佢哋係南洋派對。我幾鍾意嘅一隊香港樂隊。之前都有介紹過啦，有冇印象？冇？甚至從來冇聽過？咁一齊聽聽。
我鍾意嘅樂隊類型比較多，聽得比較雜，就香港樂隊而言，好多時候，佢哋都有一個共同點：非常香港，本土味極濃。往往最在地最具魅力，更吸引到我。
譬如南洋派對新歌《冷氣機滴水》就非常正宗地道。「滴水之恩，當湧泉相報 咁冷氣機滴水呢 就一於投訴」。深受冷氣機滴水煩惱嘅朋友應該聽到非常有共鳴，但呢個煩惱可能喺高樓密集嘅香港表現得更加明顯。
冷氣機滴水，如果聽得特別清楚，三更半夜係會造成好大嘅困擾。講到底即係噪音污染嘅一種，但即使是「點滴在心頭」，搞到個人非常煩躁，忍無可忍選擇去投訴，但又未知幾時可以搞返好佢，煩惱持續升級，嬲到想拆天。每一個炎熱夏日夜晚，冷氣機都會準時開「演唱會」，滴滴滴滴滴滴滴滴滴滴，滴入你嘅腦海裡。
南洋派對呢首歌，非常出色演繹出深受冷氣機滴水困擾人嘅心聲，無奈、憤怒、苦笑，但同時都添加咗點滴搞怪、黑色幽默喺歌曲裡面。歌曲音樂性非常豐富，風格多元，可以聽到好多嘢，既有實驗性嘅自由奔放，又兼具有設計巧妙嘅節奏變化。
聽第一次你可能未必聽到太多感受，聽多幾次會發現到編曲很精緻，認真地無厘頭道出歌曲令人忍俊不禁又苦惱嘅實情。
香港法例規定，任由冷氣機滴水滋擾他人乃屬違法，一經定罪，最高罰款一萬元。一萬元，一萬元，一萬元，究竟有無人定罪過？哈哈😂。
晚安。佢哋係南洋派對。
鍾意本篇推文，支持撻著廣東歌，按分享、點讚/在看、文末「喜歡作者」課金💰支持。
個MV好正，最好可以去佢哋YouTube頻道 CLS。
🎬《冷氣機滴水》MV
圖源：南洋派對IG
