ءايدىز اۋرۋىنان ساقتانۋ باسقارماسى: 2023 – جىلى ءايدىز اۋرۋى ۆيرۋسىمەن جۇعىمدالعانداردىڭ سانى شامامەن ءبىر ميلليون 300 مىڭ ادام ارتقان
دۇنيە جۇزىلىك ءايدىز اۋرۋىنان ساقتانۋ كۇنىنىڭ كەلۋى قارساڭىندا، بىرلەسكەن مەملەكەتتەر ۇيىمىنىڭ ءايدىز اۋرۋىنان ساقتانۋ باسقارماسى 11 – ايدىڭ 26 – كۇنى جاريالاعان مالىمەتكە قاراعاندا، 2023 – جىلى دۇنيە ءجۇزى بويىنشا 630 مىڭ ادام ءايدىز اۋرۋىمەن قاتىستى اۋرۋلاردان قايتىس بولعان، ءايدىز ۆيرۋسىمەن جۇعىمدالعانداردىڭ سانى جاڭادان ءبىر ميلليون 300 مىڭ ادام ارتقان.
مالىمەتكە قاراعاندا، دۇنيە ءجۇزى بويىنشا ءايدىز ۆيرۋسىمەن جۇعىمدالعانداردىڭ سانى شامامەن 39 ميلليون 900 مىڭ ادام بولىپ، 2022 – جىلعىمەن سالىستىرعاندا 900 مىڭ ادام ارتقان، مۇنىڭ ىشىندە 9 ميلليون 300 مىڭ ادام ءالى ەمدەلىپ جازىلماعان. كەمىندە 28 مەملەكەتتە ءايدىز ۆيرۋسىمەن جۇعىمدالعانداردىڭ سانى ءالى دە ارتۋدا.
مالىمەتكە قاراعاندا، 2023 – جىلى 15 جاستا 24 جاس ارالىعىنداعى ايەلدەردەن كۇنىنە ءايدىز ۆيرۋسىمەن جۇعىمدالعانداردىڭ سانى ورتا ەسەپپەن 570 ادام بولعان. افريكانىڭ شىعىس بولىگى مەن وڭتۇستىك بولىگىندە كەمىندە 22 مەملەكەتتە 15 جاستان 24 جاسقا دەيىنگى ارالىقتاعى جۇعىمدالعان ايەلدەردىڭ سانى سايكەستى جاستاعى جۇعىمدالعان ەرلەردىڭ سانىنىڭ 3 ەسەسىندەي بولعان.
بىرلەسكەن مەملەكەتتەر ۇيىمىنىڭ ءايدىز اۋرۋىنان ساقتانۋدى جوسپارلاۋ باسقارماسىنىڭ اتقارۋشى مەڭگەرۋشىسى ۋيننيە بايانيمانىڭ ايتۋىنشا، ايەلدەردى وقۋ – اعارتۋدان يگىلىكتەنۋ ۇقىعىنان ماحرۇم ەتۋ مەن جىنىستىق زورلىق – زومبىلىقتى ەركىنە قويا بەرۋ قاتارلى ادامدىق ۇقىققا زيان جەتكىزەتىن ارەكەتتەر ءايدىز اۋرۋىن ەمدەۋ جاعىندا قىزمەت وتەۋگە كەدەرگىلىك جاساۋدا ءارى ۆيرۋستىڭ تارالۋىنا اپارىپ سوعۋدا، ”ءاربىر ادامنىڭ سالاماتتىعىن قورعاۋ ءۇشىن، ءسوزسىز، ءاربىر ادامنىڭ ۇقىعىن قورعاۋ كەرەك“.
دۇنيە جۇزىلىك دەنساۋلىق ساقتاۋ ۇيىمى 1988 – جىلى ءار جىلى 12 – ايدىڭ 1 – كۇنىن دۇنيە جۇزىلىك ءايدىز اۋرۋىنان ساقتانۋ كۇنى دەپ بەلگىلەپ، دۇنيە جۇزىندەگى ەلدەر مەن حالىقارالىق ۇيىمداردى وسى كۇنى قاتىستى قيمىلداردى ۇيىمداستىرۋعا، ءايدىز اۋرۋىنان ساقتانۋ جاعىنداعى بىلىمدەردى ۇگىتتەۋگە جانە جالپىلاستىرۋعا شاقىرعان.
حاباردى دوستارىڭىزعا، توپتارىڭىزعا جولداپ، حالىق تورابىنا قولداۋ كورسەتىڭىز!
اۋدارعان: نۇرعيسا قۇرمانجان ۇلى
دايىنداعان: نۇرعيسا قۇرمانجان ۇلى
كەلۋ قاينارى: حالىق تورابى
