گۈزەل ھايات 10-بۆلۈم4-قىسىم _قەلبى سەزمەس ئەر

 4-قىسىم

قەلبى سەزمەس ئەر

تازىمۇبىر، بۇ ئويۇن چەكتىن ئېشىپ كەتتىمۇ قانداق، مەۋلاننى ئويغىتالماي، ئەكسىچە بۇ ئايالنىڭ قاتتىق ئويغىنىپ كەتكىنى نېمىسى.

 - بالىنىچۇ؟ بالىنى قانداق قىلماقچى سىز؟  - دەپ سورىدى زەپەر.

زۇبەيدەنىڭ چىرايى سەل-پەل ئۆزگىرىپ، قولىنى سوزۇپ قورسىقىنى سىيلاپ سۈكۈتكە چۆكتى، ئۇنىڭ نېمە ئويلاۋاتقانلىقىنى بىلگىلى بولمىدى.

- بالا... - دېدى زۇبەيدە.

زەپەر كۆزىنىڭ قۇيرۇقىدا داچىنىڭ ئىشىكىدىن شىددەت ئاچچىقى  بىلەن چىقىۋاتقان  مەۋلاننى كۆرۈپ، قېشىنى ئېتىپ قويۇپ:

 -  زۇبەيدە، بەلكىم سىزنىڭ ئويىڭىز توغرا بولۇشى مۇمكىن. ئۆزىڭىزنى بۇنچە ئازابلاپ، چارچىتىپ يۈرگەندىن كۆرە، بالدۇرراق ۋاز كەچكىنىڭىز تۈزۈك، سىزنىڭ ھاياتىڭىزدا پەقەت بىرلا ئەر بولمايدۇ، يەنە سىزنىڭ شىركىتىڭىز، دوستىڭىز، بالىڭىز بار...  مەۋلان بولمىسىمۇ، سىزمۇ ئوخشاشلا ياخشى ياشىيالايسىز،  سىز  پەقەت كۆڭۈل-كۆكسىڭىز كەڭ تۇتسىڭىزلا، باشقىلار ئاندىن سىزنىڭ قەلبىڭىزگە كىرەلەيدۇ. ئۇنى مۇرادىغا يەتكۈزۈپ، ئۆزىڭىزگىمۇ بىر پۇرسەت  بېرىڭ... - دېدى.

زۇبەيدە ھاڭۋىقىپ تۇرۇپ ئاڭلىدى، ئاندىن گاڭگىراش ئىچىدە بېشىنى لىڭشىتىپ:

  -  دېگىنىڭىز توغرا  ... - دېدى.

سوغۇق ۋە كۈچلۈك بىر نەپەس ئاستا-ئاستا يېقىنلاپ كەلدى، زۇبەيدە بېشىنى بۇراپ، چىرايى  سەتلىشىپ كەتكەن مەۋلاننىڭ بۇ يەرگە قاراپ كېلىۋاتقانلىقىنى كۆردى.

ئۇ ئىختىيارسىز ھالدا ئىشىك تەرەپكە قارىدى، ئەمما ئامانگۈلنى كۆرمىدى.

ئۇنداق ئۇ بۇ يەرگە   كېلىپ نېمە قىلماقچى؟  ئامانگۈلنى ئۆيدە يالغۇز تاشلاپ قويدىمۇ؟

مەيلى مېھمان كۈتۈش جەھەتتە بولسۇن، ياكى قەلبىدىكى ئادەمگە بولغان مۇئامىلىسىدە بولسۇن، ئۇنىڭ بۇ يەردە پەيدا بولۇشى  نورمال ئەمەستۇ؟

ئۇنىڭ ئۈستىگە، ئۇنىڭ مومىسى بىلەن ئاپىسىنىڭ ئامانگۈلنى ياخشى كۆرمەيدىغانلىقىنى بىلمەسلىكى مۇمكىن ئەمەس ئىدى.

