ཟླ་11ཚེས་25ཉིན་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་གསར་འགོད་པའི་རྒྱུན་ལྡན་གྱི་ཚོགས་འདུ་གཙོ་སྐྱོང་བྱས།
མའོ་ཉིང་གིས་བསྟན་དོན། མིག་སྔར་དབུས་ཤར་ས་ཁུལ་གྱི་དུས་བབ་ཛ་དྲག་ཆེན་པོ་ཡིན་པས་འབྲེལ་ཡོད་ཕྱོགས་ཁག་གིས་ས་ཁུལ་སྤྱིའི་བདེ་འཇགས་ཀྱི་ཉེན་ཁ་སྔར་བས་ཆེ་རུ་མི་འགྲོ་བ་བྱེད་དགོས། ཉེ་དུས་ཐོན་པའི་དོན་རྐྱེན་རབ་དང་རིམ་པའི་ཐོག་ནས་སླར་ཡང་དམག་མཚམས་འཇོག་རྒྱུ་དེ་ཁ་ཚ་དགོས་གཏུགས་ཡིན་པ་མཚོན་ཡོད། རྒྱལ་སྤྱིའི་སྤྱི་ཚོགས་དང་ལྷག་པར་དུ་ཤུགས་རྐྱེན་ཆེ་བའི་རྒྱལ་ཁབ་ཆེན་པོས་ངེས་པར་དུ་དགེ་མཚན་ལྡན་པའི་ནུས་པ་འདོན་སྤེལ་ཏན་ཏིག་བྱས་ནས། ས་ཁུལ་གྱི་ཛ་དྲག་ཆེ་བའི་གནས་ཚུལ་ཞི་ལྷོད་དུ་གཏོང་བར་དགོས་ངེས་ཀྱི་ཆ་རྐྱེན་སྐྲུན་དགོས། ཀྲུང་གོ་ཕྱོགས་ཀྱིས་རང་ཉིད་ཀྱི་ཤུགས་རྐྱེན་མུ་མཐུད་འདོན་སྤེལ་བྱས་ཏེ། ས་ཁུལ་གྱི་ཞི་བདེ་བརྟན་ལྷིང་ལ་སྐུལ་འདེད་གཏོང་ཆེད་འབད་བརྩོན་བྱ་རྒྱུ་ཡིན།
