TVB绿叶王戴耀明曾经拍过无数的经典电视剧，今年更完成新剧《刑侦12》的拍摄工作。有指他于“饮食界富二代”张本立（Billy哥）黄大仙的茶记开工，为食客落单、抹枱、洗碗，以及倒垃圾。他接受访问表示：“唔系转咗行，因为同Billy哥讲开做演员都唔系好稳阵，近排又得闲未剧开，咁佢就话不如你去实习吓（餐饮业）啦！如果冇嘢捞就开间餐厅，就学习冲咖啡同埋奶茶。”
谈及Billy哥是否曾经怀疑“你系玩玩吓？”，他说：“我系认真㗎！佢初头真系X(讲粗口），对啲员工好认真咁样教，当自己系一个演员去演侍应，我同Billy哥讲话有咩就直接同我讲得啦！唔需要特别客气。”至于现时的工作情况，他说：“我都开咗工两个礼拜，返工时间可以好长，朝头早五点几要起身，佢哋有两个更表，返夜晚黑就要做到12点几。”被问到最难适应的一点，他坦言：“服侍啲食客，好尴尬，啲客问我系咪拍紧戏，演员嗰个心理关口，好似做开演员做第二个职业做侍应，要拎碟叉烧饭畀食客感觉好唔真实，我自己都好唔惯，通常啲食客问到我就会笑骑骑，话帮朋友顶住一两日。”
谈及是否要做侍应帮补家计，他直言：“近排又比较少嘢做，做演员系唔知道，可能下一年冇嘢做，或者签好多年约，如果冇嘢做嘅时候都想搵一门手艺，做第二样嘢都可以生存到。”至于工作的薪酬，他透露：“我冇乜出人工嘅，以我所知每日都可能系三百至四百蚊人工，一个礼拜就通常有一日假放，一个月起码返28日，一万几蚊一个月。”
最近有戴耀明于「饮食界富二代」张本立（Billy哥）黄大仙的茶记开工，Billy哥接受访问分享做老板的主要工作：「负责啲生意、食物啊！材料啊！」至于是否需要亲身上阵接待食客，他表示：「如果我返到嚟公司入边就要㗎啦！」他指自己不用洗碗，并续说：「有阵时要切下菜、帮吓啲厨师！」讲到最近是否不用拍剧，他说：「呢排有阵时拍剧、有阵时做返自己嘅生意。」
被问到是否聘请戴耀明做侍应，他说：「其实因为我同佢拍剧结缘，有阵时佢就话想生活体验，佢想试吓做楼面嘅感觉，我话当然冇问题。」至于最初得知戴耀明答应工作时，是否认为对方只是开玩笑，他表示：「开头我都以为佢玩玩吓，不过呢佢做嘢都好认真。（戴耀明什么时候开始正式上班？）睇吓几时得闲啦！佢如果要返工都会早一日同我讲，开头就叫佢晏昼过嚟帮手，嗰阵时冇咁多食客，始终都惊整亲佢。」
他指戴耀明的工作需要招呼食客：「要落下单、执头执尾，或者执垃圾，同埋洗吓杯碗碟。」提到对方工作时的「虾碌事」，他说：「落单落错，人哋要切鸡饭，佢就落咗烧鸭饭，经常性会咁样，我唔怪佢，因为佢系学习中嘅人。」至于过去有否曾经动粗责骂戴耀明，他直言：「粗口间唔中都一两句，因为都好写实。」
提到有否目睹食客认出戴耀明，他说：「梗系有啦！但系啲小朋友就未必认到佢，因为就觉得佢头发古怪，但系有啲30至40岁嘅人见到佢就好开心。」讲到戴耀明是否属于自己的徒弟，他幽默回应：「咁又唔好咁讲，其实拍戏我系跟佢学嘢，如果做楼面就分享我嘅经验俾佢。」他透露有望与戴耀明一齐在电台节目中合作。
