དུས་བཀག སྤུས་ཚད་ཀྱི་བླང་བྱ་སོགས་དགོས་ངེས་ཀྱི་ཆ་རྐྱེན་དང་དེ་བཞིན་ཕན་ཚུན་ཁས་ལེན་གྱི་ལས་དོན་ལག་བསྟར་བྱེད་པའི་སྨན་བཅོས་ལས་ཁུངས་ཁ་གསལ་བཟོ་བ་དང་འབྲེལ། འགུལ་རྣམ་གསར་བརྗེས་དང་འཐུས་ཚང་དུ་གཏོང་བ། “བཀག་ཕྱོགས”ཀྱི་གསལ་ཐོ་བཟོས་ནས་ཁྱབ་བསྒྲགས་བྱེད་པ། ཕན་ཚུན་ཁས་ལེན་བྱེད་མི་ཐུབ་བའི་གནས་ཚུལ་ཁ་གསལ་བཟོ་བ་བཅས་བྱས་ནས། སྨན་བཅོས་སྤུས་ཚད་ཀྱི་བདེ་འཇགས་འགན་ལེན་ཏན་ཏིག་བྱ་རྒྱུ་རེད།
《མཛུབ་ཁྲིད་བསམ་འཆར》ནང་། ས་གནས་ཁག་གི་འཕྲོད་བསྟེན་དང་བདེ་ཐང་སྲིད་འཛིན་སྡེ་ཚན་གྱིས་ས་ཁོངས་ཀྱི་ཆ་འཕྲིན་སྟེགས་བུ་འཛུགས་རྒྱུར་ཤུགས་སྣོན་བརྒྱབ་སྟེ། བརྟག་དཔྱད་དང་ཞིབ་དཔྱད་བྱས་འབྲས་ཀྱི་གྲངས་གཞིའི་མཛོད་དང་། “གྲངས་འཛིན་བརྙན་པར”རམ་ཡང་ན“བརྙན་སྤྲིན”སོགས་ཀྱི་བྱེད་ཐབས་བརྒྱུད། གྲངས་གཞིའི་བདེ་འཇགས་འགན་ལེན་བྱེད་པའི་སྔོན་འགྲོའི་ཆ་རྐྱེན་འོག ས་ཁོངས་ནང་ལས་ཁུངས་བརྒལ་ནས་མཉམ་སྤྱོད་ལྟ་ལེན་ཐུབ་པ་བྱེད་དགོས་ཤིང་། བརྟག་དཔྱད་དང་ཞིབ་དཔྱད་བྱས་འབྲས་ཕན་ཚུན་འབྲེལ་མཐུད་མཉམ་སྤྱོད་ཐུབ་པའི་གྲངས་གཞི་དང་སྨན་བཅོས་ལས་སྒོའི་མ་ལག་གཉིས་མཉམ་འདྲེས་འབྲེལ་མཐུད་བྱ་རྒྱུར་རིམ་བཞིན་སྐུལ་འདེད་གཏོང་བ་དང་། འབྲེལ་མཐུད་མཉམ་སྤྱོད་ཀྱི་གྲངས་གཞིའི་གནད་དོན་ཡོ་བསྲང་དང་ལྡོག་འདྲེན་ལམ་སྲོལ་བཙུགས་ནས། ནད་པ་དང་སྨན་དོན་མི་སྣས་ལྟ་ལེན་བྱ་རྒྱུར་སྟབས་བདེ་བསྐྲུན་དགོས་པ། ལས་རིགས་ཀྱིས་ཁྱབ་བསྒྲགས་བྱས་ཟིན་པའི་གྲངས་གཞི་དང་མཉམ་སྤྱོད་ཡིག་ཚགས་སོགས་ཀྱི་ཚད་གཞི་གཞིར་བཟུང་། བརྟག་དཔྱད་དང་ཞིབ་དཔྱད་བྱས་འབྲས་ཀྱི་གྲངས་གཞི་དང་མཉམ་སྤྱོད་ཡིག་ཚགས་ཀྱི་འབྲེལ་ཡོད་ཚད་གཞི་ཁ་གསལ་བཟོ་དགོས་པ། ཆ་འཕྲིན་ཅན་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་བརྒྱབ་སྟེ་གྲངས་གཞི་བརྒྱུད་གཏོང་ལས་ཕྱོད་ཀྱི་མྱུར་ཚད་དང་བརྟན་པོའི་རང་བཞིན་ཆེ་རུ་གཏོང་དགོས་པ། ས་གནས་ཁག་གིས་ཞིང་ཆེན་གྱི་གཅིག་གྱུར་འཆར་འགོད་ས་ཁོངས་ཀྱི་དམངས་ཡོངས་ཀྱི་བདེ་ཐང་ཆ་འཕྲིན་སྟེགས་བུ་དང་སྨན་བཅོས་འགན་བཅོལ་གྱི་ཆ་འཕྲིན་སྟེགས་བུ། ཞིང་ཆེན་རིམ་པའི“བརྙན་སྤྲིན”དང་དེ་བཞིན་དྲ་རྒྱའི་གསོག་ཉར་སོགས་རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་རྒྱག་དགོས་པ་མ་ཟད། འབྲེལ་ཡོད་ཆ་འཕྲིན་ཅན་གྱི་སྟེགས་བུའི་རྒྱུན་གཏན་སྲུང་སྐྱོང་དང་གྲངས་གཞི་བརྗེ་རེས་ལས་དོན་ཡག་པོ་བསྒྲུབ་དགོས་པ། 2025ལོའི་ལོ་མཇུག་གོང་། རིམ་པ་གཉིས་པ་དང་དེ་ཡན་གྱི་གཞུང་བཙུགས་སྨན་ཁང་ཚང་མར་བརྟག་དཔྱད་དང་ཞིབ་དཔྱད་བྱས་འབྲས་ལས་ཁུངས་ལས་བརྒལ་ནས་ལྟ་ལེན་བྱེད་ཐུབ་པ་དང་། ཞིང་ཆེན་20ལ་བརྟག་དཔྱད་དང་ཞིབ་དཔྱད་བྱས་འབྲས་ཞིང་ཆེན་ལས་བརྒལ་ནས་ལྟ་ལེན་བྱེད་ཐུབ་པ། 2027ལོར། གཞི་རྩའི་ཆ་ནས་བརྟག་དཔྱད་དང་ཞིབ་དཔྱད་བྱས་འབྲས་རྒྱལ་ཡོངས་སུ་ཕན་ཚུན་མཉམ་སྤྱོད་ཐུབ་པ་བཅས་བྱ་རྒྱུའི་བླང་བྱ་བཏོན་ཡོད།
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
编辑：登真益西
校对：登真益西
二审：梅朵
三审：白玛曲吉
监制：彭刚
