གཙང་སྡེ་སྲིད་ཀརྨ་ཕུན་ཚོགས་རྣམ་རྒྱལ། - དཔྱད་རྩོམ།

གཙང་སྡེ་སྲིད་ཀརྨ་ཕུན་ཚོགས་རྣམ་རྒྱལ།

(1)རྗེ་བཙུན་ཏཱ་ར་ནཱ་ཐའི་རང་རྣམ་མ་བཅོས་ལྷུག་པའི་རྟོགས་བརྗོད་ཀྱི་ལོ་དེའི་ཐད་ཀྱི་རྣམ་ཐར་དུ།《དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས་པའི་མེས་པོའི་ཤུལ་བཞག་དེབ་ཞེ་གསུམ་པའི་ཤོག་ངོས༢༢༧པར》ཀུན་སྤངས་དྲུང་ནི་ཁོང་རའི་དགོངས་བཞེད་དང་ཕྱག་གཡོག་ཕྱོགས་འཛིན་ཅན་རྣམས་ཀྱིས་བསྐུལ།པ་སྣམ་ཆུ་བཟང་བ་དང་བླ་མ་རྣམ་གཉིས་ཀྱི་བཀའ་བཀོད་ལ་ཡང་བརྟེན་སྐུ་ཁམས་སངས་ཏེ་གྲག་འགྲོ་བ་གཞིར་བཞག་པ་ལ་གྲག་པའི་ངོ་སོ་གཞན་ལ་མི་འཆོར་བའི་ཕྱིར་རང་དུ་ཕེབས་པར་གནང་ཞིང༌།ཀ་བཞི་ནས་ནི་མཆོད་ཡོན་ལྷན་དུ་ཆབ་ཚན་ལ་ཕེབས་པའི་རྩིས་ཀྱི་རིན་པོ་ཆེས་ཀྱང་པ་སྣམ་དུ་ཕེབས།སྔར་བྲོས་པ་ཡིན་ཡང་དེ་དུས་ཚུར་འཁོར།དེའི་ཐོག་ཞག་ཤས་ནས་སྡེ་པ་སྐུ་ཁམས་འཕྲལ་དུ་ལོག་པའི་ཇེ་ལོད་ཀྱི་ངང་ནས་མཐར་ཡང་ཞུད་ཁས་བསྡུས་གདའ།ངེད་ཚོ་ཨོ་རྒྱན་རྫོང་དུ་སླེབ་ནས་ཞག་པོ་དགུ་ཙམ་སོང་བ་ན།བསྔོ་རྟེན་གྱིས་སླེབ་བྱུང༌།ཞེས་གསུངས།

(2) རྗེ་བཙུན་ཏཱ་ར་ནཱ་ཐ་དགུང་ལོ་སོ་ལྔ་བ་ས་བྱ༡༦༠༩ལོའི་རྣམ་ཐར་ཀྱི་ཐད་དུ།《དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས་པའི་མེས་པོའི་ཤུལ་བཞག་དེབ་ཞེ་གསུམ་པའི་ཤོག་ངོས༢༧༠པར》ཧོར་ཟླ་དང་པོའི་ཚེས་བཅུའི་ཉིན།དངོས་གཞིའི་དམ་པོའི་མཚམས་ཀྱི་སྒང་ཞིག་ལ།བསམ་རྩེ་ནས་ངེད་ལ་འབོད་མི་གྲོ་མོ་ཆེ་བ་བྱུང་འར་འུར་འདྲ་བྱེད་ཀྱིན་འདུགཁོང་ཡོང་དུས་སྡེ་པ་ཀར་བསྟན་དྲུང་སྙེལ་བ་རང་མེད་པ་འདུག་ནའང༌།ཁོང་པ་འདིར་དེ་རིང་སླེབ་རྒྱུའི་མདང་ནུབ་དེ་སྙེལ་ཡོད་པར་གདའ།ལྟས་ཀྱང་འཚུབ་པ་ནས་ཁོང་ལ་རེ་ཞིག་ཁས་མ་བླངས།ཡང་སྐུ་ལྟེམ་པ་ཡིན་ཟེར་ནས་མགྲོན་གཉེར་འཇམ་དབྱངས་སོགས་ཚེས་བཅུ་གསུམ་གྱི་ཉིན་མོ་སླེབ།སྔ་སོར་དབུས་དམག་རྟིང་མ་མཛད་པས་སྐུ་ཚེ་ལ་གནོད་ཅིང་སྔ་ཕྱིར་ལྟས་ཀྱང་ཤིན་ཏུ་ངན་པས་སྐུ་ཁམས་མཐར་ཐོན་མི་ཡོང་ངེས་སྙམ།མཚམས་འོག་ཏུ་ཁོང་ཚོ་ལ་ངག་འཕྲད་ཙམ་བྱས།ནམ་ཡོང་ངེས་ཅན་ནི་ཁས་མ་བླངས།བྱིན་རླབས་རྟེན་དང་དུད་རྫས་སོགས་བསྐུར།དེ་འབྱོར་པའི་ཉིན་མོ་སྐུ་ཁམས་བདེ་ཙམ་བྱུང་འདུག་ནའང་ཚེས་བཅུ་དྲུག་གི་ཉིན་མོ་སྐུ་མ་འཚོ།ཞེས་དང་།