 ئۇنىڭ ئازار يەپ قېلىشىدىن ئەنسىرمەمدۇ؟

مۇشۇ خىياللارنى كاللىسىدىن ئۆتكۈزۈپ بولغۇچە، مەۋلان  كېلىپلا زۈبەيدەنىڭ قولىدىن تارتىپ باغرىغا باستى، چىرايى سوغۇق، نەپەس ئېلىشلىرى شۇنچىلىك جىددىي، ئەنسىز ئىدى!

- نېمىشقا يۈگۈرۈپ چىقىپ كېتىسىز؟ !- دەپ سورىدى مەۋلان. 

 زۇبەيدە بېشىنى كۆتۈرۈپ ئۇنىڭغا قاراپ قويۇپ، سۇس كۈلۈمسىرەپ:

- مۇشۇ تۇرقۇمدا يۈگۈرىيەلەمتىم!  - دېدى.

ئۇ ھازىر ھامىلىدار، يۈگۈرۈشكە قانداقمۇ جۈرئەت قىلالايدۇ؟

زۇبەيدەنىڭ كۆزى يەنىلا ئۇنىڭ نېپىز كىيىمىدە بىردەم توختاپ قالدى، ئەڭ ئاخىرىدا يەنىلا نەزىرىنى يىراق بولمىغان ئىشىك ئالدىغا قارىتىپ:

- بولامدۇ؟ - دېدى  سۇسقىنا قىلىپ،  -  ئۇنى ئۇ يەردە يالغۇز قويۇپ قويسىڭىز، مومام بىلەن ئاپامنىڭ ئۇنى تەڭلىكتە قويۇشىدىن قورقمامسىز؟ -  دېدى. 

مەۋلاننىڭ چىرايى سەل-پەل ئۆزگىرىپ، كۆزىنى قىسىپ زۇبەيدەگە قاراپ:

  -  شۇڭا، سىز مومام بىلەن ئاپامنىڭ ئۇنى تەڭلىكتە قويىدىغانلىقىنى بۇرۇنلا بىلدىكەنسىز - دە، تۇيۇقسىز يۈگۈرۈپ چىقىپ كېتىشىڭىزدىمۇ كەينىڭىزدىن  چىقىدىغانلىقىم ئالدىن پەرەز قىلىپ بوپسىز، ئەمەلىيەتتە ئۇلارغا يالغۇز قالىدىغان پۇرسەت قالدۇرۇپ، ئۇنى تەڭلىكتە قويماقچى شۇنداقمۇ؟  - دېدى .

زۇبەيدەنىڭ كۆزلىرى چاقناپ كەتتى، ئۇ بېشىنى بۇراپ مەۋلانغا ئىشەنمىگەن ھالدا قاراپ:

  -  بۇ نېمە دېگىنىڭىز؟ - دەپ سورىدى.

 -  توغرا ئويلاپسىز، ئۇلار ھەقىقەتەن ئۇنى تەڭلىكتە قويدى، ئەمما  سىز باشتىن-ئاخىر ھېچ ئىش قىلمايلا ئۇنى قىستاپ يىراقلارغا كەتكۈزۋېتەلەيسىز... - دېدى مەۋلان. 

زۇبەيدەنىڭ يۈرىكى تۇيۇقسىز سانجىلىپ ئاغرىدى، پۈتۈن بەدىنى تىترەپ كەتتى، كۆزلىرىمۇ ياشتا يالتىراپ قالدى.

ئۇ كۈچەپ چوڭقۇر نەپەس ئېلىپ، ئاستا چىقاردى، يەنە چوڭقۇر نەپەس ئالدى، يەنە چىقاردى...

بىر نەچچە قېتىم تەكرارلىغاندىن كېيىن، ئۇ ئاندىن كۆڭلىدىكى بارلىق كەيپىياتىنى بېسىۋېلىپ، ئاخىرىقى بىر قېتىم چوڭقۇر نەپەس ئېلىپ، بېشىنى كۆتۈرۈپ مەۋلانغا قاراپ:

-  خاتالاشتىڭىز. - دېدى زۇبەيدە ئاۋازىنى كونترول قىلىشقا تىرىشىپ، تەمكىن قىياپەتتە، - چۈنكى مەن ئەزەلدىن ئامانگۈلنى قىستاپ كەتكۈزۈۋېتىشنى ئويلاپ باقمىدىم. ئەكسىچە، مەن يەنە سىلەرنى مۇرادىڭلارغا يەتكۈزمەكچى. ئۇ بۇ يەردە تۇرسۇن، بۇ شەھەردە قالسۇن، يېنىڭىزدا قالسۇن، بۇ  ئۆيدە قالسۇن، مەن  كۆچۈپ چىقىپ كېتەي. مەۋلان، مېنىڭ ئەمدى سىز بىلەن بۇنداق ئۆتكۈم يوق، بىز ئاجرىشىپ كېتەيلى! - دېدى. 

