گۈزەل ھايات 10-بۆلۈم3-قىسىم _ئويغىنىش

3-قىسىم

ئويغىنىش

مېھمانخانا بىر ئاز تىنچلانغاندىن كېيىن، ئامانگۈل قولىنى سوزۇپ يۈزىدىكى ياشلىرىنى سۈرتۈپ:

  -   ئەزەلدىن پۇلدىن غەم قىلمايدىغان ئادەملا مۇشۇ چىرايلىق گەپلەرنىلا قىلالايسىلەر، مەن ئىلگىرى قىلغان ئىشلىرىمدىن پۇشايمان قىلغان، لېكىن سىلەر كۆڭلۈڭلاردىكى ناھەق ئىشلار بىلەن مېنى ئىنكار قىلساڭلار بولمايدۇ ... - دېدى.

خاسىيەت ئۇنىڭغا جىمجىت قاراپ تۇرۇپ، تۇيۇقسىز:

  -  سىلەر شۇنچە يىل ئارىلاشتىڭلار، مەۋلان قولىڭىزنىڭ ئۇچىنى تۇتۇپ باقمىغاندۇ؟ - دېدى. 

ئامانگۈل ھاڭۋىقىپ تۇرۇپ قالدى.

 -  ئەگەر ئۇ سىزنىڭ قولىڭىزنىڭ ئۇچىنى تۇتۇپ باققان بولسا، ئىشىنىمەنكى، سىز تەبىئىي ھالدا بارلىق ئاماللار بىلەن ھامىلىدار بولۇپ، ھەممىمىزنىڭ ئاغزىنى ئېتەتتىڭىز، گەرچە سىز ھەقىقىي ھامىلىدار بولالمىغان بولسىڭىزمۇ، ئەمما ئاشۇنداق خىيالىڭىز بولغان تەقدىردىمۇ، سىز بۇ ئەڭ ئاددىي يولدا ماڭالمايسىز...  چۈنكى مەۋلان سىزگە بۇ پۇرسەتنى بەرمىدى.

ئەگەر بىر ئەر بىر ئايالنى ھەقىقىي ياخشى كۆرۈپ قالسا، ئۆزىنى تۇتۇۋالالماي قالىدۇ، ئۆزىنى تۇتۇۋالالماي قالغاندا، ئۇ ئايالغا چاپلىشىۋېلىشنىڭ تۈرلۈك سەۋەبلىرىنى تاپالايدۇ، ئامال قىلىپ ئۇنى قولغا كەلتۈرىدۇ. ئەگەر ئۇ سىزنى چىن كۆڭلىدىن ياخشى كۆرسە، بۇ خىل پۇرسەتنى ئۇ چوقۇم سىزگە كۆپ قېتىم بەرگەن بولاتتى، لېكىن ئەزەلدىن  ئۇنداق قىلىپ باقمىدى... - دېدى خاسىيەت.

ئامانگۈلنىڭ چىرايى ئەمدى ئىختىيارسىز ئوڭايسىزلىنىپ قالدى.

ئاغزىدا تۆمۈر دېتىنىڭ پۇرىقى كەلدى.

بۈگۈن ئۇ بۇ يەردە تۇرۇپ، باشقىلار تەرىپىدىن بىر سۇڭدىن بىر سۇڭدىن يالىڭاچلىنىپ قالدى، ئۇنىڭ ھەتتا جان تالىشىپ رەت قىلىش ھوقۇقىمۇ بولمىدى.

ھەقىقەتەن ئوسال بولدى،  سەتلەشتى.

ئۇ ئاغزى-ئاغزىغا تەگمەي ئۇلارنىڭ دەسلەپتە مەۋلان ئىككىسىنى ئايرىۋەتمەكچى بولغانلىقى ئۈستىدە شىكايەت قىلماقچى بولغان، ئاخىرىدا ئۇنىڭ بىلەن مەۋلان ئوتتۇرىسىدىكى ئۆتمۈش ئۇلارنىڭ نەزىرىدە بىر مەيدان كۈلكىلىك ئىش بولۇپ قالدى.

