全县各族干部群众：
འཆལ་གཏམ་གཏན་འགོག་བྱས་ཏེ།
མི་རིགས་མཐུན་སྒྲིལ་ལ་སྲུང་སྐྱོབ་དང་།
དཔལ་འབྱོར་ཡོང་འབབ་ལ་འགན་སྲུང་བྱ།
——རྫོང་ཡོངས་ཀྱི་ལས་བྱེད་དང་རྒྱ་ཆེའི་མང་ཚོགས་རྣམས་ལ་སྤྲིངས་པའི་འཕྲིན།
རྫོངས་ཡོངས་ཀྱི་ལས་བྱེད་དང་རྒྱ་ཆེའི་མང་ཚོགས་རྣམས་པ།
ཉེ་ཆར།དྲ་ལམ་ཁག་ཏུ“ལྷ་སའི་ཟ་ཁང་ག་གེ་མོ་ཞིག་ཏུ་ཟ་མའི་ཁྲོད་དུ་མི་གཙང་བའི་དངོས་པོ་བསྲེས་པའི”འཆལ་གཏམ་བསྒྲགས་ལ། སྤྱི་ཚོགས་ཁྲོད་དུ་ཤུགས་རྐྱེན་མི་ལེགས་པ་མང་པོ་ཐེབས།དོན་དེ་བྱུང་རྗེས་སྤྱི་བདེ་ལས་ཁུངས་ཀྱིས་དྲ་ལན་ཁག་ཏུ་ཁྱབ་པའི“ལྷ་སའི་ཟ་ཁང་ག་གེ་མོ་ཞིག་ཏུ་ཟ་མའི་ཁྲོད་དུ་མི་གཙང་བའི་དངོས་པོ་བསྲེས་པའི”དོན་དེར་རྟོག་དཔྱོད་བྱས་ཏེ།དེ་ནི་མི་རེ་འགས་འཆལ་གཏམ་བཟོས་པ་ཡིན་པ་ཐག་གིས་བཅད།<<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་སྲུང་དོ་དམ་ཆད་གཅོད་ཁྲིམས་ཡིག>>གི་ཐག་གཅོད་ལྟར།འབྲེལ་ཡོད་མི་སྣ་སྲིད་འཛིན་བཀག་ཉར་བྱས།འཆད་གཏམ་ནི་འཆལ་གཏམ་རང་ཡིན་པས་ནམ་ཞིག་གི་ཚེ་དོན་དངོས་དང་ཁ་གཏད་ན་གཟིག་ལྤགས་བཀབ་པའི་བོང་བུ་བཞིན་རང་གཟུགས་ཕྱི་རུ་མངོན་ཡོང་།སེམས་རྒྱ་ཡངས་ལ་བླང་དོར་གྱི་གནས་ལ་མཁས་པའི་རྩེ་ཁོག་གི་ལས་བྱེད་པ་དང་མང་ཚོགས་ཤིག་ཡིན་པའི་ཆ་ནས།ང་ཚོས་ཁྱེད་རྣམས་ཀྱིས་བླང་དོར་གྱི་རིག་པ་གསལ་གསལ་དང་རྫུན་གཏམ་གཏན་འགོག་གི་འདུ་ཤེས་མཐོ་རུ་བཏང་སྟེ་དྲ་རྒྱའི་སྟེང་འཆལ་གཏམ་གཏན་འགོག་བྱ་རྒྱུར་འབོད་སྐུལ་བཏང་བ་ལགས།རྫོང་ཡོངས་ཀྱི་ལས་བྱེད་དང་རྒྱ་ཆེའི་མང་ཚོགས་རྣམས་ཀྱིས་དཔུང་བ་མཉམ་གཤིབ་དང་མཐུན་སྒྲིལ་གྱི་ཨ་ལོང་གཅིག་ཏུ་སྒྲིལ་ཏེ་ནུས་ཤུགས་ཡོད་རྒུས་མི་རིགས་མཐུན་སྒྲིལ་གྱི་གནས་བབ་བཟང་པོར་སྲུང་སྐྱོབ་དང་དར་སྤེལ་བྱེད་དགོས།