گەرچە ئۇ كەيپىياتىنى كونترول قىلىشقا تىرىشقان بولسىمۇ، لېكىن سۆزىنىڭ ئاخىرىغا كەلگەندە ئاۋازىغا روشەن تىترەش ئارىلىشىپ كەتتى.

ئەمما ئۇنىڭ بۇ سۆزى شۇ تاپتا  غەزەپكە تولغان مەۋلاننى بىردىنلا قاتتۇرۇپ قويدى.

بىز ئاجرىشىپ كېتەيلى!

بۇ سۆزلەر ئۇنىڭ يۈرىكىگە قاتتىق ئۇرۇلغان ئېغىر بولقىغا ئوخشاش، ئۇنىڭ ئىچكى ئەزالىرىمۇ قېقىلىپ تىترەپ كەتتى.

ئۇنىڭ بۇ گېپى ھەقىقەتەن كەسكىن ھەم رەھىمسىزلىك بىلەن ئېيتىلىپ، ئاڭلىماققا ئازراقمۇ بۇرۇلۇش ئىمكانىيىتى يوقتەك قىلاتتى.

ئاجرىشامدۇ...

مەۋلان ئۇنىڭغا ھاڭۋىقىپ قاراپ، ئۇزۇنغىچە ئىنكاس قايتۇرالمىدى.

ئاجرىشايلى دېگەن بىر ئېغىز گەپ ئاغزىدىن چىققان شۇ دەقىقىدە، زۇبەيدەنىڭ يۈرىكىمۇ تەڭلا ئاغرىدى، ياق، ئۇنىڭ يۈرىكىگە سانسىزلىغان يىڭنە سانجىلىپ، ئاغرىقتىن نەپەس ئالالماي قالدى.

ئۇ ئاخىرى يەنىلا بۇ گەپنى ئاغزىدىن چىقاردى.

گەرچە ئۇ ئەينى چاغدا ئۆزى يالغۇز ئاشۇ قۇرۇق ئۆينى قوغدىغان، شۇنچە كۆپ ئادەمنىڭ غەلىتە نەزىرى ۋە سوغۇق مەسخىرىسىگە ئۇچرىغان بولسىمۇ،  كۆپ ئادەمنىڭ كۈلكىسىگە قالغان تەقدىردىمۇ، يېرىم كېچىدە ئۆزى يالغۇز ئازابلانسىمۇ، ئاجرىشىدىغان ئىشنى ئويلاپ باقمىغان.

چۈنكى ئېرىشىش ئاسان ئەمەس، ئۇ ۋاز كېچىدىغان گەپنى قىلىشقا قانداق چىدايدۇ.

ئەگەر ئاغزىدىن چىقارسا، ھەممە نەرسە يوقىلىدۇ، بۇ ھاياتتا، قايتا بىللە بولۇش پۇرسىتى بولمايدۇ.

بىراق، زۇبەيدە ئۇنىڭ ئۆزىنى ياخشى كۆرۈشىنى مۇشۇنداق كۈتۈپ تۇرسا بولمايدۇ، ئۇ مەۋلاننىڭ مىجەزىنىڭ قانچىلىك ياخشىلىنىپ كېتىشىنى، ئۆزىگە ھەر قانداق ئىشتا مۇلايىم مۇئامىلە قىلىشىنى ئۆتۈنمەيدۇ.

ئۇ پەقەت مەۋلاننىڭ يېنىدا تۇرۇپ، ئۇنىڭ تۇرمۇشتا ساغلام، خۇشال-خۇرام ئۆتۈشىنى ئۈمىد قىلىدۇ، مانا مۇشۇنىڭ ئۆزى يېتەرلىك.

