ཞི་ཅིན་ཕིང་དང་འཇར་མན་གྱི་ཙུང་ལི་ཧྲོའར་ཚི་ཐུག་འཕྲད་གནང་།

ས་གནས་དེ་གའི་དུས་ཚོད་ཟླ་བཅུ་གཅིག་པའི་ཚེས་བཅུ་དགུ་ཉིན་གྱི་སྔ་དྲོར། ལི་གཡོད་རེ་ནེ་ལུར་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་རྩེ་འཛོམས་གྲོས་ཚོགས་ལ་ཞུགས་རིང་འཇར་མན་གྱི་ཙུང་ལི་ཧྲོའར་ཚི་དང་ཐུག་འཕྲད་གནང་བ་རེད། 

ཞི་ཅིན་ཕིང་གིས། ད་ལོའི་ཟླ་བཞི་པར་ཁྱེད་ཉིད་ཀྲུང་གོར་འཚམས་འདྲིར་ཕེབས་སྐབས། ང་ཚོས་ལྷག་བསམ་ཟོལ་མེད་དང་གཏིང་ཟབ་ལ་ཕན་འབྲས་ལྡན་པའི་སྤེལ་རེས་གནང་ཡོད། ལོ་ཕྱེད་ལྷག་རིང་རྒྱལ་ཁབ་གཉིས་པོས་འབག་མེད་འཕེལ་རྒྱས་དང་ རྒྱུན་མཐུད་འགྲིམ་འགྲུལ། ཨ་ཧྥེ་རི་ཁའི་ཞིང་ལས་མཉམ་ལས་སོགས་ཁྱབ་ཁོངས་ཀྱི་མཉམ་ལས་ལ་གྲུབ་འབྲས་གལ་ཆེན་ཐོབ་པ་དང་། ཀྲུང་གོ་དང་འཇར་མན་གྱི་འབྲེལ་བར་མུ་མཐུད་སྐྱེ་སྟོབས་དང་གསོན་ཤུགས་གསར་པ་འཕེལ་ཡོད། མིག་སྔར། འཛམ་གླིང་གི་ལོ་བརྒྱའི་འཕོ་འགྱུར་ཇེ་མགྱོགས་སུ་འགྲོ་བཞིན་ཡོད་པས། འཛམ་གླིང་འཕེལ་རྒྱས་དེ་འགག་རྩའི་ལམ་དུ་སླེབས་ཡོད། འཛམ་གླིང་གི་དཔལ་འབྱོར་ཕུང་གཟུགས་ཨང་གཉིས་པ་དང་གསུམ་པ་དང་ཤུགས་རྐྱེན་གལ་ཆེན་ལྡན་པའི་རྒྱལ་ཁབ་ཆེན་པོ་ཡིན་པའི་ཀྲུང་གོ་དང་འཇར་མན་གྱིས་ཕུགས་རྒྱང་རིང་པོ་དང་འཐབ་ཇུས་ཀྱི་ཟུར་ཚད་ཐོག་ནས། ཀྲུང་གོ་དང་འཇར་མན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བརྟན་དུ་གཏོང་རྒྱུ་མཐའ་འཁྱོངས་ཀྱིས་ཕན་ཚུན་གྲུབ་འབྲས་ཐོབ་པའི་མཉམ་ལས་ཀྱི་གཏམ་རྒྱུད་མུ་མཐུད་རྩོམ་དགོས་ཞེས་གསུངས་པ་རེད། 

