مۇحتار شاحانوۆ اعامىزبەن ارماندا كەتكەن كۇلاندا…
مەنىڭ شىعارماشىلىق ومىرىمە ۇلكەن ءىز قالدىرعان ادامنىڭ ءبىرى - تولەگەن ايبەرگەنوۆ ەدى. بار-جوعى جيىرما توعىز جاسىندا قازاق پوەزياسىنىڭ اسپانىنان قۇيرىقتى جۇلدىزداي اعىپ وتكەن ارقالى اقىن ادەبيەتىمىزگە وزگەشە تولقىن، جاڭاشا لەپ اكەلگەن-دى. ول مەنەن بەس-اق جاس ۇلكەن بولاتىن. العاشقى ولەڭدەرىم باسپاسوزدە جاريالانعان سوڭ، ءوزى ىزدەپ كەلىپ تانىسقان.
بۇيرا شاشتى، كەڭ ماڭدايلى، قاعىلەز قارا جىگىتتىڭ دارىندى دا ارىندى شاعى، دوستىققا قۇشتار كوڭىلى مەنى بىردەن وزىنە باۋراپ الا جونەلدى.
- ءسوز ايتىپ جۇرگەن قىزىڭ بار ما؟- دەپ سۇرادى ول ءبىر كۇنى.
مەن ءبىر-ەكى اۋىز ءسوز بەن كۇلاندا تۋرالى حابار بەردىم.
- ەندەشە تانىستىرشى،- دەدى قيىلىپ.
- توكە، ەرتەڭ، جوق، ارعى كۇنى ەكىنشى ماۋسىم، مەنىڭ تۋعان كۇنىم عوي. سونى سىلتاۋ ەتىپ شاقىرىپ، تانىستىرايىن.
ايتپەسە تىم ۇيالشاق، كەلە قويار ما ەكەن،- دەدىم.
- جارايدى، ساپارىمنان تاعى ءبىر كۇن كەشىگەرمىن. تۋعان كۇنىڭدى توسامىن،- دەپ، قايران اق كوكىرەك اقىن سالعاننان كەلىسە كەتتى.
ۋادەلى كۇنى ۇشەۋمىز قالا سىرتىنا شىقتىق. كوگالعا گازەت جايىپ، ۇستىنە اپام ادەيى ءپىسىرىپ بەرگەن ەتتى دۇكەننەن ساتىپ العان ءۇش شولمەك ليموناد پەن توكەڭە ارناپ الىنعان ەكى شولمەك سىرانى قويدىق. توكەڭ تۋعان كۇنىمە ارناپ ەكى كىتاپ سيلادى. ءالى ەسىمدە، ءبىرى كوۆشار دەگەن اۆتوردىڭ "ىلە اتاۋىنىڭ قۇستارى"، ەكىنشىسى "تاسباقانىڭ تۇرلەرى" دەگەن كىتاپ.
بولاشاق ۇلكەن اقىندىقتان دامەلى بولىپ جۇرگەن مەن:
- توكە، ءىنىڭىزدى مال دارىگەرلىك ينستيتۋتتىڭ ستۋدەنتىمەن شاتاستىرىپ العان جوقسىز بار؟- دەگەن ازىلىمە ول:
- اقىن بولۋ ءۇشىن، اينالاڭداعى تىرشىلىكتىڭ ءبارىن دە جەتە زەرىتتەپ، ءبىلۋىڭىز پارىز. ايتپەسە، كوپ نارسەدەن ۇتىلاسىڭ،- دەدى. بۇل ءسوزدى كۇلاندا دا قۋاتتاي كەلىپ:
- مەن دە سىزگە كىتاپ سيلاعالى تۇرمىن. بۇل شىعارمالاردىڭ اۆتورى مەنىڭ تۋعان جەرىمە كورشىلەس جاتقان باۋىرلاس قىرعىز ەلىندەگى شەكەر اۋىلىنىڭ پەرزەنتى. جامبىل قالاسىنداعى مال دارىگەرلىك تەحنيكۋمدى بىتىرگەن شىڭعىس ايتماتوۆ دەگەن جازۋشى.
ءسويتىپ، "تاۋ مەن دالا حيكايالارى" دەپ اتالاتىن ورىس تىلىندە شىققان كىتاپتى ۇسىندى.
سول كۇنى تولەگەن ەكەۋمىز كۇلاندانىڭ جىلتىراق قىزىل داپتەرىنە ولەڭمەن قولتاڭبا قالدىردىق. توكەڭ ەرەكشە تولقىپ، بولاشاق كەلىنىنە التى شۋماق ججىر ارناعان. ال مەن بولسام مىنا جولداردى ءتۇسىردىم:
" ءبىر باقىتتى شۋاق كوردىم كوزىڭنەن،
ءبىراق سونى كىم بار ەكەن تۇسىنگەن؟!
باقىتتىمىن، اياۋلى ءانىم، وزىڭمەن،
ويدا جوقتا تانىسقانىم ءۇشىن مەن.
كۇندەر بۇركەپ جاتىر ەسكى ىزدەردى،
كۇرسىنەم دە، ساعان سەزىم ارتامىن.
ويدا جوقتا قوسقان تاعدىر بىزدەردى،
ويدا جوقتا بولەمە دەپ قورقامىن"
ىمىرت ۇيىرىلە تولەگەندى شىمكەنت اۆتوبوكزالىنا ۇزاتىپ سالاىق. اۆتوبۋس قوزعالاردىڭ الدىندا توكەڭ مەنى كۇلاندادان ءبىر ءسات ءبولىپ الىپ شىقتى دا:
- قۇسىڭ قۇتتى بولسىن! ناعىز اقىنعا جار بولار تەرەڭ سەزىمدى قىز ەكەن. كوز جازىپ قالا كورمە،- دەپ قۇلاعىما سىبىرلادى.
جالعىز انام بولسا اۋىرۋ، ءجيى-ءجيى توسەك تارتىپ، جاتىپ قالادى. باسقا سەنەر اعايىن تۋىس كەم. نەدە بولسا ۇيلەنەيىن. كۇلاندامەن باس قوسىپ، ەل قاتارلى ءتۇتىن تۇتەتەيىن،- دەپ وزىمشە جوسپار قۇرىپ، ىشكى ويلارىممەن ارپالىسىپ جۇرگەن كەزىمدە كۇلاندا:
- ءسىز وسى تۇسكە سەنەسىز بە؟- دەپ سۇرادى.
- جوق.
- ەكەۋمىز قوسىلا المايتىن سياقتىمىز،- دەدى سالدەن سوڭ ەلەۋسىز عانا. - نەگە ەكەنىن قايدام، ماعان سولاي كورىنەدى.
داۋىسىندا ءبىر دىرىل بارىن اڭعاردىم.
- وتكەندە ماعان ارناعان ولەڭىڭىزدە:
"ويدا جوقتا قوسقان تاعدىر بىزدەردى،
ويدا جوقتا بولە مە دەپ قورقامىن" دەگەنىڭىز، مۇمكىن شىندىققا اينالار…
كەيىننەن كۇلاندا