دەسلەپتىكى   نۇرغۇن گۈزەل خىياللارنى قىلىشتىن تارتىپ، ئەڭ ئاخىرىدا قەدەممۇ قەدەم يول قويۇشقىچە، ئەڭ ئاخىرىدا بۇ نۇقتىدىنمۇ ۋاز كېچىشكە مەجبۇر بولدى.

ئۇنىڭ كۆڭلىدە بۇرۇنلا باشقا ئادەم بار بىر ئەرنى تەسىرلەندۈرۈشكە ئامالى يوق.

ئۇنىڭمۇ مەۋلاندىن كەلگەن ئازابقا بەرداشلىق بېرەلەيدىغان ئۇنچە كۆپ زېھنىي كۈچى ۋە كۈچلۈك يۈرىكى يوق.

ئەگەر باشقىلار بولغان بولسا، قايتۇرما زەربە بەرسە بولىدۇ، لېكىن مەۋلانغا نىسبەتەن، قانداق قىلىشنى بىلمەيدۇ.

ئۇنىڭغا ئازار بېرىشكە  قانداق چىدايدۇ؟

ئىككى ئادەمنىڭ دەردىنى تەڭ تارتماي، بالدۇر ئايرىلىپ كەتكىنى توغرا.

زەپەرنىڭ بايا دېگىنى توغرا، مەۋلان بولمىسا، ئۇمۇ بەرداشلىق بېرىشكە ئۆزىنى مەجبۇرلىمايدۇ، ئۇنىڭ يەنە شىركىتى، دوستى بار ، بەلكىم يەنە  ھەمراھ تېپىپ  قېرىغىچە بىللە ئۆتەللىشى مۇمكىن، بىر-بىرىگە يار-يۆلەك بولسىلا شۇنىڭ ئۆزى يېتەرلىك.

 -  شۇڭا مېنىڭ زادى قانداق ۋىجدانسىزلىق قىلغىنىمدىن، باشقا غەرىزىم بارلىقىدىن گۇمانلانمىسىڭىزمۇ بولىدۇ. سىز نېمە دېسىڭىز شۇ بولسۇن، مەن ئىنكار قىلغان تەقدىردىمۇ، مېنىڭچە يەنىلا سىزنىڭ ماڭا بولغان بىر تەرەپلىمە قارىشىڭىزنى ئۆزگەرتەلمەيمەن. مەن شۇنداق  قارا نىيەت، ئاستىرتىن نەيرەڭۋازلىق قىلىدىغان ئادەم،  قانداقلا قىلسام  كۆزىڭىزگە سىغمىدىم،  بىر نەچچە ئايدىن ياقى ياخشى ئۆتۈپمۇ كەتمىدۇق، بولمىسا مۇشۇنداق بولسۇن ... - دېدى زۇبەيدە.

زۇبەيدە گېپىنى تۈگىتىپ، بىردەم تۇرۇۋالغاندىن كېيىن، لېۋىنى چىڭ يۇمۇپ بىر ئاز سۈكۈتكە چۆمدى، ئاندىن تۇيۇقسىز كەينىگە بۇرۇلۇپ، قايتىدىن داچا تەرەپكە قاراپ ماڭدى.

مەۋلان ئىختىيارسىز ھالدا قولىنى سوزۇپ ئۇنى تۇتۇۋالدى،   ئالاقزەدە بولۇپ:

  -  نېمە قىلماقچى سىز؟ ! - دەپ سورىدى.

زۇبەيدە چوڭقۇر نەپەس ئېلىپ، بېغىشىنى تولغاپ چىقىرۋېلىپ:

 -  سىلەرنى مۇرادىڭلارغا يەتكۈزمەكچى بولغانىكەنمەن، ئىشنى ئۈزۈل-كېسىل قىلىشىم كېرەك،  سۆرەلمىلىك قىلىشنى ياقتۇرمايمەن.  - دېدى.

