ཉེ་དུས་ཨ་རི་ཕྱོགས་ཀྱིས་ཀྲུང་གོའི་ཁེ་ལས་29“ཡུ་གུར་ལ་བཙན་ཤེད་ངང་ངལ་རྩོལ་བྱེད་དུ་འཇུག་པའི་སྔོན་འགོག་བཅའ་ཁྲིམས”ཞེས་པའི་དངོས་གཞིའི་གསལ་ཐོའི་ནང་འཇུག་རྒྱུའི་ཁྱབ་བསྒྲགས་བྱས་པར་དམིགས་ནས། ཚོང་དོན་པུའི་གསར་འགྱུར་མགྲིན་ཚབ་པས་ཚེས་26ཉིན་ལན་བསློགས་དོན། ཨ་རི་ཕྱོགས་ཀྱི་བྱེད་སྟངས་ལ་དོན་དངོས་ཀྱི་གཞི་འཛིན་ས་མེད་པར། “འགྲོ་བ་མིའི་ཐོབ་ཐང་”ཞེས་པའི་མིང་གཡར་ནས་བཙན་ཤེད་བྱེད་པ་ནི་དཔེ་མཚོན་གྱི་དཔལ་འབྱོར་བཙན་ཤེད་ཀྱི་བྱ་སྤྱོད་ཅིག་རེད། ཀྲུང་གོ་ཕྱོགས་ནས་རྒོལ་གཏམ་དྲག་པོ་བཏང་བ་དང་ངོ་རྒོལ་མཐའ་གཅིག་ཏུ་བྱ་རྒྱུ་མ་ཟད། ཨ་རི་ཕྱོགས་ལ་འབྲེལ་གཏུག་ནན་མོའང་བྱས་ཡོད། ཀྲུང་གོ་ཕྱོགས་ཀྱིས་དགོས་ངེས་ཀྱི་བྱེད་ཐབས་སྤྱད་དེ་ཀྲུང་གོའི་ཁེ་ལས་ཀྱི་ཁྲིམས་མཐུན་ཁེ་དབང་སྲུང་སྐྱོང་མཐའ་གཅིག་ཏུ་བྱ་རྒྱུ་ཡིན།
མགྲིན་ཚབ་པས་བཤད་དོན། ཀྲུང་གོས་བཙན་ཤེད་ཀྱིས་ངལ་རྩོལ་བྱེད་དུ་འཇུག་པར་ངོ་རྒོལ་མཐའ་གཅིག་ཏུ་བྱ་རྒྱུ་དང་། ཞིན་ཅང་དུ་“བཙན་ཤེད་ཀྱིས་ངལ་རྩོལ་བྱེད་དུ་འཇུག་པ་”ཟེར་བ་རྩ་བ་ནས་མེད། ཨ་རི་ཕྱོགས་ཀྱིས་བདེན་དཔང་ཁུངས་བཙན་གང་ཡང་མེད་པའི་གནས་ཚུལ་འོག རྒྱལ་ནང་གི་བཅའ་ཁྲིམས་གཞིར་བཟུང་སྟེ། ཀྲུང་གོའི་ཁེ་ལས་ཀྱིས་ཞིན་ཅང་ནས་རྒྱུ་ཆ་ཉོ་སྒྲུབ་བྱེད་པའམ་ཞིན་ཅང་ནས་ཡིན་པའི་ལས་བཟོ་པ་བསྡུ་བ་ཁོ་ནར་དམིགས་ནས། བཀག་སྡོམ་ལག་བསྟར་བྱས་པ་དེས་ཞིན་ཅང་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་གནོད་འཚེ་ཚབས་ཆེན་གཏོང་བ་དང་། འབྲེལ་ཡོད་ཁེ་ལས་ཀྱི་ཁྲིམས་མཐུན་ཁེ་དབང་ལ་གནོད་འཚེ་གཏོང་བ། གོ་ལ་ཧྲིལ་པོའི་མཁོ་སྤྲོད་ཕྲེང་ཐག་བརྟན་པོ་དང་བདེ་འཇགས་ཡོང་བར་གཏོར་བཤིག་གཏོང་བ་བཅས་བྱས་ཡོད། ང་ཚོས་ཨ་རི་ཕྱོགས་ལ་འཕྲལ་མར་ཆབ་སྲིད་ཀྱི་བྱེད་ཐབས་སྤྱོད་པ་དང་ངན་སྨྲས་འགོག་རྒོལ་བྱེད་མཚམས་འཇོག་དགོས་པ་དང་། གནས་ལུགས་མེད་པར་ཀྲུང་གོའི་ཁེ་ལས་ལ་རྡུང་རྡེག་གཏོང་མཚམས་འཇོག་དགོས་པའི་སྐུལ་མ་གཏོང་རྒྱུ་ཡིན།