ང་ཚོས་མི་ཚང་མས་འཆད་གཏམ་གཏན་འགོག་གི་འདུ་ཤེས་མཐོ་རུ་བཏང་སྟེ།བསམ་བློའི་རྩ་བ་བརྟན་པོར་གཏོང་བར་སྐུལ་འདེད་བྱེད།ཁ་ཆེ་ཟས་རིགས་ཀྱིས་དུས་དང་རྣམ་པ་ཀུན་ཏུ་ལྷག་བསམ་རྣམ་དག་གིས་ཚོང་གཉེར་དང་།སྤུས་ཚད་ལ་ཁག་ཐེག་བྱེད་པའི་རྩ་དོན་གཞིར་བཟུང་སྟེ།རྒྱ་ཆེའི་འཛད་སྤྱོད་པ་རྣམས་ལ་བདེ་ཐང་།འཕྲོད་བསྟེན། ཚད་གཞི་དང་མཐུན་པའི་ཟས་རིགས་ཞབས་ཞུ་བསྒྲུབ་ཀྱིན་ཡོད།དྲ་རྒྱའི་སྟེང་གི་འཆལ་གཏམ་ལ་རྫོང་ཨུ་དང་རྫོང་མི་དམངས་སྲིད་གཞུང་གིས་མཐོང་ཆེན་བྱེད་བཞིན་ཡོད་ལ།གང་མྱུར་སྒོས་རྫོང་ཡོངས་ཀྱི་ཁ་ཆེ་ཟས་རིགས་ཀྱི་ཟ་ཁང64ལ་ཞིབ་བཤེར་བྱས་ནས།འཆལ་གཏམ་དེ་དོན་དངོས་མིན་པ་ར་སྤྲད།རྫོང་ཡོངས་ཀྱི་ལས་བྱེད་མི་སྣ་དང་རྒྱ་ཆེའི་མང་ཚོགས་རྣམས་ཀྱིས་རྫུན་གཏམ་གཏན་འགོག་དང་།འཆལ་གཏམ་ལ་ཡིད་མི་ཆེས་པ་དང་།འཆད་གཏམ་མི་བཟོ་བ།འཆད་གཏམ་མི་སྒྲོག་པར་ཕན་ཚུན་ལ་ཡིད་ཆེས་དང་།ཕན་ཚུན་ལ་གུ་ཡངས།ཕན་ཚུན་ལ་རྒྱུས་ལོན་བཅས་བྱས་ཏེ་འཆམ་མཐུན་གྱི་ཁོར་ཡུག་ཅིག་བསྐྲུན་པར་འབད་པ་བྱེད་རྒྱུའི་རེ་བ་བཏོན་པ་ལགས།
ང་ཚོས་མི་ཚང་མས་མི་རིགས་སོ་སོའི་གོམས་སྲོལ་ལ་བརྩི་བཀུར་བྱས་ཏེ།མཉམ་དུ་མི་རིགས་མཐུན་སྒྲིལ་ལ་སྲུང་སྐྱོང་བྱེད་པར་སྐུལ་མ་བྱེད།གནའ་སྔ་མོ་ནས་བཟུང་རང་རྫོང་གི་རིགས་སོ་སོའི་རྒྱ་ཆེའི་མང་ཚོགས་རྣམས་ཀྱིས་ཕན་ཚུན་ལ་རྒྱུས་ལོན་དང་།ཕན་ཚུན་ལ་བརྩི་བཀུར།ཕན་ཚུན་ལ་སྐུལ་འདེད་བྱས་ཏེ་འཆམ་མཐུན་མཉམ་གནས་ཀྱི་ཁོར་ཡུག་བཟང་པོ་ཞིག་བསྐྲུན་ཡོད།2023ལོར་རང་རྫོང་གིས་རྒྱལ་ཡོངས་ཀྱི་མི་རིགས་མཐུན་སྒྲིལ་དཔེ་མཚོན་ཁུལ་རྒྱལ་ཁའི་ངང་བསྐྲུན་ལ།འདི་ནི་རྫོང་ཡོངས་ཀྱི་མི་རིགས11དང་མི་གྲངས་ཁྲི8ལྷག་གི་ཐུན་མོང་འབད་འཐབ་ཀྱི་འབྲས་བུ་ཡིན།རྫོང་ཡོངས་ཀྱི་ལས་བྱེད་པ་དང་རྒྱ་ཆེའི་མང་ཚོགས་རྣམས་ཀྱིས་སེ་འབྲུའི་འབྲས་བུ་ཇི་བཞིན་རྡོག་རྩ་གཅིག་ཏུ་བསྒྲིལ་ཏེ།ནུས་ཤུགས་ཡོད་རྒུས་ཀྲུང་ཧྭ་མི་རིགས་ཀྱི་ཕུལ་བྱུང་རིག་གནས་ཁྱབ་སྤེལ་དང་།རིགས་སོ་སོའི་རིག་གནས་ཡུལ་སྲོལ་ལ་བརྩི་བཀུར།མི་རིགས་མཐུན་ལ་ཕན་པའི་སྐད་ཆ་བཤད་ཅིང་མི་རིགས་མཐུན་སྒྲིལ་ལ་ཕན་པའི་དོན་བསྒྲུབ་ནས།ཀྲུང་ཧྭ་མི་རིགས་ཐུན་མོང་སྤྱི་མཐུན་ཚོགས་པའི་འདུ་ཤེས་སྲ་བརྟན་དང་མི་རིགས་མཐུན་སྒྲིལ་ལ་སྲུང་སྐྱོབ་བྱེད་པའི་རེ་བ་བཏོན་པ་ལགས།