 گېپىنى تۈگىتىپلا كېتىپ قالدى، مەۋلان يەنە يېتىشىۋالماقچى بولدى، ئەمما زەپەر ئۇنىڭ يولىنى توسۇۋالدى.

مەۋلاننىڭ چىرايى بىردىنلا تۇتۇلۇپ، پېشانىسىدىكى كۆك تومۇرلار يېرىلىپ كېتەيلا دەپ قالدى.

 زەپەرنىڭ ياقىسىدىن تۇتۇپ،  ئالدىغا تارتىپ:

  -  سىزنىڭ پىكرىڭىزمۇ... - دېدى.

 -  مەۋلان ئەپەندى.- دېدى  زەپەر ئۇنىڭ گېپىنى بۆلۈپ،  -  بارلىق خاتالىقلارنى باشقىلارغا ئىتتىرىپ قويماڭ، مەن پەقەت بىر تەرەپتە تۇرۇپ ئويۇن كۆرگۈچى،  بايا شۇنچە كۆپ چوڭقۇر مۇھەببەت ئىزھار قىلدىم، ئۇنىڭ ماڭا ئازراق بولسىمۇ قىزىقىپ قالغانلىقىنى كۆرمىدىم، ھازىر ئۇنىڭ تۇيۇقسىز ئۆزگىرىشىنىڭ زادى نېمە ئۈچۈن ئىكەنلىكىدە  كۆڭلىڭىزدە سان يوقمۇ؟  - دېدى. 

مەۋلاننىڭ چىرايى قورقۇنچلۇق بولسىمۇ، لېكىن بىر مەھەل گەپ قىلالماي قالدى.

 -  مەن دەيمەن، مەۋلان ئەپەندى.  - زەپەر سۇس كۈلۈپ تۇرۇپ،   -  زۇبەيدەنى باشقىلارنىڭ ئالدىدا دېگىلى بولمايدىغان ئىشلارنى قىلدى دېمەڭ، ئەمما قىلغان تەقدىردىمۇ نېمە بوپتۇ. ئەگەر بىر ئايال مېنى ياخشى كۆرگەنلىكى ئۈچۈن ۋاسىتە تاللىماي، پۈتۈن زېھنىنى سەرپ قىلىپ، بارلىق ئاماللار بىلەن مېنىڭ يېنىمدا ئوچۇق-ئاشكارا تۇرماقچى بولسا، مەن چوقۇم خۇشال بولىمەن. 

 - نېمىلا بولمىسۇن مەن بىر ئايالنى  شۇنچە سېغىندۇرالىدىم، ھەتتا شۇنچە كۆپ بەدەل تۆلەتكۈزەلىدىم...  ئۇ ماڭا قەرزدار ئەمەس، مەنمۇ ئۇنىڭغا ياخشى مۇئامىلە قىلمايمەن، سىزنىڭچە ئۇ نېمىنى كۆزلەيدۇ؟ - دېدى. 

مەۋلاننىڭ پۈتۈن بەدىنىدىكى دۈشمەنلىك تۇيۇقسىز بىر ئاز پەسەيدى، كۆز ئالدى خىرەلىشىپ:

- نېمە دېدىڭىز؟ - دەپ سورىدى. ئاندىن زەپەرگە سوغۇق نەزەر بىلەن قاراپ، -  سىز زۇبەيدە مېنى ياخشى كۆرىدۇ دېمەكچىمۇ؟  - دېدى.

زەپەر بىردەم ھاڭۋىقىپ تۇرۇپ قالدى، ئۇنىڭغا خېلى ئۇزۇن قاراپ تۇرغاندىن كېيىن، تۇيۇقسىز يەنە سوغۇق كۈلۈپ كېتىپ:

