شي جينپيڭ برازيليانىڭ زۇڭتۇڭى لۋلامەن بىرگە تىلشىلەرمەن كەزدەستى

ءوز حابارىمىز. مەملەكەت ءتوراعاسى شي جينپيڭ جەرلىك ۋاقىت 11-ايدىڭ 20-كۇنى تۇستەن بۇرىن برازيليانىڭ زۇڭتۇڭى لۋلامەن بىرگە برازيلياداعى زۇڭتۇڭ سارايى الۆورادا سارايىندا كەڭەس وتكىزگەننەن كەيىن تىلشىلەرمەن كەزدەستى.

شي جينپيڭ بىلاي دەپ اتاپ كورسەتتى: بۇل مەنىڭ 5 جىلدان كەيىن «سۇيىسپەنشىلىككە جانە ۇمىتكە تولى وسى جەرگە» تاعى دا قادام تاستاۋىم. اتتانار الدىندا، مەن برازيليانىڭ ءار سالاسىنداعى دوس قايراتكەرلەردەن كەلگەن كوپتەگەن حاتتى تاپسىرىپ الدىم، ولاردىڭ حاتىندا برازيليا حالقىنىڭ جۇڭگو-برازيليا دوستىعىن قاستەرلەۋ جانە ەكى ەل دوستىعىن تەرەڭدەتۋ جونىندەگى تىلەكتەرى بەينەلەنىپ، مەنى قاتتى اسەرلەندىردى. الگىندە لۋلا زۇڭتۇڭمەن ىقىلاستى دوستىق بەينەدە ناتيجەلى كەڭەس وتكىزدىم. ءبىز جۇڭگو-برازيليا قاتىناسىنىڭ 50 جىلدىق دامۋ بارىسىن بىرگە ەسكە الىپ، ءبىر اۋىزدان بىلاي دەپ قارادىق: ەكى ەل قاتىناسى تاريحتاعى ەڭ جاقسى مەزگىلدە بولىپ، جاھاندانعان، ستراتەگيالىق جانە ۇزاق بولاشاقتىق ىقپالى كۇن سايىن ايگىلەنىپ، دامۋ جولىنداعى ءىرى ەلدەردىڭ قول ۇستاسا بىرگە ىلگەرىلەۋىنىڭ، ىنتىماقتاسا سەلبەسۋىنىڭ ۇلگىسىنە اينالدى.

شي جينپيڭ بىلاي دەدى: ءبىز جۇڭگو-برازيليا قاتىناسىنىڭ بولاشاق دامۋى جونىندە جاڭا ستراتەگيالىق ورتاق تانىمعا كەلدىك. مۇنىڭ ىشىندە ەڭ ماڭىزدىسى، ءبىز ەكى جاقتى قاتىناستى اناعۇرلىم ءادىل دۇنيە ءجۇزىن جانە اناعۇرلىم باياندى عالامشاردى قول ۇستاسا قۇراتىن جۇڭگو-برازيليا تاعدىرلاس ورتاق تۇلعاسىنا كوتەرۋدى بىرگە ۇيعاردىق، سونىمەن بىرگە «ءبىر بەلدەۋ، ءبىر جولدى» ورتاق قۇرۋ دارىپتەمەسىن برازيليانىڭ دامۋ ستراتەگياسىمەن ۇشتاستىردىق. دۇنيە اۋقىمى جەدەل وزگەرگەن جاعدايدا، بۇل جۇڭگو مەن برازيليانىڭ دامۋ جولىنداعى ەكى ءىرى ەلدىڭ وزگەرىستى تانۋ، وزگەرىسكە توتەپ بەرۋ، وزگەرىسكە تالپىنۋ بەكىمىن ايگىلەدى، بۇل ەكى ەل قاتىناسىنىڭ بۇرىنعىعا مۇراگەر، كەيىنگىگە بۇيداگەر بولۋىن جەبەپ، كەلەسى «التىن 50 جىلدى» باستايتىن بولادى، سونىمەن بىرگە دۇنيە ءجۇزى وڭتۇستىك ەلدەردىڭ ىنتىماقتاسا ءوزىن الۋەتتەندىرۋىنە ۇلگى بولىپ، دامۋ جولىنداعى ەلدەردىڭ دۇنيە ءجۇزىن جونگە سالۋداعى ۋاكىلدىك سيپاتى مەن ءسوز سويلەۋ ۇقىعىن جوعارىلاتۋعا تىڭ ۇلەس قوسادى.

