ལྟ་བ་གསེར་སྦྱང་བཙོ་མ།
གསལ་བཤད། རྩོམ་ཡིག་འདི་འདྲ་ཞིག་འབྲི་དགོས་དོན་ནི་དེང་གི་དུས་འདིར་གྲུབ་མཐའ་རིས་མེད་ཅེས་ཁ་ནས་ཆད་རྒྱུ་མེད་པར་མེད་མུག་ལྟར་འདོན་པའི་མཁས་རློམ་འགའ་རེ་ཡིས། རྗེ་བླ་མའི་ལྟ་བ་འདི་ཅིག་ལ་ཐུག་ཚུལ་དང་ཅིག་དང་མཐུན་ཚུལ་སོགས་བསམ་བཞིན་དང་བསམ་བཞིན་མ་ཡིན་པར་ཉ་ཉོག་བསྲེ་བའི་སྦྱོར་བར་བརྩོན་བཞིན་པ་དང་། ཁྱད་པར་དུ་རེབ་གོང་འཇིགས་མེད་བློ་གྲོས་ཟེར་བའི་བན་རྒན་འཇིག་རྟེན་གཏམ་ལ་གོམས་པ་སྔོན་སོང་ལྟ་བུར་གནས་པ་ཞིག་གིས་ལོ་འགའི་ཡར་སྔོན་ལ་དགེ་ལུགས་པའི་གྲུབ་མཐའི་ཁུངས་འདི་དང་འདི་རེད་ཅེས་སོགས་དང་། ད་རུང་སྔ་འགྱུར་རྙིང་མ་བས་མཚོན་པའི་གྲུབ་མཐའ་སྐོར་ཁག་ཅིག་དྲངས་ནས་ཕ་མ་བུ་ཕྲུག་གི་འབྲེལ་བ་འདྲ་ཞིག་བཤད་ནས་ཞེ་བསླུ་བའི་སྐད་ཆ་རེ་ཟུང་གོ་བ་གཞི་རྟེན་བྱས་ཏེ་དེ་དག་གང་ཡིན་ཡང་རགས་བཤད་ཙམ་ལས་ཕྲ་བོ་བློས་མ་དཔྱད་པའི་གནས་ཚུལ་ཞིག་རེད་ཅེས་བཤད་འདོད་པ་དེའོ། །
འཇམ་མགོན་རྒྱལ་བ་ཡབ་སྲས་ཕྱག་གི་ཡུལ། །
སྒོ་གསུམ་གུས་པས་ལན་བརྒྱར་འདུད་ཅིང་མཆོད། །
གནས་ལུགས་ཟབ་མོའི་དོན་ལ་མི་རྨོངས་པར། །
འཁོར་བའི་མས་མཐའ་ཆོད་པར་བྱིན་གྱིས་རློབས། །
ནོར་བ་ཡེ་མེད་སྟོན་པ་ཐུགས་རྗེ་ཅན། །
དེ་ལུགས་རབ་འཛིན་ཤིང་རྟའི་སྲོལ་གཉིས་གཙོས། །
ལྟ་བའི་གཏིང་ཟིན་རྒྱ་གར་པཎ་གྲུབ་ཀྱི། །
གྲུབ་པའི་མཐའ་ལ་ཁུངས་བཅོལ་རྗེ་ཉིད་གུས། །
བསྟེན་པའི་བླ་མ་གྲངས་མང་གུས་སྦྱོར་མཁན། །
བསགས་པའི་ཐོས་པ་རྒྱ་ཆེ་མང་བཙལ་བ། །
བསམ་པས་སྒྲོ་སྐུར་བྲག་རིའི་ཕུང་བོ་བཅོམས །།
སྒོམ་པ་མཐར་སོན་དེ་ཉིད་གོམས་ལ་བསྟོད། །
ཟབ་དོན་དབུ་མའི་ལམ་མཆོག་རྟོགས་པ་ལ། །
སུམ་ཚོགས་མཐུན་རྐྱེན་གཅིག་ཏུ་འདྲིལ་བའི་ཚུལ། །
ཁྱད་པར་འཇམ་དབྱངས་ཉེར་བསྟེན་བཤེས་གཉེན་ཆེ། །
ལོག་ལྟ་དྲུང་ནས་འབྱིན་པའི་ཆོས་སྐལ་ཅན། །
བོད་མཁས་དུ་བཅུ་ཕྲག་རེ་ཟུང་མདུན་ལ་གཅར། །
བླང་དོར་ཟབ་མོས་ཆོས་ཚན་མང་དུ་ཐོས། །