(3) རྗེ་བཙུན་ཏཱ་ར་ནཱ་ཐ་དགུང་ལོ་སོ་དྲུག་པ་རབ་བྱུང་བཅུ་པའི་ལྕགས་ཁྱི༡༦༡༠ལོའི་ཐད་ཀྱི་རང་རྣམ་དུ།《དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས་པའི་མེས་པོའི་ཤུལ་བཞག་དེབ་ཞེ་གསུམ་པའི་ཤོག་ངོས༢༨༦པར》  དེ་རྗེས་རྒྱང་ཙམ་སོང་བ་ན་བསམ་འགྲུབ་རྩེ་ནས་ནན་ཆགས་འབོད་མི་གནང་བའི་སྡེ་པ་མཐུ་སྟོབས་དྲུང་སྐུ་ལྟེམ་ནས་ཡུན་རིང་རབ་སོང་བ་ཕྱིར་ལོད་དུ་གྱུར་པ་ཞིག་འདུག་པས།སླར་སྐུ་འཚོ་མི་འཚོ་ཇི་ལྟར་བྱུང་ཡང་གལ་ཆེ་སྐབས་རང་དུ་འདུག་པས་ཡོང་དགོས་ཞེས་ཡབ་སྲས་གཉིས་ཅར་གྱིས་ནན་ཆགས་གནང་བྱུང་བས།ཧོར་ཟླ་བརྒྱད་པའི་ཚེས་བཅུ་ལ་ཇོ་ནང་ནས་བཏེག་སྲད་བཀོད་དུ་བསྡད་པའི་ནུབ་གནམ་གཤིས་འཚུབ་པ་སོགས་ཕྱི་ནང་གི་ལྟས་རྩུབ་པ་ཙམ་བྱུང༌།རྩེ་རུ་སླེབ་དུས་མཐུ་སྟོབས་དྲུང་སྐུ་ཤིན་ཏུ་ལྟེམ་པ་རང་འདུག  དབང་རྗེས་གནང་སོགས་ཕུལ་བས།བར་སྐབས་ཞག་ཤས་ཤིག་ཐུགས་རིག་དྭངས་པ་ཙམ་བྱུང་ནའང༌།སྐུ་ཟུངས་ནི་ཉིན་རེ་བཞིན་བྲི་འགྲོ་བ་དེ་ཁར་གདའ།ཉེར་ལྔ་ནས་གཟུང་ལྷག་པར་ཡང་འབྱུང་བ་སྡུད་པའི་ཚུལ་འདུག་ཅིང༌།གནམ་གང་གི་ཐོར་འགོ་ལྟས་པ་ཙམ་ལ་སྐུ་མ་འཚོ་སོང༌། ཞེས་གསུངས།

(4)《དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས་པའི་མེས་པོའི་ཤུལ་བཞག་དེབ་ཞེ་བཞི་པའི་ཤོག་ངོས༩༥པར》  དེ་སྐབས་བར་ཆད་ཀྱི་དབང་དུ་མ་སོང་ན།དགུང་ལོ་བཞི་བཅུ་ཞེ་ལྔ་སྐོར་ཐུབ་པའི་མཚན་རྟགས་ཡོད་པ་ཡིན།དོན་ལ་དགྲ་བྱེད་པ་པོ་ཕ་རོལ་པོའི་བླ་མ་དང་སྡེ་དཔོན་གྲོས་སྟེང་ནས་ཐོར་པའི་བགས་ཚོ་ཡང་སྐུ་གཞོགས་བསྐྱལ་བར་འདུག།ཐོར་པ་རགས་རིམ་གདངས་མཚམས་སུ་དེའི་སྐད་ཆ་གོ་བ་དང༌།ཐོར་པས་མི་འགྲོངས་པར་འདུག་སྙམ་ནས།དུག་སྦྱོར་བྱུང་བ་ངེས་ཅན་དུ་འདུག།སྐུ་རྐྱང་ལ་མ་ཐོངས་པར་དེའི་སྐྱོགས་དེ་དཔོན་ས་རྒྱ་དགའ་དཔོན་གཡོག་ཚོ་ལ་ཡང་སོང་བར་འདུག།ཅེས་གསུངས།

