ཟླ་11ཚེས་25ཉིན་ཕྱི་འབྲེལ་པུའི་གསར་འགོད་པའི་རྒྱུན་ལྡན་གྱི་ཚོགས་འདུའི་ཐོག གསར་འགོད་པ་ཞིག་གིས།པའེ་ཏེང་སྲིད་གཞུང་གིས་གཟའ་འཁོར་རྗེས་མར་ཀྲུང་གོར་དམིགས་པའི་ཉིང་ལྷེབ་ཕྱིར་གཏོང་ཚོད་འཛིན་བྱེད་ཐབས་གསར་པ་ཁྱབ་བསྒྲགས་བྱ་རྒྱུ་ཡིན་ཞེས་ཨ་རིའི་ཚོང་ཚོགས་ནས་བཤད་པར་འབྲེལ་པུས་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།
དེའི་ཐད་མགྲིན་ཚབ་པ་མའོ་ཉིང་གིས། ཀྲུང་གོ་ཕྱོགས་ཀྱིས་སྔ་ཕྱི་བར་གསུམ་དུ་ཨ་རི་ཕྱོགས་ཀྱི་རྒྱལ་ཁབ་ཀྱི་བདེ་འཇགས་རྒྱ་ཁྱབ་ཆེ་རུ་གཏོང་བར་ངོ་རྒོལ་མཐའ་གཅིག་ཏུ་བྱེད་པ་དང་། ཕྱིར་གཏོང་དོ་དམ་བྱེད་ཐབས་གང་བྱུང་དུ་སྤྱོད་པ། རྐང་བཙུགས་ནས་ཀྲུང་གོ་བཀག་སྡོམ་དང་གནོན་ཐབས་ཀྱི་བྱེད་སྤྱོད་དེ་རིགས་ནི་ཁྲོམ་རའི་དཔལ་འབྱོར་གྱི་ཆོས་ཉིད་དང་འགྲན་རྩོད་དྲང་གཞག་གི་རྩ་དོན་ལས་ཚབས་ཆེན་འགལ་བ་དང་། རྒྱལ་སྤྱིའི་དཔལ་འབྱོར་ཚོང་དོན་སྒྲིག་ལམ་ལ་གཏོར་བཤིག་གཏོང་བ། གོ་ལ་ཧྲིལ་པོའི་ཐོན་སྐྱེད་དང་མཁོ་སྤྲོད་སྦྲེལ་ཐག་གི་བརྟན་ལྷིང་གཏོར་བཤིག་གཏོང་བ་བཅས་ཡིན་པས། མཐའ་མར་རྒྱལ་ཁབ་ཚང་མའི་ཁེ་ཕན་ལ་གནོད་འཚེ་ཐེབས་རྒྱུ་རེད། ཀྲུང་གོ་ཕྱོགས་ཀྱིས་བྱ་ཐབས་ནུས་ལྡན་སྤྱད་དེ་ཀྲུང་གོའི་ཁེ་ལས་ཀྱི་ལུགས་མཐུན་དང་ཁྲིམས་མཐུན་ཁེ་དབང་སྲུང་སྐྱོང་མཐའ་གཅིག་ཏུ་བྱ་རྒྱུ་ཡིན་ཞེས་བཤད།
