2024ལོའི་ཟླ10པའི་ཚེས15ཉིན། ངེས་དོན་གྱི་མཁས་པའི་དབང་པོ་རྗེ་དམུ་དགེ་བསམ་གཏན་རྒྱ་མཚོ་མཆོག་སྐུ་འཁྲུངས་ནས་ལོ་བརྒྱ་དང་བཅུ་འཁོར་བའི་སྐལ་བ་བཟང་པོ་དང་བསྟུན་ནས། ཟུང་ཆུ་རྫོང་གི་འབྲེལ་ཡོད་ལས་ཁུངས་དང་། དམུ་དགེ་བཀྲ་ཤིས་འཁོར་ལོའི་དགོན། གཞན་ཡང་དམ་པ་ཁོང་གི་དངོས་སློབ་སོགས་ཀྱིས་ལྷག་བསམ་ཟོལ་མེད་ཀྱིས་རྒྱབ་སྐྱོར་དང་བརྩེ་བ་རྣམ་དག་གིས་མཐུན་རྐྱེན་གང་ལེགས་བསྐྲུན་པའི་འོག་ཏུ། རྗེ་བཙུན་བསམ་གཏན་རྒྱ་མཚོ་དཔལ་བཟང་པོའི་རྗེས་དྲན་ཁང་གནས་སྤོས་ནས་བཞེངས་སྐྲུན་ལེགས་འགྲུབ་བྱུང་བའི་སྒོ་འབྱེད་མཛད་སྒོ་དམ་པ་ཁོང་གི་འཁྲུངས་ཡུལ་གྱི་དམུ་དགེ་བཀྲ་ཤིས་འཁོར་ལོའི་དགོན་ནས་སྤེལ་བ་རེད།
རྗེ་བཙུན་བསམ་གཏན་རྒྱ་མཚོ་དཔལ་བཟང་བོའི་རྗེས་དྲན་ཁང་ནི་ཉིས་སྟོང་བཅུ་དྲུག་ལོར་བཞེངས་སྐྲུན་བྱེད་མགོ་བརྩམས་ཤིང་། བསྟུད་མར་ལོ་ངོ་བརྒྱད་ཀྱི་རིང་ལ་དམ་པ་ཁོང་གི་སྐུ་ཚ་བསླབ་གསུམ་རྒྱ་མཚོ་དང་ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ་འབུམ་སྐྱབས་སོགས་ཀྱིས་གཙོ་བྱས་ཏེ་རྗེས་དྲན་ཁང་གི་འཛུགས་སྐྲུན་གྱི་བཀོད་པ་དང་། དམ་པ་ཁོང་གི་སྐུ་ཚེ་ཧྲིལ་པོའི་རིང་གི་གསུང་རྩོམ་གལ་ཆེན་གྱི་མ་ཕྱི། སྐུ་པར་གཙོ་བོ། གཞན་ཡང་སྐུ་ཚེའི་མཛད་རྣམ་གྱི་ཐང་ག་སོགས་རིག་དངོས་རྩ་ཆེན་མང་པོ་འཚོལ་སྡུད་དང་ལེགས་སྒྲིག་བྱས་ཏེ། མཁས་དབང་དམུ་དགེ་བསམ་གཏན་རྒྱ་མཚོ་མཆོག་གི་རིག་གཞུང་བགྲོ་གླེང་ཚོགས་འདུ་སྐབས་གཉིས་པ་འཚོགས་པའི་གོ་སྐབས་དང་བསྟུན་ནས་ཡོངས་སུ་བཞེངས་གྲུབ་ལེགས་འགྲུབ་བྱུང་བ་རེད།
ཡོང་ཁུངས། ཁམས་པའི་བརྙན་འཕྲིན།
ཀུན་ཁྱབ་འོད་སྣང་འཕྲིན་སྟེགས།
གཞན་ལ་སྐུར།
ཉར་ཚགས།
མཐེ་བོང་ནོན།
མེ་ཏོག་ནོན།
