=== 愿 诸 见 闻 者 • 速 疾 成 佛 道 ===![]()
༄༅།།རྗེ་བསམ་པ་ལྷུན་འགྲུབ་མ་བཞུགས་སོ།།ཨོཾ་ཨཱཿགུ་རུ་སུ་མ་ཏི་ཀིརྟི་མ་མ་སརྦ་སིདྡྷི་ཧཱུཾ།
རྒྱལ་ཀུན་ཡེ་ཤེས་ཆོས་སྐུ་འཇམ་པའི་དབྱངས།།ངེས་པ་ལྔ་ལྡན་ལོངས་སྐུ་ཀུན་ཏུ་གཟིགས།།སེང་གེའི་ང་རོ་མཆོག་གི་སྤྲུལ་བའི་སྐུ།།སྐུ་གསུམ་ལྷུན་གྲུབ་དྲུག་པ་རྡོ་རྗེ་འཆང༌།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ལྷུམས་སུ་ཞུགས་དུས་ཡབ་ཀྱི་གཟིགས་སྣང་ལ།།ལྕང་ལོ་ཅན་ནས་གསང་བའི་བདག་པོ་ཡིས།།གསེར་གྱི་རྡོ་རྗེ་འཕངས་པ་ཡུམ་ལ་ཐིམ།།མཁའ་འགྲོའི་ཚོགས་ཀྱིས་ཁྲུས་གསོལ་བྱེད་པ་གཟིགས།།གསང་བདག་རྡོ་རྗེ་འཛིན་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།![]( "分割线")
ཡབ་ཀྱིས་སླར་ཡང་རི་བོ་རྩེ་ལྔ་ནས།།གླགས་བམ་ཁུར་བའི་དགེ་སློང་སྨུག་ཚོས་ཅན།།མེ་ཏོག་དུ་མ་སྤེལ་བའི་ཆོས་གོས་དང༌།།ལྷ་ཡི་གོས་དར་སེར་བོའི་ཤམ་ཐབས་ཅན།།གནས་ཚང་དགོས་ཞེས་ཁང་བར་བཞུགས་པ་མཐོང༌།།རྗེ་བཙུན་འཇམ་པའི་དབྱངས་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ཡུམ་གྱི་སྣང་བར་ནམ་མཁའི་སྤྲིན་གསེབ་ནས།།་སྤྱན་རས་གཟིགས་དབང་རི་བོ་ལྟ་བུ་ཞིག།ལྷ་ཡི་འཁོར་གྱིས་བསྐོར་བ་སྤྱི་བོ་ནས།།ཐུགས་ཀར་ཤེལ་གྱི་ཁང་བར་བཞུགས་པ་ལ།།བལྟམས་ཚེ་ལྷ་ཡིས་ཤེལ་སྒོ་འབྱེད་པ་གཟིགས།།མགོན་པོ་སྤྱན་རས་གཟིགས་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ཆོས་ཀྱི་རྒྱལ་བོ་དོན་གྲུབ་རིན་ཆེན་གྱི།།འོད་གསལ་རྨི་ལམ་སྣང་བར་འཇིགས་བྱེད་ཀྱིས།།བྱ་ལོར་ལུང་བ་འདི་རུ་དངོས་སུ་འོངས།།དེ་བར་རིམ་གཉིས་རྣལ་འབྱོར་ལྷུར་བཞེས་གསུངས།།བཅོམ་ལྡན་གཤིན་རྗེ་གཤེད་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།
ཆོས་རྗེ་དོན་གྲུབ་རྒྱལ་བ་ཀརྨ་བས།།བསྟན་པའི་སྒོར་བཅུག་སྨན་བླ་བདེ་གཤེགས་བརྒྱད།།ཨ་ཏི་ཤ་ཡི་གཟིགས་སྣང་ནར་མར་བྱུང༌།།དཔལ་ལྡན་མར་མེ་མཛད་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།དབུས་སུ་བྱོན་ནས་ཐོག་མར་འབྲི་གུང་དུ།།སྤྱན་སྔ་ཆོས་ཀྱི་རྒྱལ་བོར་སེམས་བསྐྱེད་དང༌།།ཕྱག་ཆེན་ལྔ་ལྡན་ཆོས་ཀྱི་གདམས་པ་ཞུས།།ཞག་རེར་གཏུམ་མོའི་རླུང་སྦྱོར་