خاسىيەت ئۇنىڭ ئاخىرى ئۆزىنى ئاقلىمىغانلىقىنى كۆرۈپ، چوڭقۇر نەپەس ئېلىپ:

  -  ئەينى چاغدا سىزنى كەتكۈزۈۋەتلىكىمىز، بىزنىڭ قانچىلىك كۈچلۈك، رەھىمسىز ئىكەنلىكىمىزدىن ئەمەس، ئەكسىچە، سىزنى بۇ يەردىن يىراقلاشتۇرۇش، سىزنىڭ ئىلگىرى قىلغان ئىشلىرىڭىزنىڭ ھەممىسىنى يېپىپ، يېڭى كىشىلىك ھاياتىڭىزنى ئەمەلگە ئاشۇرۇشىڭىزغا يول ئېچىپ بېرىشتىن ئىبارەت ئىدى. مەن ئەزەلدىن سىزنىڭ ھېچكىمدىن مىننەتدار بولۇشىڭىزنى ئۈمىد قىلىپ باقمىغان، ئەمما سىز بىلەن مەۋلاننىڭ ئۆز ھاياتىڭلارنى ياخشى ئۆتكۈزۈشۈڭلارنى ئۈمىد قىلىمەن. سىز بۇ يەردە پەيدا بولماسلىقىڭىز، مەۋلاندىن يەنە ئۈمىد كۈتمەسلىكىڭىز كېرەك ئىدى!

ئۇنىڭ ئۈستىگە، ھازىرقى مەۋلاننىڭ مەيلى كۆزىدە ياكى يۈرىكىدە بولسۇن، سىزنى پەقەتلا سىغدۇرالمايدۇ. يەنە سىزنىڭ ئۆزىڭىزنى بىلىۋېلىشىڭىزنى ئۈمىد قىلىمەن.  - دېدى.

داچىنىڭ سىرتىدا، زۇبەيدە ئۇچىسىدىكى مامۇق چاپاننى چىڭ سىقىمداپ تۇتۇپ، كۈچەپ  نەپەس ئالدى.

سوغۇق ھاۋا بەدىنىگە كىرگەندە، ئۇنىڭ قالايمىقانلىشىپ كەتكەن بېشى بىردەمدىلا يېنىكلەپ قالدى.

ئۇ راستتىنلا خاتا قىلدىمۇ؟

شۇنچە يىل بەرداشلىق بېرىپ، شۇنچە يىل جاھىللىق قىلىپ خاتالاشتىمۇ؟

ئۇ ئىزچىل چىن كۆڭلىدىن، ھەقىقىي بەدەل تۆلەپ،  ۋاز كەچمىسىلا،  ھامان ئۆزى ئېرىشمەكچى بولغان نەرسىگە ئېرىشەلەيدىغانلىقىغا ئىشىنەتتى.

يېقىنقى ئىككى كۈندىن بۇيانقى تىنچ بىللە ئۆتۈشى ئۇنىڭغا ھەقىقەتەن مۇشۇنداق خاتا تۇيغۇنى بېرىپ، ئۇنى سەل خاتىرجەم قىلىپ قويدى.

لېكىن مۇشۇنداق بولغانسېرى، ئۇ ئۆزىنىڭ مەۋلاننى ھەقىقىي ياخشى كۆرىدىغانلىقىنى ھېس قىلدى.

مەۋلاننىڭ مىجەزى غەلىتە، ئاغزى يامان، مىجەزى تېخى چۇس.

لېكىن بۇنچە كۆپ كەمچىلىكلەر ئۇنىڭ مەۋلانغا بولغان ھېسسىياتىنى سۇسلاشتۇرالمىدى.

ئۇ ھەتتا ئۇنىڭ ئاشۇ كەمچىلىكلىرىنىمۇ قوشۇپ ياخشى كۆردى.

