བརྙན་ལམ་ལེ་ཚན། གཏམ་དཔེའི་དོ་ར།
✦གཏམ་གྱི་སྒོ་མོ་འབྱེད་པའི་གསེར་གྱི་ལྡེ་མིག །✦
✦དཔེ་ཡི་ལུང་ལ་བརྒྱུས་པའི་ཚིག་གི་ཕྲེང་བ།།✦
✦དོ་ཤལ་རིན་ཆེན་རྒྱན་ལས་འགྲན་ཟླ་བྲལ་བའི།།✦
✦ར་བ་འདི་ནི་རིག་པའི་གཏེར་མཛོད་འདྲའོ།།✦
སྲིད་པའི་ཞལ་རྒྱུན། འདོན་ཐེངས་ཉིས་བརྒྱ་དང་ཉེར་བརྒྱད།
ཝ་ཕྲུག་ཐང་ནས་ཐང་ལ་ཟགས་རྒྱུ་མེད། རྒོད་ཕྲུག་གཡང་ནས་ཟགས་པ་སྙིང་རེ་རྗེ།
གཏམ་འགྲེལ། དམའ་སར་གནས་པ་རང་གཤིས་ཡིན་རུང་མཐོན་པོ་དམའ་སར་ཟགས་པ་ཡོང་བའི་དོན།
མཐོན་པོའི་བྲག་ལ་འཛེགས་ན། དམའ་པོའི་གཡང་ལ་ལྷུང་།
གཏམ་འགྲེལ། མཐོ་སྙེག་ཆེས་ན་རང་ཉིད་བརླག་ཉེན་ཡོད་པའི་དོན།
ར་མགོར་ཞེན་ཆགས་གཡག་མགོ་བརླག
གཏམ་འགྲེལ། དོན་ཆུང་བ་ཞིག་ལ་མགོ་འཁོར་ནས་དོན་ཆེན་དེ་མ་འགྲུབ་པའི་དོན།
ར་ལུག་རྡུང་ཁ་བརྒྱབ། མགོ་ཁྲག་ཝ་མོས་བལྡགས།
གཏམ་འགྲེལ། དགྲ་ཁ་གཏད་གཉིས་ཀྱི་བར་ནས་ཁེ་བཟང་དེ་གཞན་ཞིག་ལ་རག་པའི་དོན།
མཛེས་འདོད་གདོང་པ་འོ་ཁྲུས་བྱས་ཀྱང་། མི་མཛེས་ལིང་ཏོག་ངོ་ལ་སྐྱེས།
གཏམ་འགྲེལ། ཡག་པོ་བསམས་ཀྱང་མི་འདོད་ཐོག་ཏུ་བབ་པའི་དོན།
འཛོམས་ན་སྐྱིད་ཁྱོག་པ། ཕོངས་ན་སྡུག་ཁྱོག་པ།
གཏམ་འགྲེལ། སྐྱིད་སྡུག་གཉིས་ཀ་མྱོང་ཐུབ་པ་བྱེད་དགོས་པའི་དོན།
རྫ་མ་རྦབ་ལ་རིལ་ན། ལྷུ་ལག་ག་ནས་ཚང་།
གཏམ་འགྲེལ། རྐྱེན་ངན་བྱུང་རྗེས་རང་སོར་གནས་མི་ཐུབ་པའི་དོན།
སྤྱི་ཁྱབ་ལྟ་ཞིབ། བསྟན་འཛིན་འཇིགས་མེད།
རྩོམ་སྒྲིག་པ། ལྷ་མོ། བསམ་གྲུབ་བསྟན་འཛིན།
རྩོམ་ཁུངས། སྒར་བརྙན་འཕྲིན་ལས་ཁུངས་བོད་ཡིག་རྩོམ་སྒྲིག་ཁང་།