བརྒྱད་བརྒྱ་བཟུང༌།།བཀའ་བརྒྱུད་བླ་མ་རྣམས་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།གྲོགས་ཀྱིས་བསྐུལ་བས་ཚལ་གྱི་གུང་ཐང་དུ།།སྨན་བླའི་སྤྲུལ་བ་ལྷ་རྗེ་རཏྣ་ལས།།སྨན་དཔྱད་ཡན་ལག་བརྒྱད་པའི་མྱོང་ཁྲིད་དང༌།།གསོ་རིག་རྒྱུད་བཞིའི་གཞུང་ལ་སྦྱངས་ཚུལ་མཛད།།བཅོམ་ལྡན་སྨན་གྱི་བླ་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ས་སྐྱའི་པཎ་ཆེན་རྗེ་བཙུན་རེད་འདའ་བ།།མཁས་གྲུབ་ཆེན་པོ་ཁྱུང་བོ་ལྷས་པའི་ཞབས།།གྲུབ་པའི་དབང་ཕྱུག་དཔའ་བོ་རྡོ་རྗེ་ལས།།མདོ་རྒྱུད་མན་ངག་གསན་པས་རྒྱན་དྲུག་སོགས།།རྒྱ་བོད་པཎ་གྲུབ་ཀུན་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ཆོས་འཆད་ཕྱག་རྒྱ་མཛད་པའི་བྱམས་མགོན་གྱིས།།ཁ་བ་ཅན་འདིར་རིགས་ཀྱི་བུ་ཁྱོད་ཀྱིས།།སྟོབས་བཅུ་མངའ་བ་སླར་ཡང་བྱོན་པ་བཞིན།།སངས་རྒྱས་མཛད་པ་སྟོན་པར་ལུང་བསྟན་པ།།བཅོམ་ལྡན་ཤཱཀྱའི་རྒྱལ་བོར་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།དུས་འཁོར་དཔའ་ཅིག་གསེར་གྱི་མདོག་ཅན་གྱིས།།དུས་ཀྱི་འཁོར་ལོའི་རྒྱུད་འདི་སྟོན་པ་ལ།།ཆོས་རྒྱལ་ཟླ་བཟང་འདྲ་བར་ལུང་བསྟན་ཅིང༌།།རྒྱུད་འགྲེལ་དྲི་མེད་འོད་ཆེན་ཐུགས་འཛིན་མཛད།།ཆོས་རྒྱལ་རིགས་ལྡན་རྣམས་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ལྷོ་བྲག་གྲུབ་ཆེན་ལས་ཀྱི་རྡོ་རྗེ་ཡིས།།བྱམས་མགོན་ཉིད་དུ་གཟིགས་པའི་ཕྲག་པ་ན།།འཇམ་པའི་དབྱངས་དང་ལྷ་མོ་དབྱངས་ཅན་མ།།བཞུགས་པའི་ཞལ་ནས་བསླབ་བཏུས་གསུང་བ་གཟིགས།།བྱམས་མགོན་རྒྱལ་བའི་ལྷ་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།རྒྱལ་བོས་མཛད་པའི་བཀའ་ཆེམས་བཀའ་ཁོལ་མ།།བློན་པོས་གསུངས་པའི་ཟླ་བ་འདོད་འཇོ་དང༌།།བཙུན་མོའི་དཀར་ཆག་དར་དཀར་གསལ་བ་ན།།ལྷ་སའི་ཞིག་གསོ་མཛད་པར་ལུང་བསྟན་པས།།སྲོང་བཙན་གདུང་བརྒྱུད་རྣམས་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།འཇམ་པའི་དབྱངས་ཀྱི་སྤྲུལ་བའི་གླེགས་བམ་དུ།།མར་མེ་མཛད་དཔལ་སྒྲོལ་མའི་སྤྲུལ་སྟོང་བཅས།།ཀ་བ་ཤིང་ལོ་ཅན་གྱི་ལྷ་ཁང་ལ།།ཞིག་གསོས་བསྙེན་བཀུར་བགྱིས་པས་ལོ་སྟོང་དུ།།སངས་རྒྱས་བསྟན་པ་འཕེལ་བར་