ەمتيحانسىز كۋالىك الۋعا بولا ما؟ الدانىپ قالماڭىز

حالىق سوتى گازەتىنىڭ ءتىلشىسى حۋ سىحاڭ، ەرىكتى تىلشىلەرى شى شياۋشا، چىن چيلياڭ حابارلايدى. تەك ”ەمتيحانسىز كۋالىك الۋ قاراجاتىن“ تاپسىرسا بولعانى، ەمتيحانعا قاتىناسپاي – اق كۋالىك الۋعا بولا ما؟ جۋىردا سىچۋان ولكەسى چىڭدۋ قالاسى جينجياڭ رايوندىق حالىق سوتى قىزمەت وتەۋ توقتامىنا قاتىستى تالاس – تارتىس دەلوسى جونىندە تەرگەۋ جۇرگىزىپ، جالعان ۋادە بەرگەن ءمالىم وقۋ – اعارتۋ جانە كۋرس قۇرىلىمى ”ەمتيحانسىز كۋالىك الۋ قاراجاتىن“ تۇگەل قايتارۋ كەرەك دەگەن ۇكىم شىعاردى.

2022 – جىلى 11 – ايدا، چىن حانىم ءمالىم وقۋ – اعارتۋ جانە كۋرس قۇرىلىمىمەن كۋرس نىسانى بويىنشا قىزمەت وتەۋ توقتامىنا قول قويادى، كۋرس مازمۇنى دەنساۋلىقتى باسقارۋ جانە الەۋمەتتىك قورەكتىك، وقىتۋ فورماسى ينتەرنەت ارقىلى وقىتۋ بولادى. چىن حانىم سايكەستى قاراجاتتى تاپسىرعان سوڭ، اتالعان قۇرىلىم وعان بارلىق ۇيرەنۋ ماتەريالدارى مەن وقۋلىقتاردى جولداپ بەرەدى. چىن حانىم ءبىر مەزگىل ۇيرەنگەن سوڭ، اتالعان قۇرىلىمنان كۋالىككە ەمتيحان بەرۋ ءىسى تۋرالى سۇرايدى. اتالعان قۇرىلىم ەگەر چىن حانىم ءمالىم مولشەردە اقشا تاپسىرسا بولعانى ەمتيحانسىز كۋالىك الۋىنا بولاتىنىن ايتادى، ونىڭ ۇستىنە، كۋالىك العاننان كەيىن چىن حانىمعا قوسىمشا قىزمەت ورنالاستىرۋعا بولاتىنىن ايتادى. چىن حانىم اتالعان قۇرىلىمنىڭ بۇل تانىستىرۋىنا ىنتا تانىتىپ، دەرەۋ 7000 يۋاندىق ”ەمتيحانسىز كۋالىك الۋ قاراجاتىن“ تاپسىرادى ءارى اتالعان قۇرىلىممەن توقتامعا قول قويادى. الايدا، كەيىن بۇل قۇرىلىم ”ەمتيحانسىز كۋالىك الىپ بەرۋ“ ۋادەسىن ورىنداي المايدى. چىن حانىم اقشانى قايتارىپ بەرۋدى تالاپ ەتسە دە ءساتتى بولماعان سوڭ، سوت مەكەمەسىنە ارىزدانىپ، اتالعان قۇرىلىمنىڭ بارلىق قاراجاتتى قايتارىپ بەرۋىن تالاپ ەتەدى.

سوت مەكەمەسى تەرگەۋ ارقىلى بىلاي دەپ قارايدى: ەكى جاق تا چىن حانىمنىڭ ەمتيحانعا قاتىناسپاي – اق كۋالىك الۋى تۋرالى ورتاق تانىمعا كەلگەن ءارى توقتام جاساسقان بولسا دا، بۇل ارەكەت وبيەكتيۆ جاقتان مەملەكەتتىڭ قالىپتى كاسىپتىك ونەر دارەجەلىك كۋالىگى ەمتيحانى مەن ونى باسقارۋ ءتارتىبىن بىلىقتىرعاندىقتان، اتالعان قۇرىلىمنىڭ بۇل ءىستى ورىنداي العان – العانىنا قاراماستان، ەكى جاق قول قويعان ”ەمتيحانسىز كۋالىك الۋ“ توقتامى مەملەكەتتىڭ ساياساتتىق بەلگىلەمەلەرىنە قايشى كەلگەن، الەۋمەتتىك تاماشا سالتقا قايشى كەلگەن ەسەپتەلىپ، كۇشكە يە بولمايدى، دەلوعا قاتىستى قۇرىلىم قولعا كەلتىرگەن 7000 يۋاندىق ”ەمتيحانسىز كۋالىك الۋ قاراجاتىن“ قايتارىپ بەرۋى كەرەك. سوت مەكەمەسى اتالعان وقۋ – اعارتۋ جانە كۋرس قۇرىلىمى مەن چىن حانىم قول قويعان ەكىنشى توقتام كۇشكە يە بولمايدى دەپ قاراپ، قۇرىلىم 7000 يۋاندى قايتارىپ بەرۋى كەرەك دەپ ۇكىم شىعارعان.

      سۋديانىڭ زاڭ جونىندەگى ءتۇسىندىرۋى

ازاماتتىق زاڭنامانىڭ 8 – تارماعىنداعى، 153 – تارماعىنداعى، 157 – تارماعىنداعى بەلگىلەمەلەرگە ساي، ازاماتتىق ىستەر سۋبيەكتى ازاماتتىق ىستەر قيمىلىمەن شۇعىلدانعاندا، زاڭعا قايشىلىق جاساۋىنا، الەۋمەتتىك ءتارتىپ پەن تاماشا سالتقا قايشى كەلۋىنە بولمايدى. الەۋمەتتىك ءتارتىپ پەن تاماشا سالتقا قايشى ازاماتتىق ىستەر زاڭدىق ارەكەتى كۇشكە يە بولمايدى. ازاماتتىق ىستەر زاڭدىق ارەكەتى كۇشكە يە بولماعاننان كەيىن، ارەكەت وتكىزۋشى سول ارەكەتكە بايلانىستى يە بولعان مال – مۇلىكتى قايتارىپ بەرۋى كەرەك. بۇل دەلودا تالاپكەر مەن ايىپكەر ەكى جاقتىڭ ”ەمتيحانسىز كۋالىك الۋ“ توقتامىنا قول قويۋى مەملەكەتتىڭ قاتىستى ساياساتتارى مەن قوعامدىق تارتىپكە، تاماشا سالتقا قايشى كەلەتىندىكتەن، كۇشكە يە بولمايدى، ايىپكەر بۇل توقتام بويىنشا يە بولعان قاراجاتتى دا قايتارىپ بەرۋى كەرەك. كۋرسانتتار كۋرسقا قاتىناسىپ كۋالىك الاتىن كەزدە قىراعىلىقتى ارتتىرۋى، سەنىمدى ارنالار ارقىلى تىزىمدەلۋى ءارى ەمتيحانعا قاتىناسۋى كەرەك، سەنىمسىز قۇرىلىمداردىڭ كۋالىك ءتۇرىن بىلىقىرىپ كورسەتىپ، ”ەمتيحانسىز كۋالىك الىپ بەرەمىز“ دەگەن، جۇزدە ءجۇز قىزمەت تاۋىپ بەرەمىز دەگەن الدامكوستىك امالدارىنان ساق بولعان ءجون.