شي جينپيڭ بىلاي دەدى: ءبىز ءبىر اۋىزدان ستراتەگيالىق ءوزارا سەنىمدىلىكتى ۇزدىكسىز تەرەڭدەتىپ، يەلىك ۇقىق، حاۋىپسىزدىك، دامۋ مۇددەسى سياقتى وزەكتى ىستەرگە ساياتىن ماسەلەلەردە ءبىرىن-ءبىرى باتىل قولداپ، وزدەرىنىڭ جوعارى ساپالى دامۋىن جەبەۋىمىز كەرەك، -دەپ قارادىق. شىعىس جانە باتىس جارتى شارداعى دامۋ جولىنداعى ەكى ءىرى ەل رەتىندە، ءبىز دۇنيە ءجۇزى وڭتۇستىك ەلدەردىڭ ورتاق مۇددەسىن قورعاۋعا جەتەكشىلىك ەتۋ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن جەبەۋ سىندى تاريحي اۋىر مىندەتتى ىرىقتىلىقپەن ارقالاۋىمىز كەرەك.

شي جينپيڭ بىلاي دەدى: ءبىز ءبىر اۋىزدان ەكى ەلدىڭ دامۋ ستراتەگياسىن ۇشتاستىرۋ سىندى كەلەلى ءىستى ويداعىداي ىستەۋ كەرەك، -دەپ قارادىق. ەكونوميكا-ساۋدا، فينانس، عىلىم-تەحنيكا، نەگىزدىك قۇرىلعى قۇرىلىسى، ورتانى قورعاۋ سياقتى ءتۇيىندى سالالارداعى سەلبەستىكتى تەرەڭدەتىپ، ەنەرگيا تيپىن وزگەرتۋ، سيفرلى ەكونوميكا، جاساندى زەيىن، جاسىل كەن ونىمدەرى سياقتى جاڭادان گۇلدەنگەن سالالارداعى سەلبەستىكتى كۇشەيتىپ، ۋاقىت كۇتىپ تۇرمايدى دەيتىن تەبىنمەن ەكى ەلدىڭ ناقتى سەلبەستىگىن تەرەڭدەتىپ جانە ناقتىلاندىرىپ، جۇڭگو مەن برازيليانىڭ ءوز-ءوزىنىڭ وسىزامانداندىرۋ قۇرىلىسىنىڭ دامۋىنا دەم بەرۋ كەرەك.

شي جينپيڭ بىلاي دەدى: ءبىز ءبىر اۋىزدان بىلاي دەپ قارادىق: جۇڭگو مەن برازيليا ب م ۇ، 20 ەل توبى، بريكس ەلدەرى سياقتى كوپ جاقتى مەحانيزمدە ۇزدىكسىز تىعىز سەلبەسىپ، اشارشىلىق پەن كەدەيلىك، وڭىرلىك قاقتىعىس، كليمات وزگەرىسى، ينتەرنەت حاۋىپسىزدىگى سياقتى ءداستۇرلى جانە بەي ءداستۇرلى سالالارداعى حاۋىپسىزدىك سىن-سايىستارعا بىرگە توتەپ بەرىپ، دۇنيە ءجۇزىنىڭ بەيبىتشىلىگى مەن دامۋ ىستەرىنە جۇڭگو مەن برازيليانىڭ جاڭا ۇلەسىن قوسۋى كەرەك. كەلەر جىلى جۇڭگو-لاتىن امەريكا تالقىسىنىڭ رەسمي ىسكە قوسىلعاندىعىنىڭ 10 جىلدىعى، جۇڭگو برازيليامەن جانە لاتىن امەريكاداعى باسقا ەلدەرمەن بىرگە جۇڭگو-لاتىن امەريكا سەلبەستىگىنىڭ تىڭ ساتىعا كوتەرىلۋىن ىلگەرىلەتۋدى قالايدى.

شي جينپيڭ بىلاي دەپ اتاپ كورسەتتى: قازىر دۇنيە ونشا تىنىش ەمەس، ءالى دە كوپتەگەن وڭىرلەردە سوعىس ءورتى لاۋلاپ، الاساپىراندىق جاعدايلار تۋىلۋدا. ادامزات بولىنبەس حاۋىپسىزدىك ورتاق تۇلعا، ورتاق، جالپىلىق، سەلبەستىك، باياندى حاۋىپسىزدىك كوزقاراسىن امالياتتا ايگىلەگەندە عانا، جاپپاي حاۋىپسىز جولىمەن جۇرۋگە بولادى.