ལུང་བསྟན་པས།།ཆོས་སྐུ་སྣང་མཐའ་ཡས་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ཕྱོགས་མཚམས་སྟེང་འོག་ནམ་མཁའི་ཁམས་ཐམས་ཅད།།སྲས་བཅས་རྒྱལ་བ་ཞི་ཁྲོས་གང་བ་ལ།།ཕྱི་ནང་གསང་བ་བདེ་སྟོང་དབྱེར་མེད་ཀྱི།།ཡེ་ཤེས་བླ་མེད་མཆོད་པས་མཉེས་བྱས་པས།།ཕྱོགས་བཅུའི་སངས་རྒྱས་ཀུན་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།གསང་འདུས་འཇམ་པའི་རྡོ་རྗེ་དཀྱིལ་འཁོར་བས།།མདོ་སྔགས་ཟབ་རྒྱས་བདུད་རྩིས་ཡོངས་བཀང་བའི།།རིན་ཆེན་བུམ་བཟང་གནང་ནས་དབང་བསྐུར་བས།།གྲངས་མེད་རྒྱུད་སྡེ་སྤྲོ་ཞིང་སྡུད་པ་བོ།།ཁྱབ་བདག་རྡོ་རྗེ་འཆང་དང་དབྱེར་མེད་པའི།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ནད་དང་གདོན་སོགས་ཕྱི་ནང་ཉེར་འཚེ་ཡི།།རྣམ་པ་དུ་མས་ཤིན་ཏུ་མནར་བའི་ཚེ།།མགོན་པོ་ཁྱོད་ལ་གུས་པས་སྐྱབས་བཅོལ་ན།།རྐྱེན་ངན་བར་ཆད་སེལ་བའི་བྱིན་རླབས་ཅན།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ནམ་ཞིག་ཚེ་ཡི་འཕེལ་རྐྱེན་ཟད་གྱུར་ཏེ།།མི་འདོད་འཆི་ལྟས་དུ་མ་ཤར་བའི་ཚེ།།ལོ་མང་བསྐལ་བར་གནས་པར་གསོལ་བཏབ་ན།།འཆི་མེད་རིག་འཛིན་སྩོལ་བའི་ཚེ་དཔག་མེད།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།གང་ཚེ་གནས་ལུགས་དོན་ལ་རྨོངས་པ་ཡི།།གཏི་མུག་མུན་པས་བློ་མིག་སྒྲིབ་པའི་ཚེ།།ཡེ་ཤེས་སྣང་བ་བསྐྱེད་པར་གསོལ་བཏབ་ན།།ཤེས་རབ་མིག་སྦྱིན་མཛད་པའི་འཇམ་པའི་དབྱངས།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།དངོས་སམ་རྨི་ལམ་དུས་སུ་ཚབས་ཆེན་གདོན།།ཤིན་ཏུ་དབྲལ་དཀའ་བཏབ་པའི་ལྟས་བྱུང་ཚེ།།མགོན་ཁྱོད་བསྒོམ་སྟེ་གཟུངས་སྔགས་བགྲང་གྱུར་ན།།འཇིགས་པའི་གདོན་ལས་སྒྲོལ་མཛད་མཐུ་སྟོབས་ཅན།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ཡི་དམ་རྡོ་རྗེ་འཇིགས་བྱེད་རང་ཉིད་ཀྱིས།།ཆོས་ཀྱི་རྒྱལ་བོ་ཕྱི་ནང་གསང་གསུམ་གྱི།།བཀའ་གཏད་རྗེས་གནང་མཛད་ནས་བཀའ་བསྒོས་པས།།ལས་བཞིའི་འཕྲིན་ལས་གཡེལ་མེད་སྒྲུབ་མཛད་པའི།།དམ་ཅན་ཆོས་སྲུང་རྣམས་དང་དབྱེར་མེད་པ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།རྒྱལ་ཆེན་རྣམ་སྲས་འཁོར་དང་བཅས་པ་