སྤྱི་ཟླ་༡༡ཚེས་༢༧ཉིན། རྒྱལ་ཁབ་གསར་སྤེལ་དངུལ་ཁང་གིས་གཞུང་ཕྱོགས་དྲ་ཚིགས་ཐོག་གསལ་བསྒྲགས་ནན་པོ་ཞིག་སྤེལ་ཡོད་པ་རེད།
རྒྱལ་ཁབ་གསར་སྤེལ་དངུལ་ཁང་གིས་གསལ་བསྒྲགས་ནང་ཉེ་དུས་དངུལ་ཁང་དེ་གས་མིང་ལ་༼ རྒྱལ་ཁབ་གསར་སྤེལ་དངུལ་ཁང་སྔོན་དུ་སྒྲུབ་པ ༽ཞེས་པའི་Appཡིས་རྒྱལ་ཁབ་གསར་སྤེལ་དངུལ་ཁང་གི་མིང་ཁྱེར་ནས་དྲིལ་བསྒྲགས་རྫུན་མ་བྱས་ཏེ་འཛད་སྤྱོད་པ་དང་མ་འཇོག་མཁན་ལོག་ལམ་དུ་ཁྲིད་པ་ཤེས་རྟོགས་བྱུང་ཡོད། དེའི་ཐད་རྒྱལ་ཁབ་གསར་སྤེལ་དངུལ་ཁང་གིས་གསལ་བསྒྲགས་ནན་པོ་སྤེལ་བ་གཤམ་གསལ།
དང་པོ། རྒྱལ་ཁབ་གསར་སྤེལ་དངུལ་ཁང་དང་༼ རྒྱལ་ཁབ་གསར་སྤེལ་དངུལ་ཁང་སྔོན་དུ་སྒྲུབ་པ ༽ཞེས་པའི་App དེ་བཞིན་འབྲེལ་ཡོད་ཁེ་ལས་དང་མི་སྣ་ཡོངས་དབར་འབྲེལ་བ་གང་ཡང་མེད། དེའི་འབྲེལ་ཡོད་དྲ་མིན་དང་དྲ་ཐོག་ཁྲོམ་རའི་གཉེར་སྐྱོང་བྱེད་སྒོ་དང་དེ་བཞིན་བྱ་སྤྱོད་གཞན་དག་ཚང་མ་རྒྱལ་ཁབ་གསར་སྤེལ་དངུལ་ཁང་དང་འབྲེལ་བ་གང་ཡང་མེད་པས། རྒྱལ་ཁབ་གསར་སྤེལ་དངུལ་ཁང་གིས་དེའི་ཐད་འགན་འཁྲི་གང་ཡང་འཁུར་རྒྱུ་མིན།
གཉིས་པ། རྒྱལ་ཁབ་གསར་སྤེལ་དངུལ་ཁང་ངམ་ཡང་ན་རྒྱལ་ཁབ་གསར་སྤེལ་དངུལ་ཁང་ཁོངས་གཏོགས་ཀྱི་ཡན་ལག་ཀུང་སིའི་མིང་ཐོག་ནས་ཐོ་འགོད་བྱེད་པ་དང་། དྲིལ་བསྒྲགས་གཉེར་ཚོང་བྱེད་པ། དེ་བཞིན་བྱ་སྤྱོད་གཞན་སྤེལ་མཁན་རྩ་འཛུགས་དང་མི་སྒེར་གྱིས་ཁྲིམས་འགལ་སྒྲིག་འགལ་གྱི་བྱ་སྤྱོད་མཐའ་དག་འཕྲལ་དུ་མཚམས་འཇོག་བྱེད་དགོས། རྒྱལ་ཁབ་གསར་སྤེལ་དངུལ་ཁང་གིས་ཁྲིམས་ལྟར་འབྲེལ་ཡོད་རྩ་འཛུགས་དང་མི་སྒེར་གྱི་ཁྲིམས་ལུགས་ཀྱི་འགན་འཁྲི་མུ་མཐུད་བདའ་འདེད་གཏོང་བའི་དབང་ཆ་སོར་འཇོག་བྱ་རྒྱུ་ཡིན།
གསུམ་པ། འཛད་སྤྱོད་པ་དང་མ་འཇོག་མཁན་རྣམས་ཀྱིས་ཞིབ་བཤེར་དབྱེ་འབྱེད་ལ་དོ་སྣང་བྱས་ཏེ། ཉེན་ཁ་སྔོན་འགོག་གི་འདུ་ཤེས་ཇེ་མཐོར་གཏོང་བ་དང་། རང་གི་རྒྱུ་ནོར་བདེ་འཇགས་ལ་སྲུང་སྐྱོབ་བྱས་ཏེ་གཡོ་འོག་ཏུ་མ་ཚུད་པ་བྱ་དགོས།