ང་ཚོས་ཚང་མས་རང་ཉིད་ནས་འགོ་བརྩམས་ཏེ།དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བར་རེ་འབོད་བྱེད།ང་ཚོས་ནམ་ཡང་ཆེས་གཟབ་ནན་གྱི་ཚད་གཞི་དང་།ཆེས་ནན་ཏན་གྱི་ལྟ་རྟོག་དོ་དམ།ཆེས་གཟབ་ནན་གྱི་ཆད་གཅོད་དང་འདྲི་གཅོད་ལ་བརྟེན་ནས་ཟས་རིགས་བདེ་འཇགས་ཀྱི་ཆུ་ཚད་མཐོར་འདེགས་བཏང་སྟེ།ཟས་རིགས་ཁྲོམ་རའི་དོ་དམ་ཇེ་བཟང་དང་།ཁ་ཆེ་ཟས་རིགས་ཀྱི་ལྟ་རྟོག་དོ་དམ་ཤུགས་ཆེར་བཏང་ནས་རྒྱ་ཆེའི་འཛད་སྤྱོད་པ་རྣམས་ལ་སྤུས་ལེགས་འཕྲོད་བསྟེན་གྱི་ཟ་འཐུང་བྱེད་སའི་ཁོར་ཡུག་ཅིག་བསྐྲུན་ཅི་ཐུབ་བྱེད་ཀྱིན་ཡོད། རྫོང་ཡོངས་ཀྱི་ལས་བྱེད་མི་སྣ་དང་རྒྱ་ཆེའི་མང་ཚོགས་རྣམས་ཀྱིས་བླང་དོར་གསལ་འབྱེད་བྱས་ཏེ།རང་འགུལ་སྒོས་ཁ་ཆེ་ཟས་རིགས་ཀྱི་ཟ་ཁང་དུ་སོང་ནས་ཟ་མ་བཟའ་བའི་རེ་བ་ཞུ།གལ་སྲིད་ཟས་རིགས་བདེ་འཇགས་དང་འབྲེལ་གནད་དོན་ཤེས་རྟོགས་བྱུང་ཚེ་སྲིད་གཞུང་ཞབས་ཞུའི་ཨང་གྲངས་“12345”ལ་ཁ་པར་བཏང་ནས་གཏུག་བཤེར་བྱས་ཏེ་ང་ཚོས་མཉམ་དུ་ཁྲོམ་རའི་སྒྲིག་ལམ་ལ་སྲུང་སྐྱོང་དང་དཔལ་འབྱོར་སྤྱི་ཚོགས་ཀྱི་སྤུས་ཚད་མཐོ་རུ་གཏོང་།
སྣ་མའི་མེ་ཏོག་ལེགས་བཀབ་ཀྱང་།།དྲི་ཞིམ་ཀུན་ཏུ་ཁྱབ་པར་འགྱུར།།རྫོང་ཡོངས་ཀྱི་ལས་བྱེད་མི་སྣ་དང་རྒྱ་ཆེའི་མང་ཚོགས་རྣམས་ཀྱིས་སེམས་རྩ་གཅིག་ཏུ་ཕྱོགས་ཅིང་།རྡོག་རྩ་གཅིག་ཏུ་སྒྲིལ་ནས་འཆམ་མཐུན་མཉམ་གནས་ཀྱི་སྤྱི་ཚོགས་དང་མཛེས་སྡུག་གི་ཁྱིམ་གཞིས་ཤིག་བསྐྲུན་པར་བརྩོན་པ་བྱེད།
ཀྲུང་གུང་རྩེ་ཁོག་རྫོང་ཨུ་ཡོན་ལྷན་ཁང་།
རྩེ་ཁོག་རྫོང་མི་དམངས་སྲིད་གཞུང་།
2024ལོེའི་ཟླ11པའི་ཚེས15ཉིན