- سىزنىڭچىچۇ، زۇبەيدە نېمىشقا سىزگە ياتلىق بولىدۇ؟ سىزنى ئۆز ئىچىگە ئالغان ھەممە ئادەم ئۇنى بالىسىدىن پايدىلىنىپ سىلەرنىڭ ئائىلىگە ياتلىق بولۇپ كىردى دەپ قارايدۇ، ئۆزى يالغۇز ھامىلىدار بولۇپ، ئۆزى يالغۇز بۇ ئۆيدە تۇردى،  ھالىدىن خەۋەر ئالىدىغان بىرمۇ ئادىمى يوق، تاكى ھازىرغىچە سىز ئۇنىڭغا پات-پات يامان گەپ قىلىپ، سوغۇق مۇئامىلە قىلسىڭىزمۇ، يامان غەرەزدە بولدىڭىز دەپ پەرەز قىلسىڭىزمۇ  ھېچقانداق قاتتىق گەپ قىلىپ باقمىدى، سىزنىڭچە ئۇ ئەخمەقمۇ ياكى ساراڭمۇ، ئۇنىڭدا ئۆزىگە زىيانكەشلىك قىلىپ خورلايدىغان ئادەت بارمۇ؟ - دېدى.

مەۋلان گەپ قىلالماي قالدى.   

زەپەر چوڭقۇر نەپەس ئېلىپ، ئىلاجسىزلىق ئىچىدە كۈلۈپ تۇرۇپ:

  -  سىز ھەقىقەتەن ئەخمەق ئىكەنسىز، بۇ ئايال  ئالدىڭىزدا،  ئەزەلدىن سىزگە بولغان خىيالىنى يوشۇرۇپ باقمىدى، لېكىن سىز بۈگۈن مەندىن بۇ سوئالنى سوراۋاتىسىز... - دېدى. 

مەۋلاننىڭ  چىراي ئىپادىسى بىر ئاز سۈرلۈكلىشىپ، بىر جۈپ نېپىز لەۋلىرى تۈز سىزىق بولۇپ قالدى.

 -  بىراق، سىزنىڭچە، سىزنى ياخشى كۆرىدىغان ئاياللار بەك كۆپ بولۇشى ، بەلكىم ئۇنىڭدەك بىر ئادەم كەم بولماسلىقى مۇمكىن، ئۇنىڭ ئۈستىگە  كۆڭلىڭىزدە يەنە بىر ئايال بار، ئۇ سىلەرنى مۇرادىڭلارغا يەتكۈزىمەن دەيدۇ، مېنىڭچە، سىز ھازىر ناھايىتى خۇشال بولۇشىڭىز كېرەك، ئاخىرى سىزنى قاتتىق نەپرەتلەندۈرگەن بۇ ئايالدىن قۇتۇلىدىغان بولدىڭىز، مەن  سىز ئۈچۈن خۇشال بولۇشۇم كېرەكمۇ؟ - دېدى زەپەر. 

مەۋلاننىڭ قاپىقى تۇيۇقسىز تىترەپ، چىڭ تۇتۇۋالغان زەپەرنى قويۇۋېتىپ:

- بىزنىڭ ئىشىمىزغا ئارىلىشىش سالاھىيىتىڭىز يوق، مەن سىزنى ئاگاھلاندۇرۇپ قوياي، زۇبەيدەدىن يىراقراق تۇرۇڭ! - دېدى.

زەپەر پەرۋاسىز ھالدا مۈرىسىنى ئېتىپ قويۇپ:

  -  بولىدۇ، ئىشقىلىپ، پەقەت مۇشۇ بىر نەچچە كۈننىڭلا ئىشى، سىلەر ئاجرىشىپ كەتسەڭلار، ئۇنىڭ ھاياتىغا قاتنىشىش سالاھىيىتى يوق ئادەم سىز بولىسىز... - دېدى.

مەۋلاننىڭ پېشانىسىدىكى كۆك تومۇرلار تۇيۇقسىز بۆرتۈپ چىقىپ، كەينىگە بۇرۇلۇپ  يىراقلاپ كەتتى.

زۇبەيدە ئۇنىڭغا بۇنداق قاتتىق گەپ قىلىشقا قانداق چىدىغاندۇ؟

ئاجرىشىدىغان گەپنىمۇ ئاغزىدىن چىقاردى، بۇنىڭدىنمۇ رەھىمسىز گەپ بارمۇ؟

ئۆلگۈرنىڭ زۇبەيدەنى  چۈشىنىدىغان قىياپەتكە كىرىۋالغىنى قارا!