བརྙན་ལམ་ལེ་ཚན། གཏམ་དཔེའི་དོ་ར།
✦གཏམ་གྱི་སྒོ་མོ་འབྱེད་པའི་གསེར་གྱི་ལྡེ་མིག །✦
✦དཔེ་ཡི་ལུང་ལ་བརྒྱུས་པའི་ཚིག་གི་ཕྲེང་བ།།✦
✦དོ་ཤལ་རིན་ཆེན་རྒྱན་ལས་འགྲན་ཟླ་བྲལ་བའི།།✦
✦ར་བ་འདི་ནི་རིག་པའི་གཏེར་མཛོད་འདྲའོ།།✦
སྲིད་པའི་ཞལ་རྒྱུན། འདོན་ཐེངས་ཉིས་བརྒྱ་དང་སོ་གཉིས།
ཨ་མ་ཤོད་མཁས་ན། བུ་སྤྲུལ་པའི་སྐུ།
གཏམ་འགྲེལ། གཏམ་བཤད་མཁས་པོར་མི་རྣམས་མགོ་འཁོར་བའི་དོན།
གོས་ཆེན་རྒས་ཀྱང་རི་མོའི་གཞུང་།
གཏམ་འགྲེལ། སྤྱི་ཚོགས་ཀྱི་ཉམས་མྱོང་དང་ཤེས་བྱ་ཡོན་ཏན་ལྡན་པའི་མི་སྣ་ལོ་ན་རྒས་ཀྱང་སེམས་ཤུགས་ད་དུང་ཉམས་མེད་པའི་དོན།
ཡར་དཔེ་ཞྭ་ལ་མི་འགྲེ། མར་དཔེ་ལྷམ་ལ་མི་འགྲེ།
གཏམ་འགྲེལ། གང་དང་ཡང་མི་མཐུན་པའི་དོན།
ཡུག་པོ་གཟན་བསྒྲིལ།
གཏམ་འགྲེལ། གང་ཡོད་ཕྱོགས་གཅིག་ཏུ་བསྒྲིལ་པའི་དོན།
ཉ་གསེར་མིག་ཆུ་གཞུང་རྒྱུག་འགྲོ་ཆེ། རྒྱུག་ཆེ་ན་ཉ་ཁ་ལྕགས་ཀྱུས་འཛིན།
གཏམ་འགྲེལ། རང་གནས་སུ་སྡོད་ཚུགས་དགོས་པའི་དོན།
བཅོ་ལྔ་མཆོད་པ་ཕར་བཞག རང་མགོ་ཐོན་ན་ལྷ་རྒྱལ་རེད།
གཏམ་འགྲེལ། སྣང་བ་སྐྱིད་པོ་བྱེད་རྒྱུ་ཕར་བཞག་སྲོག་མགོ་ཐོན་ན་རབ་ཡིན་པའི་དོན།
སྨན་པ་དོར་བའི་ནད་པ་དེར། སྨན་བཟང་རྙེད་པ་ག་ལ་སྲིད།
གཏམ་འགྲེལ། བསྟེན་འོས་པའི་མི་དེ་མ་བསྟེན་ན་ཐོབ་དགོས་པའི་དོན་དེ་མ་ཐོབ་པའི་དོན།
སྤྱི་ཁྱབ་ལྟ་ཞིབ། བསྟན་འཛིན་འཇིགས་མེད།
རྩོམ་སྒྲིག་པ། ལྷ་མོ། བསམ་གྲུབ་བསྟན་འཛིན།
རྩོམ་ཁུངས། སྒར་བརྙན་འཕྲིན་ལས་ཁུངས་བོད་ཡིག་རྩོམ་སྒྲིག་ཁང་།