(5)《གཡུ་ཕྲེང་།བོད་ལྗོངས་སྤྱི་ཚོགས་ཚན་རིག་ཁང་ནས་སྒྲིག་རྩོམ་བྱས་ཤིང་།བོད་ལྗོངས་དཔེ་རྙིང་དཔེ་སྐྲུན་ཁང་ནས་བསྐྲུན་པའི་དེབ་བར་ཆ་ཤོག་ངོས༥༤༥》《བོད་ཀྱི་ལོ་རྒྱུས་གླེང་བའི་གཏམ།ཀྲུང་གོའི་བོད་རིག་པ་དཔེ་སྐྲུན་ཁང་ནས་བསྐྲུན་པའི་དག་བཅོས་མ་ཤོག་ངོས༣༧༣》 བསྟན་སྲུང་དབང་པོའི་སྲས་ཀརྨ་ཕུན་ཚོགས་རྣམ་རྒྱལ་དགུང་ལོ་བཅུ་བཞིར་སོན་པ་རབ་བྱུང་བཅུ་པའི་ལྕགས་ཕག(སྤྱི་ལོ་༡༦༡༡)ལ་གཙང་པ་སྡེ་བའི་སྲིད་དབང་གི་འགན་བཞེས།

(6)《གཡུ་ཕྲེང་།བོད་ལྗོངས་སྤྱི་ཚོགས་ཚན་རིག་ཁང་ནས་སྒྲིག་རྩོམ་བྱས་ཤིང་།བོད་ལྗོངས་དཔེ་རྙིང་དཔེ་སྐྲུན་ཁང་ནས་བསྐྲུན་པའི་དེབ་བར་ཆ་ཤོག་ངོས༥༤༩》(སྤྱི་ལོ༡༦༢༠ལྕགས་སྤྲེལ) ལོར་ཟླ་བ་བཅུ་པ་ནང་ཙམ་དུ་ཟངས་ཡུལ་མོན་གདོང་སྒར་ཐོག་ཏུ་འབྲུམ་པས་སྐུ་གཤེགས་ཀྱང་དུས་ཟིང་སྟབས་བློན་ཆེན་རྣམས་ཀྱིས་རེ་ཞིག་གསང་སྟེ་སླར་གཙང་ལ་ལོག་ཕེབས་རྒྱུའི་ཁུལ་བྱས།སླར་བྱ་ལོར་གསང་བརྟོལ་སྲས་སྡེ་སྲིད་ཀརྨ་བསྟན་སྐྱོང་དབང་པོ་ཁྲིར་མངའ་གསོལ།འདི་པ་དགུང་ལོ་བཅུ་བདུན་ཙམ་ཡིན་ཀྱང་དཔའ་མཛངས་བློ་གྲོས་དང་ལྡན་པའི་བློན་ཆེན་སྒང་ཟུག་གཉིས་དང།མགྲོན་གཉེར་བོང(བོད)གོང་བ་སོགས་དྲུང་འཁོར་ཆེ་ཧྲག་མང་ཞིང་།རླུང་རྟ་ཡར་འགྲོར་སོང་བས་ནང་ཚགས་བློ་གྲོས་མཉམ་ཞིང་གྲ་འགྲིག་པས་ཆབ་སྲིད་ཇེ་འཕེལ་ཡ་ཡོར་མ་གྱུར་ཏོ།།

(7)《དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་གིས་བསྒྲིགས་པའི་མེས་པོའི་ཤུལ་བཞག་དེབ་ཞེ་གསུམ་པའི་ཤོག་ངོས༡༡༢པར》བསམ་འགྲུབ་རྩེ་ནས་འབོད་མི་བྱུང་བ་བཞིན་ཚེས་བརྒྱད་ཀྱི་ཉིན་བསམ་རྩེར་སླེབ་པའི་གཟིམས་ཁང་བདེ་བ་ཅན་གྱི་ལོགས་བྲིས་ལ་རབ་གནས་ཀྱི་སྟ་གོན་ཚུགས་པར་བྱས།དེའི་སང་གཟའ་སྐར་བཟང་བ་ལ་རབ་གནས་ཀྱི་དངོས་གཞི་བྱས་པས་ལོགས་བྲིས་ཀྱི་ལྷ་འགའ་རེས་མེ་ཏོག་མང་དུ་བཞེས་པ་བྱུང༌།མེ་ཏོག་བྱིངས་རྣམས་དེ་འཕྲལ་དྲུང་འཁོར་རྣམས་ཀྱིས་བྱིན་རླབས་རྟེན་ལ་ཁྱེར།གསུམ་བཞི་ཞིག་ཞག་མང་རབ་བསྡད་པར་གདའ།སྡེ་པ་རྒྱལ་བུའི་དྲུང་གིས་དེ་གོང་མཇལ་མ་མྱོང་བས་དེའི་ཉིན་མཇལ།ཞེས་གསུངས།