བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་འཛུགས་གཏོད་བྱེད་རྒྱུའི་སྲོལ་ཡིག
ལེའུ་བདུན་པ། བཅའ་ཁྲིམས་ཀྱི་འགན་འཁྲི།
དོན་ཚན་ཞེ་བཞི་པ། རྒྱལ་ཁབ་ཀྱི་ལས་དོན་མི་སྣས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་འཛུགས་གཏོད་བྱེད་པའི་ཁྲོད་འགན་དབང་གང་བྱུང་དུ་སྤྱོད་པ་དང་། འགན་འཁྲི་སྣང་མེད་དུ་འཇོག་པ། ཉེར་ཕྱོགས་གཡོ་ཟོལ་བྱེད་པ་བཅས་ཀྱི་རིགས་ལ་ཁྲིམས་ལྟར་ཆད་པ་གཅོད་རྒྱུ་དང་། ཉེས་གསོག་གི་ཚད་ལ་སླེབས་ཚེ་ཁྲིམས་ལྟར་ཉེས་དོན་འགན་འཁྲི་བདའ་འདེད་གཏོང་རྒྱུ།
དོན་ཚན་ཞེ་ལྔ་པ། རྒྱལ་ཁབ་ལས་ཁུངས་དང་། སྤྱི་ཚོགས་ཚོགས་པ། ཁེ་ལས་བྱ་གཞག་ཚན་པ། དེ་བཞིན་སྤྱི་ཚོགས་རྩ་འཛུགས་གཞན་དག་བཅས་ལ་གཤམ་གསལ་གྱི་བྱ་་སྤྱོད་གྲས་ཤིག་ཡོད་ཚེ། དེའི་གོང་རིམ་གཙོ་འགན་སྡེ་ཚན་ནམ་ཡང་ན་ལྟ་ཞིབ་ལས་ཁུངས་ཀྱིས་དུས་བཅད་ནང་ལེགས་བཅོས་བྱེད་དུ་འཇུག་རྒྱུ་དང་། དུས་ཚོད་ཡོལ་ཡང་ལེགས་བཅོས་མ་བྱས་ཚེ་བརྡ་ཁྱབ་བཏང་ནས་སྐྱོན་བརྗོད་བྱེད་རྒྱུ་དང་ཆབས་ཅིག་འགན་འཁུར་བ་གཙོ་བོ་དང་། ཐད་ཀའི་འགན་འཁུར་བ། འབྲེལ་ཡོད་མི་སྣ་བཅས་ཀྱི་བབ་མཚུངས་ཀྱི་འགན་འཁྲི་བདའ་འདེད་གཏོང་རྒྱུ་སྟེ།
(གཅིག)མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་འཛུགས་གཏོད་བྱེད་པའི་ལས་དོན་གཏན་འབེབས་བཞིན་མ་སྤེལ་བའི་རྐྱེན་གྱིས་ཤུགས་རྐྱེན་ངན་པ་བཟོས་པའི་རིགས།
(གཉིས) མི་རིགས་མཐུན་སྒྲིལ་ཡར་ཐོན་ལ་ཤུགས་རྐྱེན་ངན་པ་བཟོ་བའི་འགལ་ཟླ་དང་རྩོད་རྙོག་དུས་ཐོག་ཏུ་ཐག་གཅོད་དང་འདུམ་སེལ་མ་བྱས་པའི་རྐྱེན་གྱིས་མཇུག་འབྲས་ཚབས་ཆེན་བཟོས་པའི་རིགས།
(གསུམ) སྲོལ་ཡིག་འདིའི་ནང་གཏན་འབེབས་བྱས་པའི་འགན་འཁྲི་གཞན་དག་ལག་བསྟར་མ་བྱས་པའི་རིགས་བཅས་སོ།
དོན་ཚན་ཞེ་དྲུག་པ། རྩ་འཛུགས་གང་ཞིག་དང་མི་སུ་ཞིག་ལ་གཤམ་གསལ་གྱི་བྱ་སྤྱོད་གྲས་ཤིག་ཡོད་ཚེ། དེ་གནས་སའི་ཚན་པ་དང་། འབྲེལ་ཡོད་སྡེ་ཚན་གྱིས་སྐྱོན་བརྗོད་དང་སློབ་གསོ་གཏོང་བ་དང་ལེགས་བཅོས་བྱེད་དུ་འཇུག་རྒྱུ། བདེ་འཇགས་དོ་དམ་དང་འགལ་བའི་བྱ་སྤྱོད་ཡོད་ཚེ། སྤྱི་བདེ་ལས་ཁུངས་ཀྱིས་ཁྲིམས་ལྟར་བདེ་འཇགས་དོ་དམ་གྱི་ཉེས་ཆད་གཅོད་རྒྱུ། ཉེས་གསོག་གི་ཚད་ལ་སླེབས་ཚེ་ཁྲིམས་ལྟར་ཉེས་དོན་གྱི་འགན་འཁྲི་བདའ་འདེད་གཏོང་རྒྱུ་སྟེ།
(གཅིག) མི་རིགས་མཐུན་སྒྲིལ་ཡར་ཐོན་ལ་གནོད་པའི་གཏམ་གླེང་སྤེལ་རིགས་བྱེད་པ།
(གཉིས) མི་རིགས་མཐུན་སྒྲིལ་ཡར་ཐོན་ལ་གནོད་པའི་ཆ་འཕྲིན་བཟོ་སྤེལ་བྱེད་པའི་རིགས།
(གསུམ) མི་རིགས་མཐུན་སྒྲིལ་ལ་གཏོར་བཤིག་གཏོང་བ་དང་། མི་རིགས་ཁ་ཕྲལ་གཏོང་བའི་ངལ་སྐུལ་བྱེད་པ། སྤྱི་ཚོགས་བརྟན་ལྷིང་ལ་གནོད་སྐྱོན་བཟོ་བ་བཅས་ཀྱི་བྱ་སྤྱོད་རིགས།
(བཞི) ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཁྲོད་ལངས་ཕྱོགས་བརྟན་པོ་མེད་པ་དང་རྣམ་འགྱུར་གསལ་པོ་མེད་པ། རྒྱལ་ཁབ་ཀྱི་བདེ་འཇགས་དང་མེས་རྒྱལ་གྱི་གོང་བུ་གཅིག་གྱུར་ལ་གནོད་འཚེ་གཏོང་བའི་བྱེད་སྤྱོད་ཡོད་པ་བཅས་སོ།
དོན་ཚན་ཞེ་བདུན་པ། སྲོལ་ཡིག་འདིའི་གཏན་འབེབས་ལས་འགལ་བའི་བྱེད་སྤྱོད་རིགས་ལ་བཅའ་ཁྲིམས་དང་ཁྲིམས་སྲོལ་གཞན་དག་ནང་ཉེས་ཆད་གཅོད་རྒྱུའི་གཏན་འབེབས་ཡོད་ཚེ་གཏན་འབེབས་དེ་བཞིན་ལག་བསྟར་བྱེད་རྒྱུ།
ལེའུ་བརྒྱད་པ། ཞར་བྱུང་།
དོན་ཚན་ཞེ་བརྒྱད་པ། སྲོལ་ཡིག་འདི་2020ལོའི་སྤྱི་ཟླ་5པའི་ཚེས་1ཉིན་ནས་བཟུང་ལག་བསྟར་བྱེད་རྒྱུ།
网信羌塘
主审：柳跟象
审编：旦珍
编辑：才白玛
来源：西藏自治区民族事务委员会
