ད་ལོར་ལྷོ་ཁོ་རེ་ཡའི་ས་ཆ་མང་པོར་ཁ་བ་ཆེན་པོ་བབས་པ་དང་ས་ཆ་མང་པོར་ཁ་བ་ཆེ་བའི་ཉེན་བརྡ་བཏང་ཡོད། དེའི་ནང་སོའར་ས་ཁུལ་གྱི་ཁ་བ་གསོག་ཚད་དེ་ལོ་117རིང་གི་ཟླ་འདིའི་ཉིན་གཅིག་གི་ཁ་བ་བབས་པའི་ཟིན་ཐོ་མཐོ་ཤོས་བཏོད་པ་དང་། དུས་མཚུངས་སུ་ཁ་བ་བབས་པའི་རྐྱེན་གྱིས་སྲོག་ཉེན་ཐུག་པའི་དོན་རྐྱེན་ཡང་མང་པོ་ཐོན་ཡོད།
མདང་ནུབ་ནས་བཟུང་། ལྷོ་ཁོ་རེ་ཡའི་ས་ཆ་མང་པོར་ཡོངས་ཁྱབ་ཏུ་ཁ་བ་ཆེན་པོ་བབས་པ་དང་། ལྷོ་ཁོ་རེ་ཡའི་གནམ་གཤིས་ཐིང་གིས་བསྒྲགས་དོན། མིག་སྔར་སོའར་གྱི་ས་ཁུལ་ཁག་གཅིག་ཏུ་ཁ་བ་གསོག་ཚད་ལི་སྨི་20ལས་བརྒལ་ཡོད། གནམ་གཤིས་ལྟ་ཞིབ་ཚད་ལེན་བྱེད་འགོ་ཚུགས་པ་ནས་བཟུང་། ལོ་117རིང་གི་ཟླ་འདིའི་ཉིན་གཅིག་གི་ཟིན་ཐོ་མཐོ་ཤོས་བཏོད་ཡོད། ཉེ་བའི་ལོ་ཤས་རིང་སོའར་གྱི་ངོས་ནས་བརྗོད་ན་ཁ་བ་འབབ་ཚད་འདི་འདྲ་ནི་ཧ་ཅང་མཐོང་དཀོན་པོ་ཞིག་རེད། དེ་དང་ཆབས་ཅིག ལྷོ་ཁོ་རེ་ཡའི་རྒྱལ་སའི་ཁུལ་དང་ཅང་ཡོན་ཏའོ་སོགས་ས་ཁུལ་མང་ཆེ་བར་ཁ་བ་ཆེན་པོ་འབབ་རྒྱུའི་ཉེན་བརྡ་བཏང་ཡོད།