ئۇمۇ ئۆزىنى  قۇتقۇزغىلى بولمايدۇ دەپ كەمسىتىپ باققان.

لېكىن ھەممە ئىشلار ياخشى تەرەپكە قاراپ تەرەققىي قىلىۋاتىدۇ، ئۇ ھەتتا مەۋلان ئىككىسىنىڭ كەلگۈسىنىڭ قانداق بولۇشىنى ئۈمىد قىلىشقا باشلىغان.

شۇنچە كۆپ يىل داۋاملاشقان قەيسەرلىك ۋە جاھىللىق بۈگۈنكى كۈندە ئامانگۈلنىڭ پەيدا بولۇشى بىلەن تەۋرىنىپ قېلىشىنى ئويلاپمۇ باقمىغان ئىدى.

ئارىدىن شۇنچە يىللار ئۆتۈپ، ئۇ مەۋلاننىڭ ئامانگۈلغا تۇتقان پوزىتسىيەسىنى يەنە بىر قېتىم كۆرۈپ، بىردىنلا پۈتۈن بەدىنى ماغدۇرسىزلىنىپ كەتتى.

ئۇ مەيلى قانچىلىك تىرىشسۇن، مەۋلاننىڭ كۆڭلىگە ھەقىقىي ئېرىشىشكە ئامالسىز قالدى.

ئۇنىڭ كۆڭلىدە باشقا ئادەم بار، ئۆزى ئۇ ئايالنىڭ ئورنىنى ئالالمىدى.

زۇبەيدە تىرىشتى، پۈتۈن قەلبىنى مەۋلانغا بەرگىلى تاس قالدى، لېكىن  ئالمىسا، ئۇمۇ ھەرگىز  زورلاپ بەرمەيدۇ.

بولمىسا ...   قىلچە پەرۋا قىلمىغان  ھەتتا بىزار بولغان مەۋلاننىڭ يۈرىكىنى يەرگە تاشلىشىشىغا قانداق يۈزلىنىدۇ؟

كۆز چانىقى سوغۇق ھاۋادا بارغانسېرى قىزىپ كەتتى.

ئامال يوق.

ئۇ مەۋلانغا بەك كۆڭۈل بۆلىدۇ، شۇڭا مەۋلاننىڭ كىچىككىنە ھەرىكەتنىمۇ ئېنىق ئېسىدە ساقلىيالايدۇ.

شۇڭا  ئۇنىڭ ئامانگۈلغا قاراشلىرىغا، ئامانگۈلغا تۇتقان پوزىتسىيەسىگە، ئامانگۈلغا باشقىچە مۇئامىلە قىلىشىغا چىداپ تۇرالمىدى.

 كەينىدىن قالايمىقان تېز ماڭغان ئاياغ تىۋىشى ئاڭلاندى، يانغا بۇرۇلۇپ  قارىدى، يېنىك كۈلۈمسىرەپ جايىدا تۇردى، بېشىنى كۆتۈرۈپ ئۆزىدىن خېلىلا ئېگىز تۇرغان زەپەرنىڭ چىرايىغا قاراپ:

- يۈزىڭىزگە ھېچ ئىش بولمىغاندۇ؟ - دېدى. 

زەپەر بېشىنى تۆۋەن سېلىپ ئۇنىڭغا قارىدى، بىر نەچچە سېكۇنتتىن كېيىن ئاندىن بېشىنى چايقاپ:

  -  بۇنچىلىك يارا ھېچقانچە ئىش ئەمەس ... - دېدى.

 -  مەۋلاننىڭ مىجەزى ئانچە ياخشى ئەمەسلىكىنى سىزمۇ بىلىسىز، نېمىشقا يەنە شۇ گەپلەرنى قىلىسىز؟  - دەپ سورىدى زۇبەيدە.

