ཟླ་11ཚེས་17ཉིན་གྱི་ཐོ་རེངས་སུ་ཧྲེན་ཀྲེན་པའོ་ཨན་རྒྱལ་སྤྱིའི་གནམ་ཐང་དུ། ཕྱི་རྒྱལ་དུ་ལོ་གསུམ་ཙམ་བྲོས་བྱོལ་བྱས་པའི“7.09”ལྐོག་འདྲེན་གྱོད་གཞིའི་འཛིན་རྒྱུའི་བཀའ་རྒྱ་དམར་པོ་བཏང་བའི་བྲོས་བྱོལ་ཉེས་ཅན་ལིན་ཆེ་གེ་མོ་བཟུང་སྐྱེལ་བྱས་པ་རེད། མཐའ་མཚམས་སུ་སླེབས་མ་ཐག ལྐོག་འདྲེན་འཛིན་བཟུང་ཉེན་རྟོག་པས་འཕྲལ་དུ་འཛིན་བཟུང་བྱ་རྒྱུའི་ཁྱབ་བསྒྲགས་བྱས་པ་རེད། དེའི་བར། ཧྲེན་ཀྲེན་འགག་སྒོའི་ལྐོག་འདྲེན་འཛིན་བཟུང་ཅུས་ཀྱིས་མྱུལ་ཞིབ་བྱས་པའི་གྱོད་འབྲེལ་དངུལ་གྲངས་སྒོར་ཁྲི་2500ཟིན་པའི་གྱོད་གཞི་དེའི་ཁོངས་མི་ཚང་མ་བཟུང་ཐུབ་པ་རེད། འདི་ནི་ཧྲེན་ཀྲེན་འགག་སྒོའི་ལྐོག་འདྲེན་འཛིན་བཟུང་ཉེན་རྟོག་པས་འབད་བརྩོན་ལྷོད་མེད་ངང་བྲོས་འདེད་ལས་དོན་སྤེལ་བའི་རྒྱལ་ཁ་གལ་ཆེན་གཞན་ཞིག་ཡིན།
གྱོད་སྒྲུབ་མི་དམངས་ཉེན་རྟོག་པ་ལན་ཐང་ལྐོག་འདྲེན་འཛིན་བཟུང་སྒྲིག་གཞིའི་གྲ་སྒྲིག་ཚོགས་ཆུང་མྱུལ་ཞིབ་རུ་ཆེན་གཉིས་པའི་རུ་དཔོན་ཞན་ཁྲེང་ཞན་གྱིས་ངོ་སྤྲོད་བྱས་དོན། “ལིན་ཆེ་གེ་མོ་ནི‘7.09’ལྐོག་འདྲེན་ཉེས་གསོག་ཚོགས་པའི་འགོ་འཛིན་རེད། རྡུང་རྡེག་ལས་གཡོལ་ཆེད་དུས་ཡུན་རིང་པོའི་ནང་ལྟག་རྒྱབ་ནས་བཀོད་འདོམས་བྱེད་ཀྱི་ཡོད་ཅིང་ནམ་རྒྱུན་གྱི་བྱ་འགུལ་ཡང་ཤེས་མཁན་དཀོན་མོ་ཡིན། མྱུལ་ཞིབ་བྱས་པ་ལས་ཤེས་རྟོགས་བྱུང་བར་གཞིགས་ན། ལིན་ཆེ་གེ་མོས་2021ལོའི་ཟླ་7ཚེས་9ཉིན། ཚོགས་པའི་ཁོངས་མིར་ངན་སྐུལ་བྱས་ཏེ་ཉོ་ཚོང་རྫུན་ཞུ་བྱེད་སྟངས་ཐོག་ནས་དོས་སྒམ་ནང་ཨ་རག་དམར་པོ་དང་། ཧའེ་ཧྲེན། ཉ་སྤྱིན། མཛེས་འདོན་བྱུག་རྫས་སོགས་རིན་གོང་མཐོ་བའི་དངོས་ཟོག་ལྐོག་འདྲེན་བྱས་རྗེས་རྒྱལ་ནང་དུ་བཙོངས་ནས་ཁེ་བཟང་ཐོབ་པ་དང་གྱོད་གཞི་སྤྱིའི་གྱོད་འབྲེལ་དངུལ་གྲངས་སྒོར་ཁྲི་2500ཟིན་ཡོད་པ་རེད། ”
ཤེས་རྟོགས་བྱུང་བར་གཞིགས་ན། ད་ལོའི་ཚུན་ལ་ཧྲེན་ཀྲེན་འགག་སྒོའི་ལྐོག་འདྲེན་འཛིན་བཟུང་ཅུས་ཀྱིས་མངའ་ཁོངས་ཕྱི་ནང་གི་བྲོས་བྱོལ་ཉེས་ཅན་179འདེད་བཟུང་བྱས་པ་རེད།
