དབྱང་ཝུའུ་ཡིས་གཙོས་གྲོང་ཁྱེར་དུ་ལོ་སར་སྐབས་ཀྱི་ཚོང་རའི་མཁོ་འདོན་འགན་ལེན་སོགས་ཀྱི་བྱ་བར་ཞིབ་བཤེར་དང་མཛུབ་ཁྲིད་བྱས།
ཟླ2པའི་ཚེས1ཉིན་ཏེ་ལུགས་རྙིང་གི་ལོ་སར་ཚེས་བཞིའི་ཉིན་ལ། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་དབྱང་ཝུའུ་ཡིས་ལོ་སར་སྐབས་ཀྱི་ཚོང་རའི་མཁོ་འདོན་འགན་ལེན་སོགས་ཀྱི་བྱ་བར་ཞིབ་བཤེར་དང་མཛུབ་ཁྲིད་བྱས་ཏེ་ཁུལ་ཡོངས་ཀྱི་མི་རིགས་སོ་སོའི་མི་དམངས་མང་ཚོགས་ལ་ལོ་སར་གྱི་བཀྲ་ཤིས་སྨོན་འདུན་ཞུས།
དབྱང་ཝུའུ་ཁྲེན་ཚང་གི་དུ་ཆང་ཚོང་ཁང་དང་གཙོས་གྲོང་ཁྱེར་ལའོ་ཆའོ་སིལ་ཏོག་ཚོང་ཁང་དུ་སོང་ནས་ལོ་སར་སྐབས་ཀྱི་ཅ་དངོས་ཕྱིར་འཚོང་དང་ཚོང་རྫས་མཁོ་འདོན་སོགས་ཀྱི་གནས་ཚུལ་འདྲི་རྩད་ཞིབ་མོ་བྱས། ཁོས་འབྲེལ་ཡོད་སྡེ་ཁག་གིས་ལོ་སར་སྐབས་ཀྱི་ཚོང་རའི་མཁོ་འདོན་འདང་ངེས་དང་རིན་གོང་གཏན་འཇགས་འགན་ལེན་བྱེད་པ་དང་། བཟའ་བཏུང་བདེ་འཇགས་སྤུས་ཚད་ཀྱི་འགག་སྒོ་ནན་མོར་སྲུང་བ། འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱས་ཏེ། རྒྱ་ཆེ་བའི་མི་དམངས་མང་ཚོགས་ལ་བདེ་འཇགས་དང་གོ་རིམ་ལྡན་པ། སྟབས་བདེ་བཅས་ཀྱི་ཉོ་སྒྲུབ་ཁོར་ཡུག་ཅིག་བསྐྲུན་དགོས་ཞེས་ནན་གྱིས་བསྟན།
དབྱང་ཝུའུ་ཡིས་ད་དུང་ཁུལ་སྲིད་གཞུང་གི་སྤྱི་ཁྱབ་ལས་རེས་ཁང་དུ་ལོ་སར་སྐབས་ཀྱི་ལས་རེས་གནས་ཚུལ་ལ་ཞིབ་བཤེར་དང་མཛུབ་ཁྲིད་བྱས་ཤིང་། ཁོས་མཐུན་སྦྱོར་གཞོགས་འདེགས་ལ་ཤུགས་བསྣན་ཏེ་གློར་བྱུང་གི་གནས་ཚུལ་ལ་དུས་ཐོག་དང་ནུས་མཐོའི་སྒོས་ཐག་གཅོད་འོས་འཚམ་བྱས་ཏེ་སྤྱི་ཚོགས་ཀྱི་ཁྱོན་ཡོངས་བརྟན་ལྷིང་དང་མང་ཚོགས་བདེ་ཞིང་སྐྱིད་པའི་ལོ་སར་ཞིག་རོལ་ཐུབ་པར་ནུས་ཤུགས་ཡོད་རྒུས་འགན་སྲུང་བྱ་དགོས་ཞེས་ནན་གྱིས་བསྟན།
ཁུལ་དཔོན་གཞོན་པ་ཡུས་ཅུན་ཕེང་དང་ཁུལ་སྲིད་གཞུང་གི་དྲུང་ཡིག་ཆེན་མོ་རྟ་མགྲིན་སྐྱབས་གཉིས་ཞིབ་བཤེར་དུ་འགྲོ་རོགས་བྱས།
ལོ་ཙཱ་བ། རིན་ཆེན་སྐྱིད།