زەپەر ئىككى قولىنى يانچۇقىغا سېلىپ، تامنىڭ بۇلۇڭىدىكى قارىغايغا قاراپ:

  -  ئۇ ئادەمنىڭ ھېسسىي ئەقىل بۆلۈنمىسى بەك تۆۋەن، ئۇنىڭ ھېسسىي ئەقىل بۆلۈنمىسىنى ئېچىشقا ياردەم بېرىدىغان ئادەم بولۇشى كېرەك، - دېدى. 

زۇبەيدە بىردەم تۇرۇپ قالغاندىن كېيىن، ئاندىن ئامالسىز كۈلۈپ تۇرۇپ:

  -  نەتىجىدە، سىز ياردەم بېرىمەن دەپ تاياق يېدىڭىز! - دېدى. 

زۇبەيدەنىڭ چىرايىدىكى سۇس كۈلكىگە قاراپ، زەپەرنىڭ كۆڭلىدە ئازراق تارتىنىش تۇيغۇسى پەيدا بولدى.

 -  بۇنداق دېگىلىمۇ بولمايدۇ؟ ئۇ مېنى بىر مۇشت سالدى، بۇنىڭدىن ئۇنىڭ يەنىلا سىزگە  كۆڭۈل بۆلىدىغانلىقىنى بىلگىلى بولىدۇ.  - دېدى.

زۇبەيدەنىڭ كۈلكىسى سەل كىنايە تۈسىنى ئېلىپ:

  -  بەلكىم بىر ئەر ئۆزىنىڭ ئايالىنىڭ باشقا بىر ئەرگە ياخشى مۇئامىلە قىلىشىنى كۆتۈرەلمەسلىكى مۇمكىن، شۇنداقمۇ؟ بۇ پەقەت ئەرلەرنىڭ ئىززەت-ھۆرمىتى مەسىلىسى.  - دېدى .

ئۇ مەۋلاننىڭ ئىلگىرى بىر قېتىم  مەۋلاننىڭ ئايالى دېگەن ئورۇندا ئولتۇرغانىكەنسىز، چوقۇم  ئائىلىمىزنىڭ يۈزىنى قوغدىشىڭىز كېرەك دەپ ئاگاھلاندۇرغانلىقىنى ئۇنتۇپ قالمىدى.

ھەر قانداق بىر ئائىلىدە بىر ئەر ئايالىنىڭ يولدىن چىقىپ كېتىشىدەك سەتچىلىككە بەرداشلىق بېرەلمەيدۇ.

زەپەرمۇ جىمىپ قالدى،  دېگۈدەك گېپىمۇ قالمىدى.

بۇ خىل ئېھتىماللىقنى چەتكە قاققىلى بولمايتتى.

- بىراق سىزنىڭ مۇشۇنداقلا يۈگۈرۈپ چىقىپ كەتكىنىڭىز قالماشماي قالدى، ئۇ يەر ھازىر سىزنىڭ ئۆيىڭىز تۇرسا، نېمىشقا ئۇ ئايالنى بۇنداق ھەشەمەتلىك ئۆيگە كىرگۈزۈپ، ئۆزىڭىز يۈگۈرۈپ چىقىپ كېتىسىز؟  - دېدى زەپەر.

زۇبەيدە كۆزلىرىنى يوغان ئېچىپ:

  -  قانداق بولسا بولسۇن، ئامانگۈل ئىككىمىز مەۋلاننىڭ ئالدىدا تۇرساق، مەن مەڭگۈ ياخشىچاق بولالمايمەن. ئۇ يەردە داۋاملىق تۇرۇپ ئۇلارنىڭ قىلغان گەپلىرىنى ئاڭلاپ ئازابلانغاندىن كۆرە، بۇلارنىڭ ھەممىسىدىن بالدۇرراق ساقلانغىنىم ياخشى، ئۆزۈمنى بەك ئوسال ئەھۋالغا چۈشۈرۈپ قويغۇم يوق. - دېدى . 

-ئۆز مەيدانىڭىزنى توغرىلاڭ،  ئوسال ئەھۋالغا چۈشۈپ قالىدىغان ئادەم ئۇ،  سىز ئەمەس.  - دېدى زەپەر.

