欢迎提供新闻线索：lztvxwb@qq.com
རྩ་རྒྱུས་རེངས་ཤིང་འཁུམ་པ་ལ་རྒྱུ་རྐྱེན་དུ་མ་ཡོད།
ཤ་གནད་ངལ་བ། ཉིན་མོར་རྐང་པ་དཀའ་ཚེགས་ཆེ་དྲགས་ན། ཤ་གནད་ངལ་བར་གྱུར་ཅིང་། མཚན་མོར་ཡང་ཤ་གནད་ཀྱི་ངལ་བ་མ་སངས་པར་གྲིམ་པོར་གནས་པ་ཡིན། དེ་དང་མཉམ་དུ་རྐང་པ་དཀའ་ཚེགས་ཆེ་དྲགས་ན་དབྱང་མེད་བརྗེ་ཚབ་འབྱུང་ལ་འོ་སྐྱུར་མང་པོ་གསོག་པར་འགྱུར། དེ་ལས་དབང་རྩ་ལ་གནོད་དེ་མཚན་མོར་རྐང་པའི་རྩ་རྒྱུས་རེངས་ཤིང་འཁུམ་པར་འགྱུར་བ་ཡིན།
ཀའེ་མ་འདང་བ། འཚར་སྐྱེ་འབྱུང་བཞིན་པའི་ན་གཞོན་ལོ་ཆུང་དང་སྦྲུམ་མ། རྒན་པ་བཅས་རྣམས་ཀའེ་ཟད་པར་འགྱུར་སླ་བས། མཚན་མོར་རྐང་པའི་རྩ་རྒྱུས་རེངས་འཁུམ་འབྱུང་སྲིད་ལ། ཐ་ན་རྐང་ལག་རེངས་པའང་འབྱུང་སྲིད།
གྲང་ངར་གྱིས་གཙེས་པ། མཚན་མོར་ཉལ་དུས་རྐང་པ་གྲང་ངར་གྱིས་གཙེས་ན། ཤ་གནད་རེངས་པར་འགྱུར་བའང་ཡོད།
ལུས་ཀྱི་གྲུབ་ཚུལ། རྐང་མཐིལ་སྙོམས་པ་དང་པུས་ཚིགས་ལྡོག་པ་སོགས་ལུས་ཀྱི་གྲུབ་ཚུལ་ལ་གནད་དོན་ཡོད་པའི་རིགས་ལའང་རྐང་པའི་རྩ་རྒྱུས་རེངས་འཁུམ་འབྱུང་སླ།
ལུས་ཆུ་མི་སྙོམས་པ། རྔུལ་ཆུ་མང་པོ་ཟགས་ཏེ་ཚྭ་མང་པོ་དོར་བ་དང་། ཁྲག་རྒྱུན་བཙག་བཅོས་སྐབས་སུ་ཆུ་མང་པོ་ཤོར་བ་དང་ཅཱ་ཉུང་ཁྲག་ནད་བྱུང་བ་སོགས་ལས་ཀྱང་། རྐང་པའི་རྩ་རྒྱུས་ལ་རེངས་འཁུམ་འབྱུང་།
མཱེ་ཉུང་ཁྲག་ནད། སྦྲུམ་མར་རྩ་འཁུམ་རྒྱུས་རེངས་བྱུང་བ་ནི་ཀའེ་མ་འདང་བ་ལས་གཞན་ད་དུང་ཁྲག་ལ་མཱེ་ཉུང་བས་བྱུང་བའང་ཡོད།
ནད་ཀྱི་རྐྱེན། དབང་རྩའི་མ་ལག་གི་ནད་ལ་རྐང་པའི་རྩ་རྒྱུས་རེངས་འཁུམ་གྱི་ནད་རྟགས་འབྱུང་ལ། གཅིན་སྙི་ཟ་ཁུའི་ནད་དང་ཁྲག་མངར་དམའ་བ། ཆང་དུག་ཕོག་པ། ཨོལ་གོང་རྨེན་བུའི་བྱེད་ནུས་ཉམས་པ། བརྗེ་ཚབ་རང་བཞིན་གྱི་ཤ་ནད་སོགས་ལས་ཀྱང་རྐང་པའི་རྩ་རྒྱུས་རེངས་འཁུམ་འབྱུང་གི་ཡོད།
སྨན་གྱི་རྐྱེན། གཅིན་འབེབ་བྱེད་ཀྱི་སྨན་དང་གཉིད་སྨན་སོགས་སྨན་རྫས་ཁ་ཤས་ཀྱིས་ཀྱང་རྐང་པའི་རྩ་རྒྱུས་རེངས་འཁུམ་བྱེད་པ་ཡིན།
རྩ་རྒྱུས་རེངས་འཁུམ་སེལ་ཐབས་གསུམ།
བསྲིང་འཐེན། ཐང་ལ་ཙོག་པུར་བསྡད་དེ་རེངས་འཁུམ་བྱུང་བའི་རྐང་པ་དྲང་མོར་བསྲིངས་པ་དང་། བྱང་ཁོག་མདུན་ལ་སྒུར། ལག་པས་རྐང་མཐིལ་ནས་བཟུང་རྗེས། རེངས་འཁུམ་མ་སེལ་བར་དུ་རང་གི་ལུས་པོའི་ཕྱོགས་སུ་ཡུན་གྱིས་འཐེན་དགོས། གལ་ཏེ་ཙོག་པུར་སྡོད་པར་སྟབས་བདེ་བོ་མེད་ན། རྐང་པའི་མཐེབ་ཆེན་ཤུགས་ཀྱིས་ཀེར་ནས་བྱིན་པ་ཤུགས་ཀྱིས་བསྲིངས་ན་ཡང་རེངས་འཁུམ་མྱུར་བར་སེལ་ཐུབ།
ཕུར་མཉེད། རེངས་འཁུམ་འབྱུང་བའི་ཤ་གནད་ལ་ཕུར་མཉེད་དང་ཡང་མོར་རྡེག་ནའང་རེངས་འཁུམ་སེལ་ཐུབ།
དྲོད་དུགས་པ། ལག་ཕྱིས་ཚ་མོའམ་གློག་གདན་སོགས་ཀྱིས་རེངས་འཁུམ་འབྱུང་སའི་ཤ་གནད་ཀྱི་སྟེང་དུ་དུགས་པ་དང་། ཆབས་ཅིག་ཏུ་ཕུར་མཉེད་བྱས་ན་རེངས་འཁུམ་སེལ་བར་ལྷག་ཏུ་ཕན།
来 源：青稞视界
编 辑：巴 洛
复 审：顿珠、尼普
终 审：欧 珠
扫码关注微信、抖音