འོན་ཏེ་ལྟ་སྤྱོད་བཟང་བོའི་འོད་དཀར་བོ། །
ཆོས་མགོ་རྒྱ་གར་མཁས་པའི་གཏམ་ལས་གོ། །
དིང་འདིར་ལྟ་བའི་འཁྲུལ་སེལ་མཇལ་བའི་ཚེ། །
ཁྱེད་ཀྱི་གྲུབ་མཐའ་ནམ་མཁའི་མཐའ་དང་མཉམ། །
དཔྱད་འཇོག་སྒོམ་པའི་ཁྱད་པར་ཕྱེས་པ་ཡིས། །
མུན་པར་སྣང་བ་འབྱེད་ལ་ཅིའི་མི་གུས། །
ས་རྙིང་བཀའ་ཇོ་ལྟ་བའི་མཆེད་གཞི་མིན། །
ཚུལ་འཛིན་བཤེས་གཉེན་ཉུང་ཟད་ཡོད་ཀྱང་ཆོག །
རྣམ་དག་ཟབ་དོན་གདམས་པ་རིན་ཆེན་གང་། །
དཔྱད་དོན་རྫོགས་པ་རང་གི་ཤེས་རབ་ཆེ། །
བཀའ་གདམས་གསར་མའི་མཚན་ནི་གཅིག་ཏུ་འཁུར། །
ཞིབ་མོས་གྲུབ་མཐའ་འདི་ཞེས་ཟུར་འབྱེད་པའི། །
སྨྲ་བའི་སེང་གེ་མཁས་གྲུབ་ཆོས་རྗེ་ཡི། །
གསུང་ལ་མཇལ་ཚེ་གང་གི་ལྟ་བ་རྙེད། །
ད་ལྟ་རང་ཅག་བསོད་ནམས་ཤིན་ཏུ་ཆེ། །
གནས་ལུགས་འབྱེད་པའི་མྱུར་ལམ་འདི་དང་མཇལ། །
གྲུབ་པའི་ཡང་རྩེ་དགེ་ལྡན་བསྟན་པ་འདི། །
ར་སུག་ལུག་ལ་མ་སྦྱོར་དགེ་བཤེས་ཚོ། །
རྩ་འགྲེལ་དམར་ནག་ཅིག་གིས་གྲུབ་མཐའ་འདི། །
མག་མོག་རབ་རིབ་མ་བཟོ་མཁས་རྒན་ཚོ། །
བསྟན་བཅོས་སྤྱི་སྐད་ལམ་པོ་ཆེ་བོར་ནས། །
གྲོང་བཤད་རགས་པ་ཙམ་གྱིས་འདི་མ་རྫོད། །
སྟོང་དང་རྟེན་འབྱུང་གཞི་གཅིག་འབྲེལ་བ་ཡི། །
གྲུབ་པའི་གནས་ལུགས་འདི་ཡང་འདིར་ཐུག་ཞེས། །
བོད་ཡུལ་མུན་པའི་བྱེ་བྲག་གྲུབ་མཐའ་ལ། །
བསྟན་པ་རྣམ་དག་འདི་ནི་ཁུངས་མ་གཏུགས། །
གྲུབ་པའི་མཐར་སོན་དཔལ་ལྡན་ཐལ་འགྱུར་བའི། །
བཤད་སྲོལ་ཇི་བཞིན་ལུང་རིགས་རྒྱན་འཆང་བའི། །
འཇམ་མགོན་ཙོང་ཁ་བ་ཡི་རིང་ལུགས་ཆེ། །
ས་སྟེང་ཁྱབ་པར་མཛད་པའི་དམ་པར་གུས། །
ཞེས་འཇམ་མགོན་བླ་མ་ཙོང་ཁ་བ་ཆེན་པོའི་ལྟ་བ་རྨ་མེད་པར་རྟག་ཏུ་གུས་པའི་གྱི་ན་བ་སྒྲ་དབྱངས་སུ་འབོད་པས་མདོ་ཁམས་རྫ་སེར་ཤུལ་དགོན་མཐོ་རིམ་ནང་བསྟན་སློབ་གླིང་དུ་ཧོར་རྩིས་ལྟར་གྱི་རྗེ་གདུང་མཆོད་ལ་ཆེད་དུ་བྲིས།
ཀུན་ཁྱབ་འོད་སྣང་འཕྲིན་སྟེགས།
གཞན་ལ་སྐུར།
ཉར་ཚགས།
མཐེ་བོང་ནོན།
མེ་ཏོག་ནོན།
