=== 愿 诸 见 闻 者 • 速 疾 成 佛 道 ===
![]()
![]( "分割线")
༄༅།།མི་ལ་རས་པའི་མགུར་གླུ།།སྙིང་པོའི་ཆོས་བྱེད་པར་དམ་བཅའ་བ་ཕྱ་མ་ཕྱོའི་གླུ།།རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན།།སྒྲ་སྒྱུར་མར་པའི་བཀའ་ལུང་བཞིན།།ཕ་ཡུལ་བདུད་ཀྱི་བཙོན་ར་རུ།།
མི་རྟག་སྒྱུ་མའི་སློབ་དཔོན་བྱུང་།།སློབ་དཔོན་བཟང་པོ་འདི་ཉིད་ལ།།ངེས་ཤེས་འདྲོངས་པར་བྱིན་གྱིས་རློབས།།
སྤྱིར་སྣང་ཞིང་སྲིད་པའི་ཆོས་རྣམས་ཀུན།།མི་རྟག་མི་བརྟན་འགྱུར་ཞིང་འགྲོ།།སྒོས་འཁོར་བའི་ཆོས་ལ་སྙིང་པོ་མེད།།སྙིང་པོ་མེད་པའི་བྱ་བྱེད་པས།།སྙིང་པོའི་ལྷ་ཆོས་བྱེད་དུ་འགྲོ།།
སྙིང་པོའི་ལྷ་ཆོས་བྱེད་དུ་འགྲོ།།དང་པོ་ཕ་ཡོད་ཙ་ན་བུ་ང་མེད།།གཉིས་ཀ་འཛོམ་རུང་སྙིང་པོ་མེད།།བུ་ང་སྙིང་པོའི་ལྷ་ཆོས་བྱེད།།
བྲག་དཀར་རྟ་སོར་སྒོམ་དུ་འགྲོ།།བྲག་དཀར་རྟ་སོར་སྒོམ་དུ་འགྲོ།།བུ་ང་སླེབས་ཚེ་མ་རྒན་གུམ།།གཉིས་ཀ་འཛོམ་རུང་སྙིང་པོ་མེད།།བུ་ང་སྙིང་པོའི་ལྷ་ཆོས་བྱེད།།
བྲག་དཀར་རྟ་སོར་སྒོམ་དུ་འགྲོ།།
བྲག་དཀར་རྟ་སོར་སྒོམ་དུ་འགྲོ།།སྲིང་མོ་ཡོད་ཚེ་མིང་པོ་མེད།།མིང་པོ་སླེབས་ཚེ་སྲིང་མོ་འཁྱར།།གཉིས་ཀ་འཛོམ་རུང་སྙིང་པོ་མེད།།བུ་ང་སྙིང་པོའི་ལྷ་ཆོས་བྱེད།།
བྲག་དཀར་རྟ་སོར་སྒོམ་དུ་འགྲོ།།
བྲག་དཀར་རྟ་སོར་སྒོམ་དུ་འགྲོ།།དམ་ཆོས་ཡོད་ཚེ་ཞབས་ཏོག་མེད།།ཞབས་ཏོག་སླེབས་ཚེ་ཐིགས་པས་གདུངས།།གཉིས་ཀ་འཛོམ་རུང་སྙིང་པོ་མེད།།བུ་ང་སྙིང་པོའི་ལྷ་ཆོས་བྱེད།།བྲག་དཀར་རྟ་སོར་སྒོམ་དུ་འགྲོ།།
བྲག་དཀར་རྟ་སོར་སྒོམ་དུ་འགྲོ།།བདག་པོ་སླེབས་ཚེ་ཁང་བ་རལ།།གཉིས་ཀ་འཛོམ་རུང་སྙིང་པོ་མེད།།བུ་ང་སྙིང་པོའི་ལྷ་ཆོས་བྱེད།།བྲག་དཀར་རྟ་སོར་སྒོམ་དུ་འགྲོ།།
བྲག་དཀར་རྟ་སོར་སྒོམ་དུ་འགྲོ།།བཤོས་ཞིང་ཡོད་ཚེ་བདག་པོ་མེད།།བདག་པོ་སླེབས་ཚེ་འཇག་སྐྱས་འཕྱུར།།གཉིས་ཀ་འཛོམ་རུང་སྙིང་པོ་མེད།།བུ་ང་སྙིང་པོའི་ལྷ་ཆོས་བྱེད།།བྲག་དཀར་རྟ་སོར་སྒོམ་དུ་འགྲོ།།
བྲག་དཀར་རྟ་སོར་སྒོམ་དུ་འགྲོ།།འཁོར་བ་སྙིང་པོ་མེད་པའི་ཆོས།།སྙིང་མེད་སེམས་ཅན་སུ་དགའ་ཁྱེར།།རྣལ་འབྱོར་ང་ཐར་པ་སྒྲུབ་ཏུ་འགྲོ།།སྤྲང་རི་ཁྲོད་ཟིན་པར་བྱིན་གྱིས་རློབས།།