ལ།།འཛིན་གཏོར་ཕུལ་ནས་འཕྲིན་ལས་བཅོལ་མ་ཐག།གང་དགོས་ཡོ་བྱད་ནམ་མཁའི་མཛོད་བཞིན་དུ།།འབད་པ་མེད་པར་ཤུགས་ཀྱིས་འབྱུང་འགྱུར་བས།།ནོར་ལྷ་གཏེར་བདག་རྣམས་དང་དབྱེར་མེད་པ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།བོད་ཡུལ་སྟོད་ཀྱི་མངའ་རིས་སྐོར་གསུམ་དང༌།།བར་གྱི་དབུས་གཙང་རུ་བཞི་མཐའ་དག་དང༌།།སྨད་ཀྱི་མདོ་ཁམས་སྒང་གསུམ་ཡུལ་གྲུ་ཀུན།།ཞྭ་སེར་བསྟན་པས་ཁྱབ་པའི་འཕྲིན་ལས་ཅན།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།སངས་རྒྱས་བསྟན་པ་མཐའ་ནས་མ་སྟོང་བར།།ཁྱོད་ཀྱི་བསླབ་གསུམ་ལུང་རྟོགས་བསྟན་པ་དང༌།།དེ་ཉིད་འཛིན་སྐྱོང་སྤེལ་བའི་དགེ་འདུན་སྡེ།།དེ་ལ་བསྙེན་བཀུར་བྱེད་པའི་སྦྱིན་བདག་རྣམས།།དབྱར་གྱི་ཆུ་གཏེར་བཞིན་དུ་འཕེལ་འགྱུར་བ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།གྲུབ་པའི་དབང་ཕྱུག་མཚོ་སྐྱེས་རྡོ་རྗེ་དང༌།།རྒྱལ་བའི་ཡུམ་མཆོག་ལབ་ཀྱི་སྒྲོལ་མ་ཡིས།།མ་འོངས་རྒྱལ་སྲིད་ཆོས་སྲིད་འཆོལ་བའི་དུས།།གྲགས་པའི་མཚན་འཆང་སྐྱེས་བུ་དམ་པ་ཡིས།།སྐྱེ་དགུ་བདེ་ལ་འགོད་པར་ལུང་བསྟན་པ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།བྱེས་སུ་འགྲོ་ཚེ་དགྲ་ཇག་ཆོམ་རྐུན་དང༌།།གཅན་གཟན་མེ་ཆུ་ཚེས་གྲངས་གཟའ་སྐར་གྱི།།མི་འཕྲོད་སྐྱོན་བྲལ་བསམ་སར་སླེབས་པ་དང༌།།ཆོས་དང་སྲིད་ཀྱི་འདོད་དོན་མ་ལུས་པ།།གང་བསམ་འབད་མེད་འགྲུབ་པའི་བྱིན་རླབས་མཆོག།རྒྱལ་བ་བློ་བཟང་གྲགས་པ་ལ་གསོལ་བ་འདེབས།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།འགྲོ་བའི་ཚེ་འདིའི་བདེ་སྐྱིད་ཀུན་འཇོམས་ཤིང༌།།ཕྱི་མར་ངན་སོང་སྡུག་བསྔལ་མྱོང་བའི་ལས།།དུས་ཀྱི་འཁྲུགས་པ་ནམ་ཡང་མི་འབྱུང་ཞིང༌།།ཆར་ཆུ་དུས་འབབས་འབྲུ་རྣམས་སྨིན་པ་རུ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།རྒྱལ་བློན་འབངས་རྣམས་དགེ་བཅུའི་ལམ་ལ་གནས།།མཐོ་ལ་བཀུར་སྟི་མཉམ་ལ་མཛའ་ཞིང་མཐུན།།དམན་པའི་འགྲོ་རྣམས་བྱམས་བརྩེས་སྐྱོང་བ་ཡི།།ཡ་རབས་སྐྱེ་བོའི་ལུགས་བཟང་དར་བ་རུ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ནམ་ཞིག་འཆི་འཕོའི་ཚེ་ན་མནར་གཅོད་དང༌།།བར