གནའ་གྲོང་ས་སྐྱའི་མཛེས་ལྗོངས་ཁུལ་དང་ས་སྐྱ་དགོན་མཛེས་ལྗོངས་ཁུལ་ཕྱི་ཕྱོགས་སུ་སྒོ་འབྱེད་མཚམས་འཇོག་བྱ་རྒྱུའི་སྐོར་གྱི་སྤྱི་བསྒྲགས།
གཞིས་རྩེ་གྲོང་ཁྱེར་དིང་རི་རྫོང་དུ་ཟླ་༡པོའི་ཚེས་༧ཉིན་གྱི་ཆུ་ཚོད་༩དང་སྐར་མ་༥ཐོག་ས་ཡོམ་རིམ་པ་༦.༨བྱུང་ཡོད་པས། ཡུལ་སྐོར་བ་དང་། གནས་མཇལ་བ། དེ་བཞིན་ལས་དོན་མི་སྣའི་ཚེ་སྲོག་དང་རྒྱུ་ནོར་བདེ་འཇགས་ལ་འགན་ལེན་བྱ་ཆེད། ས་སྐྱ་གནའ་གྲོང་མཛེས་ལྗོངས་ཁུལ་དང་ས་སྐྱ་དགོན་པའི་མཛེས་ལྗོངས་ཁུལ་གཉིས་སུ་༢༠༢༥ལོའི་ཟླ་༡ཚེས་༧ཉིན་ནས་བཟུང་ཕྱི་ཕྱོགས་ལ་སྒོ་འབྱེད་མཚམས་འཇོག་བྱ་རྒྱུ་ཡིན། དེ་ཡང་མིག་སྔའི་གནས་སྐབས་མཚམས་འཇོག་དུས་ཚོད་ནི་༢༠༢༥ལོའི་ཟླ་༡ཚེས་༧ཉིན་ནས་ཚེས་༡༣ཉིན་བར་ཡིན་པ་དང་། མངོན་མེད་རྐྱེན་ངན་ཞིབ་བཤེར་ལས་དོན་དང་དཔྱད་དཔོག་ལས་དོན་ལེགས་སྒྲུབ་བྱུང་རྗེས་སྒོ་འབྱེད་དུས་ཚོད་ལོགས་སུ་བརྡ་ཐོ་གཏོང་རྒྱུ་ཡིན།རྒྱ་ཆེའི་ཡུལ་སྐོར་བ་དང་མཆོད་མཇལ་ཞུ་མཁན་རྣམས་ཀྱིས་ལམ་ཐིག་ལེགས་སྒྲིག་གང་ལེགས་གནང་རོགས་ཞུ་རྒྱུ་དང་། འདིའི་རྐྱེན་གྱིས་སྐུ་ཉིད་ལ་སྟབས་བདེ་མེད་པ་བྱུང་བར་དགོངས་བཞེས་གནང་རོགས་ཞུ་རྒྱུ་ཡིན། ས་སྐྱ་རྫོང་རིག་གནས་དང་ཡུལ་སྐོར་ཅུས་ནས།༢༠༢༥ལོའི་ཟླ་༡པོའི་ཚེས་༧ཉིན།