زۇبەيدە بېشىنى چايقاپ:

  -  مەيدانىڭىزنى...  مېنىڭ ھازىرقى مەۋلاننىڭ خانىملىق سالاھىيىتىم، پەقەت بىر قۇرۇق نام خالاس، مېنىڭ ئامانگۈلنىڭ ئالدىدا  بۇ كىبىرىمنى چىقىرىپ ئۇنى تەڭلىكتە قويغۇم يوق... - دېدى. 

ئاندىن ئاچچىق كۈلۈپ قويۇپ:

  -  مەۋلان يول قويمايدۇ. - دېدى. 

ئۇ ئامانگۈلنىڭ ئۆزىنىڭ  ئالدىدا ئازار يېيىشىگە قانداق چىدايدۇ.

زۇبەيدە بەك كۆپ ئېھتىماللىقنى پەرەز قىلدى، ئەڭ ئاخىرىدا پەقەت ئۆزى ئوڭايسىزلىنىپ قالىدىغانلىقىنى بىلدى.

شۇڭا ئۇ ئۆيدە قېلىپ نېمە قىلىدۇ؟

 -  يۈگۈرۈپ چىقىنىڭىزنىڭ نېمە پايدىسى؟ بۇنىڭدىن كېيىن، مۇشۇنداق سۆرەلمىلىك قىلىپ، ھەل قىلمىسىڭىز،  ئېنىق بولماي، دەككە-دۈككىدە ئۇنىڭ بىلەن بىر ئۆمۈر بىللە تۇرامسىز؟  - دېدى زەپەر.

-  بىر ئۆمۈر؟ -  دېدى زۇبەيدە پىچىرلاپ، بىر ئاز جىمىپ قالغاندىن كېيىن، يەنە ئېغىز ئاچتى، ئۇنىڭ تەلەپپۇزىدىن چوڭقۇر قايغۇ، ھەسرەت چىقىپ تۇراتتى،  -  ئىزچىل سۆرىسەم، ئۇنىڭ بىلەن بولغان ئۆمرۈم بەلكىم يەنە بىر ئاز ئۇزىرىشى مۇمكىن. ئەگەر پاراڭلاشساق، بەلكىم بىزنىڭ پۈتۈن ئۆمرىمىز مۇشۇ يەردە ئاخىرلىشىشى مۇمكىن. - دېدى.  

زەپەر ئۇنىڭغا ھەيرانلىق بىلەن قاراپ:

  -  ئۆزىڭىزگە شۇنچىلىك ئىشەنچىڭىز يوقمۇ؟  ئازراقمۇ بۇرۇنقى ئۆزىڭىزگە  ئوخشىماي قالدىڭىز، - دېدى . 

 -  پەقەت ئۇنىڭ ئالدىدىلا شۇنداق. خۇددى ... ئۇ مېنىڭ قەلبىمدىكى جاھىللىق بىلەن قويۇۋېتەلمەيدىغان ئادەم بولغىنىغا ئوخشاش، ئامانگۈلمۇ ئۇنىڭ جاھىللىق بىلەن قويۇۋېتەلمەيدىغان ئادىمى. ئۇنىڭدىن ۋاز كەچكىن دېسە ئۆكۈنىمەن، تەن بەرمەيمەن، ھەتتا كۆڭلۈم يېرىم بولىدۇ،  ئۇنىڭ كۆڭلىمۇ  مېنىڭكى بىلەن ئوخشايدىغۇ دەيمەن ... - دېدى .

 زۇبەيدەنىڭ گېپى بارغانسېرى ئاستىلاپ كەتتى.

خۇددى بىر تەرەپتىن ئويلىنىپ، بىر تەرەپتىن سۆزلىگەندەك، ئاخىرىغا كەلگەندە،  چوڭقۇر خىيالغا پېتىپ قالدى.