་དོའི་གཤིན་རྗེའི་འཇིགས་སྐྲག་ཀུན་ཞི་ནས།།དགའ་ལྡན་མཁའ་སྤྱོད་བདེ་བ་ཅན་སོགས་སུ།།སྐྱེས་ནས་བདེ་གཤེགས་ཀུན་གྱི་ཞལ་མཐོང་བར།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།མི་ཕམ་ཆོས་ཀྱི་བླ་མའི་མདུན་ས་རུ།།རྒྱལ་སྲས་ཐུ་བོ་འཇམ་དཔལ་སྙིང་བོ་ཡིས།།རིས་མེད་འགྲོ་བ་རིགས་དྲུག་མ་ལུས་པ།།དགའ་ལྡན་ལྷ་ཡུལ་ཆོས་ཀྱི་ཕོ་བྲང་དུ།།འདྲེན་པར་གསང་བའི་བདག་པོས་ལུང་བསྟན་པ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།གངས་རིའི་ར་བས་བསྐོར་བའི་ཞིང་ཁམས་སུ།།ཕན་བདེའི་རྩ་བ་མགོན་པོ་ཁྱོད་ཀྱི་བསྟན།།བཤད་སྒྲུབ་གཉིས་དང་འཁོར་ལོ་གསུམ་གྱི་སྒོས།།སྲིད་མཐའི་བར་དུ་འཕེལ་ཞིང་རྒྱས་པ་རུ།།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།དེ་ལྟར་གདུང་ཤུགས་དྲག་པོས་རྩེ་གཅིག་ཏུ།།གསོལ་བཏབ་བདེན་ཚིག་མགོན་ཁྱོད་བྱིན་རླབས་མཐུས།།གནས་སྐབས་མཐར་ཐུག་བསམ་དོན་མ་ལུས་པ།།འབད་མེད་མྱུར་དུ་འགྲུབ་པའི་དངོས་གྲུབ་མཆོག།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།རྨད་བྱུང་སྲས་བཅས་རྒྱལ་བའི་བྱིན་རླབས་དང༌།།རྟེན་འབྲེལ་བསླུ་བ་མེད་པའི་བདེན་པ་དང༌།།བདག་གི་ལྷག་བསམ་དག་པའི་མཐུ་སྟོབས་ཀྱིས།།རྣམ་དག་སྨོན་པའི་གནས་ཀུན་མྱུར་འགྲུབ་ཤོག།རྒྱལ་བ་བློ་བཟང་གྲགས་པ་ལ་གསོལ་བ་འདེབས།།བསམ་པ་ལྷུན་གྱིས་འགྲུབ་པར་བྱིན་གྱིས་རློབས།།ཅེས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྒྱལ་བ་༧བློ་བཟང་གྲགས་པ་ལ་གསོལ་བ་འདེབས་པའི་སྨོན་ཚིག་བསམ་པ་ལྷུན་གྱིས་འགྲུབ་པ་ཞེས་བྱ་བ་འདི་ནི། གསོ་བ་རིག་པའི་སྒོ་ནས་གཞན་ལ་ཕན་པའི་འཕྲིན་ལས་རྒྱ་ཆེ་ཞིང་དད་བརྩོན་དང་ཤེས་རབ་ཕུལ་དུ་བྱུང་བའི་སྨན་པ་དཀོན་མཆོག་དར་རྒྱས་ཀྱིས་ནན་ཏན་ཆེན་པོས་ཡང་དང་ཡང་དུ་བསྐུལ་ངོར།༧ རྒྱལ་མཁན་པོ་ ༧ གྲགས་པ་རྒྱལ་མཚན་གྱིས་སྦྱར་བའི་ཡི་གེ་བ་ནི་དགེ་སློང་བློ་བཟང་ཆོས་འཕེལ་ལོ།། 后记：此《祈愿成就文》是向三世诸佛体性化现之胜者洛桑扎巴（善慧名称）前启请之发愿文。是在医方明门中利他事业广大，且信、进、慧超胜之医师衮却达吉（三宝兴盛）殷勤敦请下，杰堪布·扎巴坚赞（名称胜幢）所造，比丘洛桑群培（善慧法兴）执笔。
汉文由鲁仓寺的阿克喜饶指导，阿克贡觉解释，文愿法师、遍能法师、中观学长、清凉学长，文瀚等人共同参与翻译。法镜2015.10.1日整理完初稿。