ཞི་ཅིན་ཕིང་གིས། ཀྲུང་གོས་འཇར་མན་ཐད་ཀྱི་སྲིད་ཇུས་བརྟན་བརླིང་རང་བཞིན་དང་རྒྱུན་མཐུད་རང་བཞིན་ཆེན་པོ་རྒྱུན་འཁྱོངས་བྱས་ཡོད། འཇར་མན་ཕྱོགས་དང་མཉམ་དུ་ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་བརྩི་འཇོག་བྱ་རྒྱུ་མཐའ་འཁྱོངས་དང་། མཐུན་པ་ཡོང་ཐབས་དང་མི་མཐུན་པ་སོར་འཇོག ཕན་ཚུན་སྤེལ་རེས་སློབ་སྦྱོང་རྒྱུན་འཁྱོངས་བྱ་འདོད་ཡོད།  ཀྲུང་གོ་དང་འཇར་མན་རྒྱལ་ཁབ་གཉིས་པོའི་དཔལ་འབྱོར་གྱི་ཁེ་ཕན་ཚད་མཐོའི་མཉམ་འདྲེས་ཡིན་པས་ཀྲུང་གོ་དང་འཇར་མན་རྒྱལ་ཁབ་གཉིས་པོའི་མཉམ་ལས་ནི་འཕེལ་རྒྱས་ལ་མཉམ་དུ་སྐུལ་འདེད་དང་མ་འོངས་མཉམ་དུ་གཏོད་པའི་གོ་སྐབས་ཤིག་རེད། ཀྲུང་གོས་འཇར་མན་འདི་ཉིད་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་མཁན་མཉམ་ལས་རོགས་ཟླ་གལ་ཆེན་ཞིག་ཏུ་བརྩིས་ནས། འཇར་མན་གྱི་ཁེ་ལས་ལ་ཡངས་པའི་ཁྲོམ་རའི་གོ་སྐབས་མུ་མཐུད་མཁོ་འདོན་བྱ་རྒྱུ་ཡིན། ཕྱོགས་གཉིས་པོས་ཨང་ཀི་ཅན་དང་རིག་ནུས་ཅན། ཐཱན་ཉུང་ཅན་བཅས་ལ་དམིགས་ནས་མཉམ་ལས་ཀྱི་སྤུས་ཚད་མཐོར་གཏོང་དང་རིམ་སྤོར་ལ་སྐུལ་འདེད་གཏོང་བ། ལག་གདང་སྦྲེལ་ནས་ཕྱོགས་གསུམ་པའི་ཁྲོམ་ར་གསར་འབྱེད་བྱས་ཏེ་མཉམ་ལས་གཉིས་ཕན་ཡོང་བ་བྱེད་དགོས། ཀྲུང་གོས་ཡོ་རོབ་ནི་སྣེ་མང་ཅན་གྱི་འཛམ་གླིང་གི་གལ་ཆེའི་གྲས་ཤིག་ཡིན་པ་དང་། ཡོ་རོབ་དང་མཉམ་ལས་བྱེད་པ་དང་ལག་གདང་སྦྲེལ་ནས་འགྲན་སློང་ལ་ཁ་གཏད་བཅག་སྟེ། ཀྲུང་གོ་དང་ཡོ་རོབ་དབར་གྱི་འབྲེལ་བ་རྒྱུན་མཐུད་དང་བརྟན་པོ། སྐྱོན་བྲལ་གྱི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུའི་ངོས་འཛིན་བྱེད་ཀྱི་ཡོད། ཡོ་རོབ་མནའ་འབྲེལ་གྱིས་ཀྲུང་གོའི་གློག་སྒུལ་རླངས་འཁོར་གྱི་སྒོ་ཁྲལ་འཕར་མ་བསྡུ་བར་འཛམ་གླིང་ཧྲིལ་པོས་དོ་ཁུར་བྱེད་བཞིན་ཡོད། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཕན་ཚུན་གཏམ་གླེང་དང་གྲོས་མོལ་གྱི་ཐོག་ནས་མི་མཐུན་པའི་ཆ་ཐག་གཅོད་བྱ་རྒྱུ་མཐའ་འཁྱོངས་བྱེད་ཀྱི་ཡོད་པས། འཇར་མན་ཕྱོགས་ཀྱིས་དེའི་ཐད་མུ་མཐུད་ནུས་པ་གལ་ཆེན་འདོན་རྒྱུའི་རེ་བ་ཡོད་ཅེས་གསུངས་པ་རེད། 

ཧྲོའར་ཚི་ཡིས། ངས་ཐེངས་སྔ་མར་ཀྲུང་གོར་འཚམས་འདྲི་བྱས་ཚུན། འཇར་མན་དང་ཀྲུང་གོའི་དབར་གྱི་འབྲེལ་བར་འཕེལ་རྒྱས་ཡག་པོ་བྱུང་ཡོད། མིག་སྔའི་རྙོག་འཛིང་ཆེ་བའི་རྒྱལ་སྤྱིའི་དུས་བབ་འོག་འཇར་མན་དང་ཀྲུང་གོས་འབྲེལ་གཏུག་དང་མཉམ་ལས་ལ་ཤུགས་སྣོན་རྒྱག་རྒྱུ་དེ་ནི་ཧ་ཅང་གལ་འགངས་ཆེ་བ་ཞིག་རེད། འཇར་མན་ཕྱོགས་ཀྱིས་ཀྲུང་གོ་ཕྱོགས་དང་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྔར་བས་འཕེལ་རྒྱས་གཏོང་བ་དང་འདྲ་མཉམ་དང་། ཟོལ་མེད། ཕན་ཚུན་བརྩི་འཇོག་བཅས་ཀྱི་སྙིང་སྟོབས་ལ་བརྟེན་ནས་ཕྱོགས་གཉིས་དང་ཕྱོགས་མང་གི་ཕན་ཚུན་གཏམ་གླེང་དང་མཉམ་ལས་ལ་ཤུགས་སྣོན་རྒྱག་པ། མི་མཐུན་པའི་ཆ་ཐག་གཅོད་འོས་འཚམ་བྱེད་པ། གཉིས་ཁེ་གཉིས་ཕན་ཡོང་བ་བཅས་བྱས་ཏེ་འཛམ་གླིང་གི་དཔལ་འབྱོར་སླར་གསོ་ཡོང་བ་དང་ཐུན་མོང་དར་རྒྱས་ཡོང་ཆེད་ལེགས་སྐྱེས་འབུལ་རྒྱུའི་རེ་བ་ཡོད། ཡོ་རོབ་དང་ཀྲུང་གོས་ཕན་ཚུན་གཏམ་གླེང་དང་གྲོས་མོལ་བྱས་པ་བརྒྱུད་གློག་སྒུལ་རླངས་འཁོར་གྱི་གནད་དོན་གང་མགྱོགས་ཐག་གཅོད་བྱ་རྒྱུའི་རེ་བ་ཡོད། འཇར་མན་གྱིས་དེའི་ཐད་འབད་བརྩོན་ཧུར་ཐག་བྱེད་འདོད་ཡོད་ཅེས་གསུངས་པ་རེད། 

ཕྱོགས་གཉིས་པོས་ད་དུང་ཡུག་རེན་གྱི་ཉམས་ཉེན་དང་དབུས་ཤར་ས་ཁུལ་གྱི་དུས་བབ་སོགས་གླེང་མང་བའི་གནད་དོན་ཐད་དགོངས་འཆར་བརྗེ་རེས་གནང་བ་རེད། 

ཚའེ་ཆི་དང་ཝང་དབྱི་སོགས་མཇལ་འཛོམས་ནང་ཞུགས་པ་རེད།