近日英國迎來冬天11月的初雪，有移英港人在網上大呻，話夜晚望出窗外見到落雪，就知第二日早上出行時會特別慘，皆因架老爺車要攞風筒暖身先撻得着，而且因為雪地濕滑，全部啲車都慢行，行車時間往往要多出一倍。
該名移英港人在其專頁「住到英國鄉村邊緣」深夜發文抱怨，話「呢個時候咁啱仲未瞓覺，如果你望出咗窗外冇落雪嘅話... ...，你而家住緊嗰個地方應該好地方，聽日可以專心返學返工。」
之不過，樓主一家就慘喇，「聽朝特別多嘢做，老爺車嘅話就要攞風筒吹暖個車頭先着到架車，當車頭同車尾啲玻璃啲吹走晒啲霧氣之後先可以行」。而且落雪揸車好危險，「行到出去成條街都濕立立，全部啲車都慢慢行，兩分鐘嘅路程變咗十分鐘，半個鐘嘅路程變咗一個鐘。」
正所謂「食得鹹魚抵得渴」，有網民留言安慰樓主，話「出得來行，預咗要還！」、「可以返工返學，就算落雪都應該感恩」。
（原文來源：點新聞）
(圖片轉自網絡)
覺得不錯，就點「在看」哦! ! ↓ ↓