شي جينپيڭ مىنالاردى باسا دارىپتەدى: جۇڭگو مەن برازيليا بىرلەسىپ ۋكراينا داعدارىسىن ساياسي جولمەن شەشۋ جونىندەگى «6 ءتۇرلى ورتاق تانىمدى» جاريالاپ، دۇنيە ءجۇزى وڭتۇستىك ەلدەرمەن بىرگە ۋكراينا داعدارىسى جونىندە «بەيبىت دوستار» گرۋپپاسىن قۇردى. ءبىز بەيبىتشىلىككە كۇش سالاتىن اناعۇرلىم كوپ ۇندەردى توپتاپ، ۋكراينا داعدارىسىن ساياسي جولمەن شەشۋگە داڭعىل جول اشۋىمىز كەرەك. ءبىز گازا قاقتىعىسىنىڭ جالعاستى كەڭەيۋىنەن قاتتى الاڭدايمىز، سوعىستى تەز ارادا توقتاتۋعا ۇندەيمىز، «ەكى ەل جوباسىن» تياناقتاندىرىپ، پالەستين ماسەلەسىن جالپى بەتتىك، ءادىل، باياندى شەشۋ جولىندا قاجىماي-تالماي قۇلشىنامىز. جۇڭگو مەن برازيليادا ادىلەتتى جاقتايتىن، ادامگەرشىلىكتى سومدايتىن ءداستۇر مەن جاۋاپكەرشىلىك بار، جۇڭگو برازيليامەن بىرگە جۇڭگو-برازيليا تاعدىرلاس ورتاق تۇلعاسىنىڭ داۋىرلىك ءمانىن ۇزدىكسىز بايىتىپ، ناعىز كوپ جاقتىلىقتى باتىل قورعاپ، كەدەيلىك ەمەس قايتا دامۋ، قارسىلاسۋ ەمەس قايتا سەلبەسۋ، زورەكەرلىك ەمەس قايتا ءادىل بولۋ سىندى جاڭا ءداۋىردىڭ كۇشتى ءۇنىن بىرگە تاراتىپ، اناعۇرلىم كوركەم دۇنيە ءجۇزىن قول ۇستاسا قۇرۋدى قالايدى.

لۋلا ءتوراعا شي جينپيڭنىڭ ساپارلاي كەلگەندىگىن ىقىلاستى تۇردە قارسالاتىندىعىن ءبىلدىرىپ بىلاي دەدى: برازيليا مەن جۇڭگونىڭ ارالىعى شالعاي بولعانىمەن، قۇن ۇستانىمى قارايلاس، ورتاق مۇددەسى كەڭ، دوستىعى تەرەڭ، برازيليا مەن جۇڭگونىڭ سەلبەستىگى ستراتەگيالىق مانگە جانە دۇنيە جۇزىلىك ىقپالعا يە. جۇڭگو برازيليانىڭ ەڭ ماڭىزدى ساۋدا جانە قارجى قوسۋ سەرىگى، جۇڭگو كاسىپورىندارى برازيليادا برازيليانىڭ ەكونوميكالىق، قوعامدىق دامۋىن پارمەندى جەبەدى. ءتوراعا شي جينپيڭ ەكەۋىمىز ەكى ەل قاتىناسىن اناعۇرلىم ءادىل دۇنيە ءجۇزىن جانە اناعۇرلىم باياندى عالامشاردى قول ۇستاسا قۇراتىن برازيليا-جۇڭگو تاعدىرلاس ورتاق تۇلعاسىنا كوتەرۋدى ۇيعاردىق، سونداي-اق برازيليانىڭ دامۋ ستراتەگياسىن جۇڭگونىڭ «ءبىر بەلدەۋ، ءبىر جول» دارىپتەمەسىن ۇشتاستىرىپ، باياندى دامۋ، نەگىزدىك قۇرىلعى، فينانس، ەنەرگيا كاسىبىنە بۇرىلىس جاساۋ، عارىش سياقتى سالالاردا ءتۇيىندى تۇردە سەلبەستىكتى كەڭەيتىپ جانە تەرەڭدەتىپ، ەكى ەل قاتىناسىن تىڭ دەڭگەيگە كوتەرۋدى ۇيعاردىق. برازيليا مەن جۇڭگونىڭ حالىقارالىق دامۋ جانە حاۋىپسىزدىك سياقتى كەلەلى ماسەلەلەردەگى مايدانى وسكەلەڭ بىردەي. جۇڭگو جاقتىڭ برازيليانىڭ 20 ەل توبىنا ءتوراعا ەل بولۋ قىزمەتىن زور كۇشپەن قولداعاندىعىنا ءارى «اشارشىلىق پەن كەدەيلىككە قارسى اتتانۋ الەمدىك وداعىنا» الدىمەن قاتىناسقاندىعىنا العىس ايتامىن. ءبىز ب م ۇ، 20 ەل توبى، بريكس ەلدەرى سياقتى كوپ جاقتى مەحانيزمدەگى قاتىناستى، سەلبەستىكتى اناعۇرلىم جيىلەتىپ، الەمدىك جونگە سالۋ جۇيەسى رەفورماسىن بىرگە دارىپتەپ، اناعۇرلىم ءادىل، دەموكراتيالى، تەرەزەسى تەڭ جانە باياندى حالىقارالىق جۇيە ورناتىپ، قولامتالى ماسەلەلەردى بەيبىت جولمەن شەشۋدى ىلگەرىلەتەمىز. ءتوراعا شي جينپيڭنىڭ وسى رەتكى ساپارى برازيليا-جۇڭگو قاتىناسىنىڭ جاڭا تاريحي پاراعىن اشتى.

 ساي چي، ۋاڭ ي قاتارلىلار كەزدەسۋدە بىرگە بولدى.