都话TVB综艺《与天地对话》主打感性，若邀请嘅艺人顺风顺水，夹硬要佢哋扮有经历，只会变成无病呻吟。果不其然，紧接姜皓文出场嘅，就系观众缘麻麻，却一直获力捧嘅蔡思贝。观乎网民反应，对伊人卖惨真系冇乜共鸣喎。
思贝远赴杳无人烟嘅索科特拉岛拍摄，奇幻如外星球般的景象本来非常吸睛，如果纯粹拍摄旅游节目，合格有馀。但正如前述，《与》主打艺人剖白内心感受，是否有故事非常重要。
众所周知，思贝2013年港姐出身，卸任不久即获力捧，一嚟就担正女主角，之后剧接剧冇停过。2020年更凭《踩过界Ⅱ》勇夺视后殊荣，出道7年即攞奖，公司锡到出面，恨死隔篱。之不过，可能年少气盛，思贝变得任性，尤其跟人夫拍档王浩信屡传绯闻，成为其致命伤。唔止本地观众睇唔顺眼，内地观众直情反感，甚至涌到大台高层微博留言，叫TVB唔好再用思贝做女主角。
搞到咁，都唔知系外界误解咗佢，定系后生女唔识谂。节目中，思贝就话自己只系同朋友食饭，冇谂过咁都畀人写。佢仲哽咽话已经一年冇剧开，不禁质疑是否已不被需要。
正如网民话斋，一年冇剧开就喊咁口，咁深得人心嘅Ali坐足几年冷板櫈，王浩信正宫陈自瑶苦候十几年，先至有担正女主角嘅机会，呢啲又点计呀？何况今年思贝都有《飞常日志》出街，甚至现时下午及深夜时段都重播其旧作。唉，睇嚟TVB想帮思贝洗底并未成功，换不到观众同情，反而觉得佢系身在福中不知福嘅温室小花。
