视后胡定欣联同萧正楠、罗天宇及罗毓仪等，昨日（9日）现身荃湾宣传无綫台庆剧《巾帼枭雄之悬崖》。台上玩游戏众演员分批“示爱”，其中定欣揽实康华兼送花，康华则大赞定欣可爱像卡通人物翠儿，而谢雪心与罗毓仪齐献舞，一大一小志趣相投约定稍后齐齐去Cosplay，相当搞笑。定欣与萧正楠事后齐齐受访。谈到日前剧情交代她于桥边向黎耀祥示爱被拒，失平衡跌落海边，令人担心她拗柴，定欣坦言拍摄这场戏印象相当深刻：“本来有安排替身，但都想观众见到七爷（角色名字）有几狼狈，所以决定自己做番。黎耀祥有担心我嘅，我就贴晒胶布、做晒防御措施，结果好顺利。（嚟紧唔会再向佢示爱？）仲畀机会佢拒绝我咩？哈哈！”
至于现实生活会否主动向男生示爱，定欣说：“如果我表白得，都应该知道对方同样喜欢自己。大家都有意行前少少，唔使讲得好清楚嘅。七爷都系觉得十七（黎耀祥角色）嘅关心包含着爱意，但碍于七爷嘅身份地位，所以咪选择开声啰，点估到十七开边瓣（拒绝）？（嚟紧预告系调番转佢向你告白。）系呀，结局系喺稻田间拍嘅，同之前我哋喺《公公出宫》结局有异曲同工，觉得系种缘分，我会视为系一次嘅呼应。同埋想讲嗰场戏我哋化咗个老妆，系咁追住日落嚟跑。”
萧正楠即搭嘴打趣：“你同黎耀祥合作咗8次，冥冥中系有啲嘢嘅，如果有第二个平行时空，可能可能我嗌你做⋯阿嫂，哈哈！”定欣接口：“黎耀祥系我一位好好嘅老师，我同佢今世只可以亦师亦友，佢嘅缘分去咗太太度。”萧正楠补充：“我都好锺意黎耀祥嗰Type㗎，因为佢嘅生活态好Chill。”当被问到当日追黄翠如时，是否一早已十拿九稳，萧正楠笑答：“大家都知有啲Feel嘅，我好有信心㗎。佢去咗采访世界杯，我有短讯佢，佢又买手信返嚟畀我，咪约出嚟食饭啰。（短讯佢都系搵嘢嚟讲啫。）咁我都控制唔到自己喎。（点确立关系？）都系嗰啲嘢啦，拖吓手话好攰呀！”二人感情至今已经历了10个年头，他坦言最爱与太太出埠旅行：“佢会带我去啲隐世地方，又真系好靓好浪漫，大家都好开心。”