 بىردەمدىن كېيىن،  تۇيۇقسىز كۈلۈپ كەتتى، بېشىنى كۆتۈرۈپ زەپەرگە قاراپ:

- مەن بۇ گەپنى راستتىنلا ئاشۇرۇۋەتكەندەك قىلىمەن، ئۇنى ياخشى كۆرۈش نامى بىلەن، ئاخىر ئۇنى ئەڭ ئازابلىغان ھېلىقى ئادەم مەن بوپتىمەن، - دېدى.

زەپەر قوشۇمىسىنى تۈردى، بۇ ئايال ھازىر زادى نېمىلەرنى ئويلاۋاتىدۇ؟

بۇ گەپ ئانچە توغرا ئەمەستەك قىلىدىغۇ؟

 -  زەپەر. -  زۇبەيدە تۇيۇقسىز چاقىردى، ئۇنىڭ كۆزلىرىگە ئادەتتىن تاشقىرى ئەستايىدىللىق بىلەن قاراپ، - دەڭە، مەن ئۇنى قويۇۋەتسەم قانداق بولىدۇ؟ - دېدى. 

زەپەرنىڭ چىرايى سەل-پەل ئۆزگىرىپ:

- نېمىشقا تۇيۇقسىز بۇنداق خىيالغا كېلىپ قالدىڭىز؟ بايا تېخى ئاغزى-ئاغزىڭىزغا تەگمەي ئۇنى ياخشى كۆرىمەن دېگەنتىڭىزغۇ؟ - دېدى.

زۇبەيدە بېشىنى چايقاپ تۇرۇپ:

  -  ياخشى كۆرىمەن، ھازىرمۇ سۆيىمەن، بىراق ئۇنى ماڭا ئوخشاش ئازابلاش مېنىڭ دەسلەپكى مەقسىتىم ئەمەستەك قىلىدۇ، شۇنداق بىر جۈملە سۆز بارغۇ؟ ئۇنى سۆيسەڭ مۇرادىغا يەتكۈز، پەقەت ئۇ خۇشال بولسىلا بولدى دەيدىغان... - دېدى .

بوشاڭ، يارامسىز!

 زەپەر يوشۇرۇنچە تىللاپ كەتتى، قايسى ئىككىنچى ئەخمەق مۇشۇنداق ئۆزىنى يارىلاندۇرىدىغان گەپنى قىلىدۇ.

- كاللىڭىز قىزىپ قالدىمۇ؟ بۇنداق ئەخمىقانە گەپلەرنىڭ ھەممىسىگە ئىشەنگىلى بولامدۇ؟ - دېدى زەپەر. 

زۇبەيدە پىخىلداپ كۈلۈپ قويۇپ:

  -  ياق ... زەپەر، مەن ...  مەن راستتىنلا خاتا ئۇسۇلدا ياخشى كۆرۈپ قالغاندەك قىلىمەن...  زورلاپ ئېرىشكەن توي تۇرمۇشىدا  پەقەت نامغا ئېرىشكىلى بولىدىكەن ، ئەمەلىيەتتە كۆڭۈلگە مەڭگۈ ئېرىشەلمەيمەن. ئەگەر داۋاملىق ماڭسام، مەۋلان ئىككىمىز،  پەقەت ئىككىلا تەرەپنى يارىلاندۇرۇپ قويىدىغان ئاقىۋەتكە قالىمىز، ئۇنىڭدىن  مۇشۇنداق بولسۇن ... - دېدى. 

گەرچە قىيالمىغان بولسىمۇ، لېكىن ھەر ھالدا كېيىنكى ئىككى ئادەمنىڭ چەكسىز ئازابىدىن كۆپ ياخشى.

 زەپەرنىڭ كۆزلىرى قىسىلدى.

تازىمۇبىر، بۇ ئويۇن چەكتىن ئېشىپ كەتتىمۇ قانداق، مەۋلاننى ئويغىتالماي، ئەكسىچە بۇ ئايالنىڭ قاتتىق ئويغىنىپ كەتكىنى نېمىسى.