周润发挑战半马 亲揭大腿“乒乓球”真相 拒开Ig免麻烦 笑唐诗咏“大镬”
影帝周润发（发哥）昨晚（5日）偕“发嫂”陈荟莲出席“CHANEL 2024/25 早春度假系列”时装，同场还有韩国男团BigBang成员G-Dragon（GD）﹑刘嘉玲﹑陈法拉﹑西班牙女星彭妮露古丝（Penelope Cruz）﹑冯德伦﹑陈蕾和汤令山等，发哥以专业学者造型现身，笑称自己变了跑步教授。
发哥表示明年挑战渣马的半马赛事：“呢个係我极限，再跑全马死得。（操练如何？）日日都跑10K﹑8K。”
早前发哥跑步时被发现大腿两处凸起如乒乓球，他轻鬆回应：“我自己搵个槌揼到肿咗，成日跑到肿，咪揼佢囉，唔会痛，我会搵啲油捽两捽就散，好简单，一啲唔複杂，但要小心，大到似乒乓波可以接受，如果好似网球咁大个，就要入院，𠵱家仲未够大，如果跑得多就细番，唔跑就变大。”
对于网民看到后大为担心？发哥笑说：“佢哋白内障冇割，睇唔清楚，又唔同佢讲得，咁先惨。（那是什麽？）皮下脂肪嚟嘛，男人有啲病叫‘小肠气’，嗰啲气谷住喺度呀嘛，条气顶住好唔舒服，今晚睇完骚会冇事。”
另外，GD今晚亦现身，发哥曾在MAMA颁奖礼跟GD见过面，他说：“今晚再见返佢，唔知佢后生咗定我后生咗，阵间同佢影张相先，佢一人嚟咋？我冇Ig，我仲揸紧NOKIA。（开Ig？）千祈唔好搞，我都唔想畀人知我係边？我点会想畀人知我喺边？
（可以迟Post？成日畀人见到？）唔觉意撞到冇所谓，特登Post然后叫人去影就唔好啦﹗好鬼忙㗎嘛，我又走到成身臭，唔好呀，影响市容，吓亲观众，唔好话畀人听我去边跑，我去跑嘅都係荒山野岭。”
早前发哥被发现和视后唐诗咏跑步，其间他还帮对方拉筋及鬆骨？发哥笑说：“佢（诗咏）大镬呀﹗冇得救呀，佢病入膏肓，就嚟死得。（周大夫觉得她没得救？）尽人事啦，睇佢畀得几钱我。（收费如何？开个价？）佢有啲游魂。（游魂唔关伤身事？）唔係，佢撞得嘢多，咪硬晒囉，我唔係医咁简单，我捉鬼㗎嘛。
（几耐先好返？）佢有啲喜事会好好多，（男士嗰啲阳气呢？）我冇问过。（感唔感觉到？）唔会问呢啲嘢，知道都唔讲，我哋好正经，只係跑步同医病。”
